រាជធានីភ្នំពេញ ៖ មន្ត្រីក្រសួងរៀបចំដែនដី នគរូបនីយកម្ម និងសំណង់ ថ្លែងថា បច្ចុប្បន្ន កម្ពុជាកំពុងបោះជំហានទៅមុខយ៉ាងស្វាហាប់លើមាគ៌ាអភិវឌ្ឍន៍ឆ្ពោះទៅរកអនាគតកាន់តែប្រសើរឡើង ប្រកបដោយជំនឿទុកចិត្តយ៉ាងមុតមាំបំផុត ។…
រាជធានីភ្នំពេញ ៖ មន្ត្រីក្រសួងរៀបចំដែនដី នគរូបនីយកម្ម និងសំណង់ ថ្លែងថា បច្ចុប្បន្ន
កម្ពុជាកំពុងបោះជំហានទៅមុខយ៉ាងស្វាហាប់លើមាគ៌ាអភិវឌ្ឍន៍ឆ្ពោះទៅរកអនាគតកាន់តែប្រសើរឡើង ប្រកបដោយជំនឿទុកចិត្តយ៉ាងមុតមាំបំផុត ។ ជីវភាពប្រជាជន កាន់តែមានការប្រែប្រួលរីកចម្រើនទៅមុខជាបន្តបន្ទាប់ កិត្យានុភាពជាតិនៅលើឆាកអន្តរជាតិកាន់តែត្រូវបានលើកកម្ពស់ឥតឈប់ឈរ ។
ជាក់ស្តែង ក្នុងរយៈពេលប៉ុន្មានឆ្នាំចុងក្រោយនេះ ការសាងសង់សំណង់ហេដ្ឋារចនាសម្ព័ន្ធមានការរីកចម្រើន និងកើនឡើងគួរឲ្យកត់សម្គាល់ ជាពិសេសនៅរាជធានីភ្នំពេញ ដែលការកើនឡើងនេះ ដោយសារកម្ពុជាយើងមានភាពសុខសាន្ត ធ្វើឲ្យអ្នកវិនិយោគមានភាពកក់ក្តៅ និងជឿទុក ចិត្តចំពោះរាជរដ្ឋាភិបាល ។
លោក បេ បូរិន្ទ ប្រធានការិយាល័យសំណង់នៃមន្ទីររៀបចំដែនដី នគរូបនីយកម្មសំណង់ និងសុរិយោដីរាជធានីភ្នំពេញ បានឲ្យដឹងថា សំណង់ដែលបានសាងសង់រួចនិងកំពុងសាងសង់ក្នុងរាជធានីភ្នំពេញមានជាង២ពាន់គម្រោង ក្នុងនោះសំណង់ជាង១ពាន់គម្រោងជាសំណង់លំនៅឋាន សំណង់ពាណិជ្ជកម្ម សំណង់ឧស្សាហកម្ម និងសំណង់ទេសចរណ៍ ។ សំណង់អគារខ្ពស់ចាប់ពី៥ជាន់រហូតដល់ជាង៤០ជាន់មានជិត១ពាន់អគារ ។
លោកបន្តថា ក្នុងឆ្នាំ២០១៧ សំណង់ដែលមានច្បាប់អនុញ្ញាតមានចំនួន១.១០១គម្រោង ធៀបទៅនឹងឆ្នាំ២០១៦ ដែលមាន៩០១គម្រោងគឺកើន២០០គម្រោង ។ សំណង់គ្មានលិខិតអនុញ្ញាតចំនួន២១៧ និងមានសំណង់ខុសប្លង់មួយចំនួនទៀត ដែលបានចេញលិខិតទប់ស្កាត់ ។
លោក បេ បូរិន្ទ បានឲ្យដឹងទៀតថា ចំណែកសំណង់អគារខ្ពស់ៗនៅរាជធានីភ្នំពេញមានកម្ពស់ចាប់ពី៥ជាន់រហូតដល់ជាង៤០ជាន់ គិតចាប់ពីឆ្នាំ២០០៥ ដល់ឆ្នាំ២០១៧ មានចំនួន៩៧៩អគារ ដែលបានសាងសង់រួច និងកំពុងសាងសង់ គឺកើនលើសឆ្នាំ២០១៦ចំនួន១៨៨អគារ ។ ក្នុងនោះ អគារមានកម្ពស់ចាប់ពី៥ជាន់ដល់៩ជាន់ មាន៥៧៩អគារ ចាប់ពី១០ជាន់ដល់១៩ជាន់ មាន២៩០អគារ ចាប់ពី២០ជាន់ដល់២៩ជាន់ មាន៧០អគារ ចាប់ពី៣០ជាន់ ដល់៣៩ជាន់មាន២៩អគារ និងចាប់ពី៤០ជាន់ឡើងទៅមាន១១អគារ ។ ចំណែកសំណង់បុរី មានចំនួន១៨៨បុរី ។
