ខេត្តព្រៃវែង ៖ នាពេលកន្លងមកប្រជាពលរដ្ឋភាគច្រើនមិនថានៅទីណាទេ ជាពិសេសអ្នកខេត្តព្រៃវែងបានបោះបង់មុខរបរបិតស្រាសចិញ្ចឹមជ្រូកលក់ស្ទើរតែគ្រប់គ្នាអស់ទៅហើយ ដោយសារតែមុខរបរនេះរកប្រាក់ចំណេញលែងបាន ប៉ុន្តែមកដល់ពេលបច្ចុប្បន្ននេះអ្នកដែលនៅតស៊ូក្រាញននៀលលើមុខរបរនេះបែរជាអះអាងថា កំពុងកាក់កបខ្លាំងទៅវិញបើទោះបីជាស្រាបៀរ ស្រាដបគ្រប់ប្រភេទ កំពុងវាយលុកខ្លាំងនៅលើទីផ្សារក៏ដោយ ។
លោក ហាន ហុង អាយុ៥២ឆ្នាំ ដែលបានចាប់យកមុខរបរបិតស្រាសចិញ្ចឹមជ្រូកលក់នៅភូមិកំពង់ប្រាំង ឃុំកំពង់ប្រាំង ស្រុកពារាំង ខេត្តព្រៃវែង អស់រយៈពេលជាង២៥ឆ្នាំមកហើយនោះ បានឲ្យដឹងថា ពីមុនអ្នកបិតស្រាចិញ្ចឹមជ្រូកលក់មានចំនួនច្រើនណាស់ធ្វើឱ្យតម្លៃស្រាសលក់មិនបានថ្លៃនោះទេ លើសពីនេះចំណីជ្រូកឡើងថ្លៃ ឯសាច់ជ្រូកបែរជាចុះថោក ជាហេតុធ្វើឱ្យមុខរបរមួយនេះលែងមានប្រាក់ចំណេញ រហូតធ្វើឱ្យក្រុមអ្នកបិតស្រាចិញ្ចឹមជ្រូក ប្រមាណជា៩០ភាគរយបានបោះបង់មុខរបរនេះចោល ហើយងាកទៅចាប់យកមុខរបរថ្មីមកជំនួសវិញ ។
ប៉ុន្តែរឿងដែលនឹកស្មានមិនដល់នោះគឺនៅពេលដែលគ្រប់គ្នាបោះបង់មុខរបរនេះចោលអស់ បានធ្វើឱ្យតម្លៃស្រាសលក់បានថ្លៃជាងមុនដែលពីមុនស្រាសក្នុង១លីត្រលក់បានតម្លៃតែ៧ទៅ៨រយរៀលប៉ុណ្ណោះ ប៉ុន្តែពេលនេះលក់បាន១៥០០រៀល ។
លោក ហាន ហុង បានបញ្ជាក់ទៀតថា ក្នុង១ថ្ងៃគាត់បិតស្រាសបានពី១៣០ទៅ១៥០លីត្រដែលអាចរកប្រាក់ចំណេញបានពី៤ទៅ៥ម៉ឺនរៀល ព្រមទាំងបានបាយស្រាចិញ្ចឹមជ្រូកថែមទៀត ធ្វើឱ្យជីវភាពគ្រួសារគាត់ធូរធារច្រើនណាស់ ។
ទោះជាយ៉ាងណាក៏ដោយមន្ត្រីជំនាញកាំកុងត្រូលធ្លាប់បានជំរុញឱ្យក្រុមអ្នកប្រកបមុខរបរបិតស្រាសទាំងអស់ត្រូវប្រុងប្រយ័ត្នឱ្យបានខ្ពស់លើបញ្ហាអនាម័យទីតាំងផលិត និងគុណភាពស្រា ធ្វើយ៉ាងណាកុំឱ្យប៉ះពាល់ដល់សុខភាពអ្នកពិសា ជាពិសេសស្រាសដែលដាក់លក់ត្រូវដាក់អក្សរបញ្ជាក់ពីប្រភពដើម ឬអាស័យដ្ឋានផលិតឱ្យបានច្បាស់ ដើម្បីងាយស្រួលដល់មន្ត្រីជំនាញ និងសមត្ថកិច្ចស្រាវជ្រាវនៅពេលមានបញ្ហាកើតឡើងដោយសារស្រានេះ ៕
ចែករំលែកព័តមាននេះ