ខេត្តកណ្តាល ៖ កម្លាំងព្រហ្មទណ្ឌកំរិតស្រាលនៃស្នងការដ្ឋាននគរបាលខេត្តកណ្តាល បានបញ្ជូនថៅកែហាងម៉ាស្សា(កោសជប់) និងកូនចៅពីនាក់មកតុលាការនៅព្រឹកថ្ងៃទី០៩ ខែមករា ឆ្នាំ២០១៨ ពាក់ពន្ធ័រឿងកាប់ភ្ញៀវឲ្យរបួសធ្ងន់ នៅចិញ្ចើមផ្លូវជាតិលេខ០៤ ភូមិចុងបង្គោល…
ខេត្តកណ្តាល ៖ កម្លាំងព្រហ្មទណ្ឌកំរិតស្រាលនៃស្នងការដ្ឋាននគរបាលខេត្តកណ្តាល បានបញ្ជូនថៅកែហាងម៉ាស្សា(កោសជប់) និងកូនចៅពីនាក់មកតុលាការនៅព្រឹកថ្ងៃទី០៩ ខែមករា ឆ្នាំ២០១៨ ពាក់ពន្ធ័រឿងកាប់ភ្ញៀវឲ្យរបួសធ្ងន់ នៅចិញ្ចើមផ្លូវជាតិលេខ០៤ ភូមិចុងបង្គោល ឃុំបែកចាន ស្រុកអង្គស្នួល ខេត្តកណ្តាល ។
ជនសង្ស័យទាំងបីនាក់ ទី១-ឈ្មោះរស់ ចំរ៉ុង ហៅញ៉ាញ់ ភេទប្រុស អាយុ២៣ឆ្នាំ ជនជាតិខ្មែរ មុខរបរជាងជួសជួលម៉ូតូ ស្នាក់នៅភូមិស្វាយជ្រុំ ឃុំបែកចាន ស្រុកអង្គស្នួល ខេត្តកណ្តាល ទី២- ឈ្មោះម៉ាច និត ភេទប្រុស អាយុ២៣ឆ្នាំ ជនជាតិខ្មែរ មុខរបរជាងជួសជុលម៉ូតូ នៅភូមិថ្មី ឃុំបែកចាន ស្រុកអង្គស្នួល ខេត្តកណ្តាល និងទី៣- ឈ្មោះតាត ចាន់ធឿន ភេទប្រុស អាយុ៣៨ឆ្នាំ ជនជាតិខ្មែរ មុខរបរគ្រប់គ្រងផ្ទះម៉ាស្សាកោសជប់ យីហោ៣៣៣ នៅភូមិព្រៃសំរោង ឃុំបែកចាន ស្រុកអង្គស្នួល ខេត្តកណ្តាល ។ ជនរងគ្រោះឈ្មោះនួន សុជា ភេទប្រុស អាយុ៣៥ឆ្នាំ ជនជាតិខ្មែរ មុខរបរបើកបរ នៅភូមិស្វាយជ្រុំ ឃុំបែកចាន ស្រុកអង្គស្នួល ខេត្តកណ្តាល(រងរបួសដេរ៤០ថ្នេរ) ។
សូមជម្រាបថា លោកវរសេនីយ៍មាន សំណាង អធិការស្រុកអង្គស្នួលបានឲ្យដឹងថា ថ្ងៃទី០៨ ខែមករា ឆ្នាំ២០១៨ វេលាម៉ោង០១និង១៥នាទីរំលងអធ្រាត្រ ជនរងគ្រោះបានឈ្លោះគ្នាជាមួយស្រីម៉ាស្សាម្នាក់ឈ្មោះតុង ចំរើន ហៅយូរី ភេទស្រី អាយុ២៨ឆ្នាំ ហើយជនរងគ្រោះបានទះលើនាង មួយកំផ្លៀង ហើយដើរមកខាងក្រៅ ទើបឈ្មោះតាត ចាន់ធឿន ជាអ្នកគ្រប់គ្រងដើរមកសួរថា អាអូនមានរឿងអី បានជាវាយមនុស្សស្រី ហើយកៀកករឲ្យចូលខាងក្នុងជជែកគ្នា ។ ពេលនោះជនរងគ្រោះមិនព្រមចូល ដោយច្រានខ្លួនយ៉ាងខ្លាំងទើបខ្លួនខឹង វាយជនរងគ្រោះមួយដៃ ។ ពេលនោះជនរងគ្រោះទៅបាត់ប្រហែលមួយម៉ោងក្រោយមកជនរងគ្រោះត្រឡប់មកវិញ ។
តាមចម្លើយរបស់ឈ្មោះតាត ចាន់ធឿនបានឆ្លើយថា ពេលជនរងគ្រោះត្រឡប់មកវិញបានយកដែកថ្នាំងអំពៅមកវាយលើខ្លួនជាច្រើន ដែលបណ្តាលឲ្យធ្លាក់ចូលប្រឡាយ ហើយត្រូវចំខ្នង និងដៃខាងធ្វេង ។ តាមការបំភ្លឺជនរងគ្រោះបានឆ្លើយថា ខ្លួនត្រឡប់មកវិញ ហើយយកដែកថ្នាំអំពៅមកតាម បន្ទាប់មកបានវាយទៅលើឈ្មោះតាត ចាន់ធឿនមែន តែវាយមិនត្រូវទេ តែឈ្មោះតាត ចាន់ធឿននេះភ័យថយក្រោយធ្លាក់ប្រឡាយទឹកទេ ។ តាមចម្លើយសារភាពឈ្មោះរស់ ចំរ៉ុង ហៅញ៉ាញ់បានសារភាពថា ខ្លួនបានយកដាវមកកាប់លើជនរងគ្រោះ១ដាវ ហើយបោះដាវនោះចោល ។ តាមចម្លើយសារភាពរបស់ម៉ាច និតភេទប្រុស អាយុ២៣ឆ្នាំ បានសារភាពថា ខ្លួនបានកាន់ដែកទីបជ្រុងមែន តែមិនបានវាយទេ ៕
ជនសង្ស័យទាំង៣នាក់ កំពុងស្ថិតក្រោមការសាកសួររបស់លោក ឯក ស៊ុនរស្មី ព្រះរាជអាជ្ញារងអមសាលាដំបូងខេត្តកណ្តាល ៕
ចែករំលែកព័តមាននេះ