ខេត្តកណ្តាល ៖ លោកឧត្តមសេនីយ៍ត្រីឈឿន សុចិត្រ ស្នងការរងនគរបាលខេត្តកណ្តាល ទទួលផែនគ្រឿងញៀនថ្លែងឱ្យដឹងនៅព្រឹកថ្ងៃទី០៨ ខែមករា ឆ្នាំ២០១៨ ថា ប៉ូលិសការិយាល័យប្រឆាំងការជួញដូរគ្រឿងញៀននៃស្នងការដ្ឋាននគរបាលខេត្តកណ្តាល ដែលធ្វេសប្រហែលធ្វើឱ្យជនត្រូវចោទម្នាក់ពាក់ព័ន្ធករណីជួញដូរគ្រឿងញៀន ដោះខ្នោះដៃដោយខ្លួនឯងរត់គេចខ្លួនពីតុលាការខេត្តកណ្តាល និងត្រូវដាក់ពិន័យតាមកងកម្លាំង ។
លោកបញ្ជាក់ថា លោកបានធ្វើរបាយការណ៍សុំគោលការដាក់ជូនលោកស្នងការ ដើម្បីអនុវត្តវិន័យកងកម្លាំងនគរបាលជាតិ ។ ពេលនេះសមត្ថកិច្ចកំពុងស្វែងរកចាប់ខ្លួនជនត្រូវចោទមកវិញ ។ ករណីនេះត្រូវបានមជ្ឈដ្ឋានជាច្រើនរិះគន់យ៉ាងខ្លាំងក្លា អំពីការធ្វេសប្រហែលរបស់ប៉ូលិសការិយាល័យប្រឆាំងការជួញដូរគ្រឿងញៀន នៃស្នងការដ្ឋាននគរបាលខេត្តកណ្តាល ។
មន្ត្រីតុលាការ ថ្លែងថា ពេលនេះតុលាការចេញដីកាបង្គាប់ឱ្យចាប់ខ្លួនមកវិញហើយ ។ មន្ត្រីតុលាការទើបបង្ហើបឱ្យដឹងថា ជនសង្ស័យពីរនាក់ប្តីប្រពន្ធពាក់ព័ន្ធករណីជួញដូរគ្រឿងញៀន ត្រូវបាននគរបាលការិយាល័យប្រឆាំងជួញដូរគ្រឿងញៀនខេត្តកណ្តាល បញ្ជូនមកអយ្យការអមសាលាដំបូងខេត្តកណ្តាល កាលពីថ្ងៃទី៣១ ខែធ្នូ ឆ្នាំ២០១៧ ដើម្បីចាត់ការតាមច្បាប់ ។
នគរបាលទាំងនេះស្លៀកពាក់ឯកសណ្ឋានស៊ីវិល ដោយទំនងសំអាងថា ជាថ្ងៃអាទិត្យ ។ ក្រោយការសាកសួរលោក ហេង ផេង ព្រះរាជអាជ្ញារងសម្រេចចោទប្រកាន់ពីរនាក់ប្តីប្រពន្ធនេះ ពីបទជួញដូរដោយខុសច្បាប់នូវសារធាតុញៀន រួចបញ្ជូនជនត្រូវចោទ និងសំណុំរឿងទៅចៅក្រមស៊ើបសួរចាត់ការបន្តតាមនីតិវិធី ។ លោកងួន វុទ្ធី ជាចៅក្រមស៊ើបសួរសម្រេចចេញដីកាឃុំខ្លួនជនត្រូវចោទទាំងពីរនាក់ នេះដាក់ពន្ធនាគារបណ្តោះអាសន្ន ។ ជនត្រូវចោទទាំងពីរនាក់ត្រូវជាប់ខ្នោះដៃជាមួយគ្នា ហើយដោយសារការធ្វេសប្រហែលរបស់នគរបាល ប្តីបានដោះខ្នោះដៃរត់គេចខ្លួនតែម្នាក់ឯង ចោលប្រពន្ធឱ្យនៅតែឯង ធ្វើឱ្យមានការភ្ញាក់ផ្អើលតែម្តង ៕
ចែករំលែកព័តមាននេះ