ខេត្តប៉ៃលិន ៖ ប្រជាពលរដ្ឋចំនួន៣គ្រួសារទទួលរងគ្រោះដោយសារភ្លើងឆេះខ្ទេចខ្ទីអស់គ្មានសល់ ខណៈពួកគេចេញទៅធ្វើការស៊ីឈ្នួលកាច់ពោត និងដកដំឡូងមីឱ្យថៅកែនៅឆ្ងាយពីផ្ទះ ដោយចាក់សោទុកចោល លុះត្រលប់មកវិញ ស្រាប់តែឆេះក្លាយទៅជាផេះផងបាត់ទៅហើយ ក៏នាំគ្នាដាក់ពាក្យបណ្តឹងទៅប៉ុស្តិ៍នគរបាលអូរតាវ៉ៅតែម្តង ។…
ខេត្តប៉ៃលិន ៖ ប្រជាពលរដ្ឋចំនួន៣គ្រួសារទទួលរងគ្រោះដោយសារភ្លើងឆេះខ្ទេចខ្ទីអស់គ្មានសល់ ខណៈពួកគេចេញទៅធ្វើការស៊ីឈ្នួលកាច់ពោត និងដកដំឡូងមីឱ្យថៅកែនៅឆ្ងាយពីផ្ទះ ដោយចាក់សោទុកចោល លុះត្រលប់មកវិញ ស្រាប់តែឆេះក្លាយទៅជាផេះផងបាត់ទៅហើយ ក៏នាំគ្នាដាក់ពាក្យបណ្តឹងទៅប៉ុស្តិ៍នគរបាលអូរតាវ៉ៅតែម្តង ។
ហេតុការណ៍ភ្លើងឆេះផ្ទះប្រជាពលរដ្ឋ៣គ្រួសារនេះ បានកើតឡើងកាលពីវេលាម៉ោង០៧និង០០នាទីយប់ ថ្ងៃទី០៩ ខែមករា ឆ្នាំ២០១៨ ស្ថិតនៅចំណុចលើភ្នំ ក្នុងភូមិដីក្រហម សង្កាត់អូរតាវ៉ៅ ក្រុងប៉ៃលិន ។
ប្រភពព័ត៌មានពីនគរបាលបានឱ្យដឹងថា កាលពីវេលាម៉ោង០៣និង៣០នាទីរសៀល ថ្ងៃទី១០ ខែមករា ឆ្នាំ២០១៨ នគរបាលប៉ុស្តិ៍រដ្ឋបាលសង្កាត់អូរតាវ៉ៅ បានទទួលពាក្យបណ្តឹងពីប្រជាពលរដ្ឋម្នាក់ឈ្មោះ រឿម រិទ្ធ ភេទប្រុស អាយុ៤៥ឆ្នាំ ជាកសិករ រស់នៅភូមិដីក្រហម សង្កាត់អូរតាវ៉ៅ ក្រុងប៉ៃលិន ខេត្តប៉ៃលិន ក្នុងករណីភ្លឺងឆេះផ្ទះ ដោយសង្ស័យថា មានអ្នកលួចដុតផ្ទះរបស់ខ្លួន បណ្ដាលឲ្យឆេះរាលដាលអស់ផ្ទះចំនួន៣ខ្នង ។ ប្រភពបន្តទៀតថា មុនពេលកើតហេតុ គ្រួសារទាំង៣ខាងលើបានធ្វើដំណើរទៅស៊ីឈ្នួលគេនៅឯចម្ការឆ្ងាយពីផ្ទះ ដោយចាក់សោទុកចោល លុះដល់ពេលល្ងាចត្រលប់មកផ្ទះវិញ ស្រាប់តែឃើញផ្ទះឆេះអស់បាត់ទៅហើយ ។
ទើបក្រោយមកនៅថ្ងៃបន្ទាប់ជនរងគ្រោះម្នាក់ បានទៅដាក់ពាក្យឯប៉ុស្តិ៍នគរបាលដើម្បីស្រាវជ្រាវរកជនសង្ស័យ ដែលលួចដុតផ្ទះរបស់ខ្លួន ។
ពាក់ព័ន្ធនឹងករណីឆេះផ្ទះខាងលើនេះ បានខូចខាតអស់សម្ភារគិតជាថវិការចំនួនប្រមាណជាង១៨០០ដុល្លារ ដែលសមត្ថកិច្ចនគរបាលក៏បានចុះទៅធ្វើការត្រួតពិនិត្យ និងរៀបចំដោះស្រាយជូនពួក គេទាំងអស់ខាងលើផងដែរ ៕
ចែករំលែកព័តមាននេះ