លោកប្រធានការិយាល័យបានឲ្យដឹងទៀតថា ក្នុងចំណោមសំណង់ជាង១ពាន់ទីតាំងខាងលើនេះ មានសំណង់មួយចំនួនសុំច្បាប់ត្រឹមខណ្ឌ ត្រឹមរដ្ឋបាលរាជធានីភ្នំពេញ និងសំណង់មួយចំនួនទៀតត្រូវសុំច្បាប់ដល់ក្រសួងរៀបចំដែនដីតែម្តង ដោយគិតទៅតាមទំហំម៉ែត្រការ៉េ ដែលកំណត់ដោយច្បាប់ ។ គម្រោងសាងសង់ដែលសុំដល់ថ្នាក់ក្រសួងមានការថយចុះ ទាំងចំនួនគម្រោង និងទុនវិនិយោគ ចំណែកឯសំណង់ដែលសុំត្រឹមថ្នាក់ខណ្ឌ និងក្រុង មានការកើនឡើង បើប្រៀបធៀបទៅនឹងឆ្នាំ២០១៦កន្លងមក ។
ក្នុងចំណោមសំណង់ចំនួន១.១០១គម្រោងនោះ ចំណាយថវិកាសរុប១.៨៩២.៤០២.៧០០ដុល្លាសហរដ្ឋអាមេរិក ដែលសំណង់មួយចំនួនត្រួវសុំច្បាប់ត្រឹមខណ្ឌ-ស្រុក រាជធានីភ្នំពេញ-ខេត្ត និងសំណង់មួយចំនួនទៀតត្រូវសុំច្បាប់ដល់ក្រសួងរៀបចំដែនដីតែម្តង គឺគិតទៅតាមទំហំម៉ែត្រការ៉េ ដែលបានកំណត់ដោយច្បាប់។
ក្នុងនោះ មានសំណង់លំនៅឋានរបស់ប្រជាពលរដ្ឋចំនួន១.០០៤គម្រោងទុនវិនិយោគអស់ចំនួន១.០៤៩.៩៥៦.៩៥០ដុល្លាសហរដ្ឋអាមេរិក ។ សំណង់ពាណិជ្ជកម្មមាន៧៩គម្រោងចំណាយទុនវិនិយោគចំនួន៧០៣.០៩៤.៧០០ដុល្លាសហរដ្ឋអាមេរិក សំណង់ឧស្សាហកម្មមាន ៣គម្រោង ប្រើទុនវិនិយោគ១២.៧១៣.៣០០ដុល្លារសហរដ្ឋអាមេរិក។ សំណង់ទេសចរណ៍មាន១៥គម្រោង ប្រើទុនវិនិយោគអស់ចំនួន១២៧.៦៣៧.៧៥០ដុល្លាសហរដ្ឋអាមេរិក ។
ចំពោះការរីកចម្រើនខាងវិស័យសំណង់នេះ មានប្រជាពលរដ្ឋជាច្រើនជាពិសេសប្រជា
ពលរដ្ឋខ្មែររស់នៅក្រៅប្រទេស នៅពេលពួកគាត់មកលេងស្រុកកំណើតវិញ តែងមានការភ្ញាក់ផ្អើលនិងថ្លែងនូវការកោតសរសើរយ៉ាងខ្លាំង។ ពួកគាត់និយាយថា ប្រទេសកម្ពុជាយើងពិតជាមានការរីកចម្រើននឹកស្មានមិនដល់ ដែលក្នុងរយៈពេលដ៏ខ្លីប៉ុណ្ណោះ ផ្តើមចេញពីចំណុចសូន្យក្រោមគំនរផេះផង់មានតែឈាមនិងទឹកភ្នែក ប៉ុន្តែកម្ពុជា បានក្រោកឈរដោយខ្លួនឯង ខិតខំនិងពុះពារគ្រប់ឧបសគ្គ ក្នុងការកសាងនិងអភិវឌ្ឃន៍ប្រទេសជាតិផង ។ តាមរយៈនយោបាយឈ្នះ-ឈ្នះ ធ្វើឲ្យខ្មែររួបរួមជាតិតែមួយ និងឈានទៅដល់ការកសាងប្រទេសជាតិឲ្យរីកចម្រើនរុងរឿងរហូតមកដល់ពេលនេះ ។
សមិទ្ធផលដែលយើងមានក្នុងពេលបច្ចុប្បន្ននេះ គឺជាសមិទ្ធផលដែលកើតឡើងក្រោយថ្ងៃរំដោះ៧មករា ឆ្នាំ១៩៧៩ ដែលជាស្នាដៃយ៉ាងធំធេងពិតប្រាកដមិនអាចប្រកែកបានរបស់គណបក្សប្រជាជនកម្ពុជា ។ ជាក់ស្តែង សំណង់អគារតូចធំទាបខ្ពស់ បាននិងកំពុងកើតឡើងរីកដូចផ្សិត ប្រព័ន្ធហេដ្ឋារចនាសម្ព័ន្ធរូបវន្តនានា មានស្ពានឆ្លងទន្លេ ស្ពានអាកាស ផ្លូវក្រោមដី ប្រព័ន្ធផ្លូវថ្នល់ សួនច្បារជាដើម គឺមិនចាញ់ប្រទេសជឿនលឿននៅលើពិភពលោកឡើយ ៕
ចែករំលែកព័តមាននេះ