ខេត្តប៉ៃលិន ៖ ជនរងគ្រោះ២នាក់ ត្រូវបានគេដឹកយកទៅសង្គ្រោះនៅមន្ទីរពេទ្យបង្អែកខេត្ត ខណៈបើកបរម៉ូតូពេលយប់ក្នុងល្បឿនលឿនច្រាសទិសគ្នា ដោយមិនមើលឆ្វេងស្តាំជ្រុលទៅបុកគ្នារងរបួសធ្ងន់ស្រាលទាំងពីរនាក់តែម្តង ។ ហេតុការណ៍ខាងលើនេះបានកើតឡើងកាលពីវេលាម៉ោង៨ និង១០នាទីយប់ថ្ងៃទី០៩ ខែមករា ឆ្នាំ២០១៨ ស្ថិតនៅត្រង់ចំនុចភូមិអូរឈើក្រំ ឃុំស្ទឹងកាច់ ស្រុកសាលាក្រៅ ខេត្តប៉ៃលិន ។
ប្រភពព័ត៌មានពីកន្លែងកើតហេតុបានឱ្យដឹងថា មានមនុស្សរបួសធ្ងន់ម្នាក់រងរបួសស្រាលម្នាក់ដែរ និងខូចខាតម៉ូតូចំនួន២គ្រឿង ។ ប្រភពបន្តទៀតថា អ្នកបើកបរម៉ូតូឈ្មោះញឹម រ៉ង ភេទប្រុស អាយុ២៥ឆ្នាំ រស់នៅភូមិអូរឈើក្រំ ឃុំស្ទឹងកាច់ ស្រុកសាលាក្រៅ ខេត្តប៉ៃលិន រងរបួសធ្ងន់សន្លប់នៅនឹងកន្លែង ដោយបើកបរម៉ូតូ ពណ៌ខ្មៅ ពាក់ស្លាកលេខប៉ៃលិន ១-៧៨០៣ ខូចខាតយ៉ាងដំណំ ។
ចំណែកអ្នកបើកបរម៉ូតូ០១គ្រឿងទៀតមានឈ្មោះ កែប អាយុ២២ឆ្នាំ រស់នៅក្នុងភូមិអូរឈើក្រំ ឃុំស្ទឹងកាច់ ស្រុកសាលាក្រៅ ខេត្តប៉ៃលិនដូចគ្នា រងរបួសស្រាល ដោយបើកបរម៉ូតូ ពណ៌ខ្មៅ ពាក់ស្លាកលេខបាត់ដំបង ១N-៥៨៣៩ រងការខូចខាតធ្ងន់ធ្ងរដែរ ។ មូលហេតុដែលបណ្តាលឱ្យបុកគ្នារងរបួសធ្ងន់ស្រាលបែបនេះ មកពីកត្តាមនុស្សបើកបរមិនប្រកាន់ស្តាំ ។
ក្រោយពេលកើតហេតុ បន្ទាប់ពីនគរបាលបានវាស់វែងរួចក៏ស្ទូចយកម៉ូតូទាំង២គ្រឿង ទៅរក្សាទុកនៅការិយាល័យនគរបាលចរាចរណ៍ខេត្តប៉ៃលិន រង់ចាំភាគីទាំងសងខាងចូលដោះស្រាយ ៕
ចែករំលែកព័តមាននេះ