ខេត្តកែប ៖ តាមសេចក្តីរាយការណ៍ពីខេត្តកែបបានឲ្យដឹងថា កម្លាំងសមត្ថកិច្ចជំនាញជលផលបានចេញល្បាតនៅចំណុចតំបន់ដែលប្រជានេសាទខ្មែរបានរាយ ការណ៍ក៏បានប្រទះឃើញទូកនេសាទវៀតណាមមួយគ្រឿងដែលកំពុងធ្វើនេសាទខុសច្បាប់នៅចំណុចខាងលិចកោះអង្ក្រង ចូលក្នុងដែនទឹកសមុទ្រកម្ពុជាដោយប្រើឧបករណ៍ខុសច្បាប់(គ្រឿងឆក់) ហើយត្រូវបានកម្លាំងសមត្ថកិច្ចចម្រុះបង្ក្រាបបទល្មើសលើផ្ទៃសមុទ្រធ្វើការឃាត់ទូកនេសាទខុសច្បាប់នោះ កាលពីថ្ងៃទី១០ ខែមករា ឆ្នាំ២០១៨ នាំមកកាន់ស្នាក់ការខណ្ឌរដ្ឋបាលជលផលខេត្តកែប។ ប្រភពដដែលបានបន្តថា នៅក្នុងទូកនេសាទខុសច្បាប់របស់វៀតណាមខាងលើ មានមនុស្សបីនាក់ដែលមានឈ្មោះដូចខាងក្រោម៖ ១-ឈ្មោះ ឡុង រិទ្ធ ភេទប្រុស ២-ឈ្មោះ ឡុង ចង ភេទប្រុស ៣-ឈ្មោះឡុង អាយ ភេទប្រុស។
ទាំងបីនាក់ជាបងប្អូនបង្កើត មានទីលំនៅភូមិអាវសាវដាយ ស្រុកហាទៀង ខេត្តគៀងយ៉ាង។ ទាក់ទិននឹងជនសង្ស័យជនជាតិវៀតណាមបីនាក់ដែលបានរាយការណ៍ ពីកម្លាំងសមត្ថកិច្ចប្រាប់តែឈ្មោះ និងភេទប៉ុណ្ណោះ មិនបានប្រាប់អាយុប៉ុន្មាននោះទេ។ កោះសន្តិភាពបានភ្ជាប់ទូរសព្ទ័ទៅលោក គុច វីរៈ ប្រធានជលផលខេត្តកែប ដើម្បីសុំ សួរពីអាយុជនទាំងបីនាក់ ទូរសព្ទ័ចូលហើយតែគ្មានអ្នកលើក។ វត្ថុតាងដែលកម្លាំងសមត្ថកិច្ចរឹបអូសមាន៖ ទូកមួយគ្រឿង និងឧបករណ៍ឆក់១កំប្លេ។ បច្ចុប្បន្នមនុស្ស៣នាក់ទូកមួយគ្រឿង និងឧបករណ៍ឆក់ត្រូវបានយកទៅរក្សាទុកនៅខណ្ឌ រដ្ឋបាលជលផលខេត្តកែប ដើម្បីកសាងសំណុំរឿងបញ្ជូនទៅតុលាការចាត់ការតាមនីតិវិធី៕
ចែករំលែកព័តមាននេះ