ខេត្តពោធិ៍សាត់ ៖ ប្រជាពលរដ្ឋរងគ្រោះដោយភ្លើងឆេះផ្ទះ និងរងការប៉ះពាល់ចំនួន៤គ្រួសារនៅភូមិមាន់ចែ សង្កាត់ព្រៃញី ក្រុងពោធិ៍សាត់ បានទទួលអំណោយពីសាខាកាកបាទក្រហមកម្ពុជាខេត្ត ដើម្បីជាការជួយដោះទល់ជំហានដំបូង ។ អំណោយមនុស្សធម៌នេះត្រូវបាន…
ខេត្តពោធិ៍សាត់ ៖ ប្រជាពលរដ្ឋរងគ្រោះដោយភ្លើងឆេះផ្ទះ និងរងការប៉ះពាល់ចំនួន៤គ្រួសារនៅភូមិមាន់ចែ សង្កាត់ព្រៃញី ក្រុងពោធិ៍សាត់ បានទទួលអំណោយពីសាខាកាកបាទក្រហមកម្ពុជាខេត្ត ដើម្បីជាការជួយដោះទល់ជំហានដំបូង ។ អំណោយមនុស្សធម៌នេះត្រូវបាន លោក ខូយ រីដា អភិបាលរង នៃគណៈអភិបាលខេត្ត និងជាប្រធានគណៈកម្មាធិការសាខាកាកបាទក្រហមកម្ពុជាខេត្ត រួមជាមួយក្រុមការងារ នាំយកទៅចែកជូនដោយផ្ទាល់ដៃដល់ក្រុមគ្រួសារជនរងគ្រោះទាំងអស់ កាលពីនារសៀលថ្ងៃទី០៩ ខែមករា ឆ្នាំ២០១៨ ។
លោក ខូយ រីដា បានចូលរួមសម្ដែងការសោកស្ដាយនូវការបាត់បង់ផ្ទះសម្បែង និងទ្រព្យសម្បត្តិរបស់បងប្អូនប្រជាពលរដ្ឋទាំង៤គ្រួសារ ដែលបណ្ដាលមកពីអគ្គិភ័យឆាបឆេះទាំងស្រុង តែសំណាងល្អដែលមិនគ្រោះថ្នាក់ដល់អាយុជីវិតមនុស្ស ។ បន្ទាប់ពីទទួលបានព័ត៌មានសោកសៅនេះភ្លាម ក្រុមការងាររបស់សាខាកាកបាទក្រហមកម្ពុជាខេត្ត បានរៀបចំអំណោយយកមកផ្ដល់ជូនដល់ទីកន្លែងភ្លាម ដោយមិនបង្អង់យូរនោះទេ ។ ថ្វីត្បិតអំណោយនេះតិចតួចក៏ពិតមែន តែវាមានតម្លៃធំធេងណាស់សម្រាប់យើងដែលជួបបញ្ហា សបញ្ជាក់ពីការយកចិត្តទុកដាក់ និងទឹកចិត្តមនុស្សធម៌របស់ថ្នាក់ដឹកនាំ ពិសេសសម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ប្រធានកាកបាទក្រហមកម្ពុជា ។
ក្នុងនាមប្រធានគណកម្មាធិការសាខាកាកបាទក្រហមកម្ពុជា លោក ខូយ រីដា បានសំណូមពរឲ្យក្រុមគ្រួសារជនរងគ្រោះដោយភ្លើងឆេះផ្ទះទាំងអស់កុំអស់សង្ឃឹម ត្រូវខិតខំប្រឹងប្រែងប្រកបមុខរបររកទទួលទានទៅមុខទៀតដើម្បីស្ដារសេដ្ឋកិច្ចគ្រួសារឡើងវិញ ។ ជាមួយគ្នានេះលោកក៏បានអំពាវនាវដល់បងប្អូនប្រជាពលរដ្ឋទាំងអស់កុំមានការធ្វេសប្រហែសចំពោះភ្លើងចង្ក្រាន និងភ្លើងទៀនធូបជាដើម ព្រោះរដូវនេះជារដូវរំហើយ រីងស្ងួតហួតហែងអាចបង្កជាអគ្គិភ័យបាន ។
អំណោយផ្តល់ជូនក្នុងមួយគ្រួសារទទួលបានអង្ករ៥០គីឡូក្រាម មី១កេស ទឹកបរិសុទ្ធ១កេស មុង១ ភួយ១ ក្រម៉ា១ សារុង១ តង់១ កន្ទេល១ និងថវិកា២០ម៉ឺនរៀល ។ ដោយឡែក លោក អ៊ូ ឆៃ ប្រធានមន្ទីរប្រៃសណីយ៍ និងទូគមនាគមន៍ខេត្ត បានជួយឧបត្ថម្ភថវិកាមួយគ្រួសារចំនួន១០ម៉ឺនរៀល ។ លោកស្រី អៀង សុភាព បាននាំយកអំណោយរបស់សមាគមន៍នារីកម្ពុជា ដើម្បីសន្តិភាព និងអភិវឌ្ឍន៍សាខាខេត្តពោធិ៍សាត់បន្ថែមជូនមួយគ្រួសារ ថវិកា៥ម៉ឺនរៀល សារុង២ និងសម្ភារអនាម័យមាត់ធ្មេញមួយចំនួនទៀត ។
គួររំឭកថា វេលាម៉ោង២២និង៤៥នាទីយប់ កាលពីថ្ងៃទី០៨ ខែមករា ឆ្នាំ២០១៨ មានគ្រោះអគ្គិភ័យមួយបានកើតឡើងឆេះផ្ទះប្រេជាពលរដ្ឋឈ្មោះ នួន មុន្នី ភេទប្រុស អាយុ៦០ឆ្នាំ ប្រពន្ធឈ្មោះ យឹម ស៊ីណាត អាយុ៤៧ឆ្នាំ នៅភូមិមាន់ចែ សង្កាត់ព្រៃញី ក្រុងពោធិ៍សាត់ ខណៈពេលម្ចាស់មិននៅផ្ទះ ។ អគ្គិភ័យនេះបានរាលឆេះផ្ទះអ្នកជិតខាងចំនួន៣ខ្នងទៀត ទើបរថយន្ដពន្លត់អគ្គិភ័យរបស់ស្នងការដ្ឋាននគរបាលខេត្ត មកបាញ់ទឹកពន្លត់ទាន់មិនរាលបន្ត ៕
ចែករំលែកព័តមាននេះ