ខេត្តប៉ៃលិន ៖ កាលពីព្រឹកថ្ងៃទី១០ មករា អាជ្ញាធរមានការរៀបចំពិធីចុះសួរសុខទុក្ខដល់អ្នកទោសក្នុងពន្ធនាគារខេត្តប៉ៃលិនចំនួន២៣៦នាក់ ក្នុងនោះស្រី២៤នាក់ ដឹកនាំដោយលោក អាន សេរីវុធ ប្រធានអង្គការសម្ព័ន្ធមេត្រីភាពពន្ធនាគារកម្ពុជា ។ ការចុះសួរសុខទុក្ខនេះ ស្ថិតនៅក្នុងភូមិទឹកចេញ ឃុំស្ទឹងកាច់ ស្រុកសាលាក្រៅ ដោយមានការអញ្ជើញចូលរួមពីលោក លីម វាសនា ប្រធានពន្ធនាគារលោក ប៊ុត សុធា ប្រធានសមាគមគ្រីស្ទានខេត្តប៉ៃលិនព្រមទាំងសមាជិកសមាជិកាអង្គការ និងមន្ត្រីពន្ធនាគារជាច្រើននាក់ផងដែរ ។
លោក លីម វាសនា ប្រធានពន្ធនាគារខេត្តប៉ៃលិនបានមានមតិស្វាគមន៍ និងធ្វើរបាយការណ៍ឱ្យដឹងថា ផ្ទៃដីពន្ធនាគារខេត្តប៉ៃលិនមានប្រវែង៣០០០០ម៉ែត្រក្រឡាក្នុងនោះផ្ទៃដីដែលត្រូវសាងសង់ពន្ធនាគារប្រវែង៧០ម៉ត្រគុណ៨០ម៉ែត្រ ដែលបានសាងសង់រួចរាល់ជាស្ថាពរកាលពីថ្ងៃទី១២ ខែកញ្ញា ឆ្នាំ២០១៤ ក្នុងនោះអគារឃុំឃាំងចំនួន២អគារមានចំនួន៨បន្ទប់ ធ្វើអំពីថ្មប្រក់ក្បឿង រួមជាមួយបណ្តាល័យ១អគារ ឧបត្ថម្ភដោយអង្គការស៊ីប៉ា (SIPAR) ។ ថ្ងៃនេះខាងពន្ធនាគារមានសេចក្តីសោមនស្សរីករាយក្រៃលែងដែលបានទទួលអំណោយជាច្រើនពីអង្គការសម្ព័ន្ធមេត្រីភាពពន្ធនាគារកម្ពុជា ដែលពីមុនមិនធ្លាប់មាននៅក្នុងពន្ធនាគារនេះទេ ។ អង្គការនេះបានឧបត្ថម្ភដល់ពន្ធនាគារជាច្រើនដូចជា ទី១-រោងបណ្តុះបណ្តាលវិជ្ជាជីវៈ និងការងារ ទំហំ៦ម៉ែត្រគុណ១៨ម៉ែត្រ, ទី២-បន្ទប់ទឹកមួយទំហំ១,៤ម៉ែត្រគុណ១,៤ម៉ែត្រ, ទី៣-រោងកាត់សក់មួយទំហំ៣,៥ម៉ែត្រ គុណ៣ម៉ែត្រផងដែរ ។
លោកបញ្ជាក់ថា ជនជាប់ឃុំជាក់ស្តែងក្នុងពន្ធនាគារមានចំនួន២៣៦នាក់ក្នុងនោះមានស្រីចំនួន២៤នាក់ដោយជនត្រូវចោទចំនួន៥៧នាក់ ស្រី៩នាក់ ជនជាប់ចោទចំនួន៤៤នាក់ ស្រី០៥នាក់ ពិរុទ្ធជន៨១នាក់ ស្រី១០នាក់ ទណ្ឌិតចំនួន៥៤នាក់ បទល្មើសគ្រឿងញៀនចំនួន១២២នាក់ ស្រី១៨នាក់ ។ ចំពោះជនជាប់ចោទដែលត្រូវរៀនវគ្គផ្សេងៗ មាន វគ្គសំណង់ស៊ីវិលចំនួន២៣នាក់ (ប្រុស) វគ្គសំអាងការចំនួន១០នាក់ ស្រី៧នាក់ វគ្គកសិកម្មចិញ្ចឹមសត្វ និងដាំបន្លែចំនួន២៧នាក់ ស្រី៧នាក់ ដែលបង្រៀនដោយបុគ្គលិកមន្ទីរបណ្តុះបណ្តាលវិជ្ជាជីវៈ និងការងារខេត្តតែម្តង ។
ចំណែកលោក អាន សេរីវុធ ប្រធានអង្គការសម្ព័ន្ធមេត្រីពន្ធនាគារខេត្តប៉ៃលិនបានលើកឡើងថា ខាងអង្គការនឹងបន្តសហការជាមួយនឹងប្រធានពន្ធនាគារខេត្តបន្តទៀតដើម្បីជួយទំនុកបម្រុងដល់ជនជាប់ឃុំ និងប្រពន្ធកូនរស់នៅឯផ្ទះ ដែលស្ថិតនៅក្នុងជីវភាពក្រីក្រ ដើម្បីឱ្យមានឱកាសចូលទៅសួរសុខទុក្ខដល់ប្តីកំពុងជាប់ឃុំផងដែរ ។ លោកបន្តទៀតថា ខាងអង្គការនៅតែរៀបចំឱ្យមានការ រៀនជំនាញច្បាស់លាស់ចេញពីពន្ធនាគារ ហើយនឹងបន្ទាប់ពីចេញទៅខាងក្រៅនឹងបន្តតាមទិញសម្ភារដើម្បីបើកមុខរបរចិញ្ចឹមជីវិតជួបជុំគ្រួសារថែមទៀត ៕
ចែករំលែកព័តមាននេះ