ខេត្តពោធិ៍សាត់ ៖ បុរស០២នាក់បានរងរបួសដោយគ្រោះថ្នាក់ចរាចរណ៍ដែលបង្កឡើងរវាងរថយន្តស៊េរីទំនើប និងរថយន្តធុនធំ ខណៈពេលកំពុងធ្វើចរាចរណ៍បញ្ច្រាសទិសគ្នា ។ គ្រោះថ្នាក់ចរាចរណ៍នេះបានកើតឡើងកាលពីវេលាម៉ោងរំលងអធ្រាត្រឈានចូលថ្ងៃទី០៨ ខែមករា ឆ្នាំ ២០១៨ លើកំណាត់ផ្លូវជាតិលេខ៥ ទល់មុខស្នាក់ការសាខាគយ និងរដ្ឋាករពោធិ៍សាត់ ស្ថិតក្នុងភូមិត្នោតទ្រេត សង្កាត់ផ្ទះព្រៃ ក្រុង-ខេត្តពោធិ៍សាត់ ។
អ្នកឃើញហេតុការណ៍នៅកន្លែងកើតហេតុនិយាយថា ហេតុការណ៍គ្រោះថ្នាក់ចរាចរណ៍នេះបង្កឡើងដោយអ្នកបើកបររថយន្ត ពណ៌សលាយផ្ទៃមេឃ ស្លាកលេខភ្នំពេញ ៣D-២៥៨២ ដែលមានឈ្មោះញាញ់(រត់គេចបាត់) ចរាចរណ៍មិនប្រកាន់ស្ដាំ ក្នុងទិសដៅពីលិចទៅកើត លុះដល់ចំណុចកើតហេតុបានបុកជាមួយរថយន្តសេរីទំនើបពណ៌ស ស្លាកលេខ ភ្នំពេញ២AP-៦៨៨៦៥ កំពុងធ្វើដំណើរច្រាសទិសគ្នា បណ្ដាលឲ្យភាគីរថយន្តទំនើបរងរបួសចំនួន០២នាក់ ។ ជនរងគ្រោះខាងរថយន្តទំនើបអ្នកបើកបរឈ្មោះម៉ៅ មនោ ភេទប្រុស អាយុ២៧ឆ្នាំ ជនជាតិខ្មែរ រស់នៅភូមិរ៉ា សង្កាត់ផ្ទះព្រៃ ក្រុងពោធិ៍សាត់(របួសស្រាល) និងអ្នករួមដំណើរឈ្មោះពឹង យូហួត ភេទប្រុស អាយុ២៩ឆ្នាំ ជនជាតិខ្មែរ មានទីលំភូមិសង្កាត់ជាមួយគ្នា(របួសធ្ងន់) ជនរងរបួសបានបញ្ជូនទៅសង្គ្រោះភ្លាមៗនៅមន្ទីរពេទ្យបង្អែកខេត្តពោធិ៍សាត់ ។
រថយន្តទាំង០២គ្រឿង បានយកទៅរក្សាទុកជាបណ្ដោះអាសន្ន នៅស្នងការដ្ឋាននគរបាលក្រុងពោធិ៍សាត់ ដើម្បីរង់ចាំដោះស្រាយទៅតាមច្បាប់ចរាចរណ៍ផ្លូវគោក ៕
ចែករំលែកព័តមាននេះ