រាជធានីភ្នំពេញ ៖ ដើម្បីសម្រួចផែនការរៀបចំព្រឹត្តិការណ៍កីឡាជាតិលើកទី២ ឆ្នាំ២០១៨ ដែលគ្រោងធ្វើនៅចុងខែឧសភា ខាងមុខនោះ កាលពីពេលថ្មីៗកន្លងទៅនេះ ក្រសួងអប់រំ យុវជន និងកីឡា…
រាជធានីភ្នំពេញ ៖ ដើម្បីសម្រួចផែនការរៀបចំព្រឹត្តិការណ៍កីឡាជាតិលើកទី២ ឆ្នាំ២០១៨ ដែលគ្រោងធ្វើនៅចុងខែឧសភា ខាងមុខនោះ កាលពីពេលថ្មីៗកន្លងទៅនេះ ក្រសួងអប់រំ យុវជន និងកីឡា បានកោះហៅសហព័ន្ធកីឡាជាតិចំនួន២៧មកប្រជុំដោះស្រាយបញ្ហាដែលរាំងស្ទះមួយចំនួន មុនការប្រកួតចូលមកដល់ ។
លោក វ៉ាត់ ចំរើន អគ្គលេខាធិការគណៈ កម្មាធិការជាតិអូឡាំពិកកម្ពុជា បានមានប្រសាសន៍ថា ៖ «សម្រាប់ការប្រកួតកីឡាជាតិឆ្នាំនេះយើងនឹងរៀបចំឲ្យល្អប្រសើរជាងឆ្នាំមុន ឱ្យប្លែកជាងមុនច្រើនក្នុងនោះគណៈកម្មការប្រកួតបានសម្រេចយករូបសត្វព្រាប ស ធ្វើជានិមិត្តរូបនៃការប្រកួត»។
ចំណែក លោក អ៊ុក សិទ្ធិជាតិ អគ្គនាយកនៃអគ្គនាយកដ្ឋានកីឡា បានមានប្រសាសន៍ថា ការប្រកួតកីឡាជាតិលើកទី២មានរហូតដល់២៧ប្រភេទកីឡា ដូច្នេះក្រុមគណៈកម្មការត្រូវជ្រើសរើសយកទីលានចំនួន៤ខេត្ត-រាជធានីរៀបចំធ្វើ គឺរាជធានីភ្នំពេញ ខេត្តកែប កំពត និងខេត្តកំពង់ធំ ។ ចំពោះកីឡាទាំង២៧ប្រភេទដែលត្រូវដាក់ប្រកួតរួមមានកីឡាបាល់ទាត់, បាល់ទះ, បាល់បោះ, អត្តពលកម្ម, ប៉េតង់, វាយសី, វាយកូនបាល់, វាយកូនឃ្លីលើតុ, ចំបាប់, តេក្វាន់ដូ W.T.F របស់កូរ៉េខាងត្បូង, ហែលទឹក, ល្បុក្កតោ, កាយសម្ព័ន្ធ, ប្រដាល់សាកល, ហ្សូរិនជីកាំប៉ូ, តេក្វាន់ដូ I.T.F របស់កូរ៉េខាងជើង, ការ៉ាតេដូ, ប្រដាល់គុនខ្មែរ, យូដូ, ទ្រីយ៉ាត្លុង, សូហ្វតិន្នីស, បេស្បល, ប្រណាំងកង់, សីដក់, កីឡាបាញ់កាំភ្លើង និង វ៉ូវីណាម។
គួរបញ្ជាក់ថា ការប្រកួតកីឡាជាតិលើកទី២ឆ្នាំ២០១៨គ្រោងធ្វើឡើងចាប់ពីថ្ងៃទី២៥ ខែឧសភា រហូតដល់ថ្ងៃទី៥ ខែមិថុនា ខាងមុខ ។ ក្នុងរយៈពេល១២ថ្ងៃ នៃការរៀបចំព្រឹត្តិការណ៍ថ្នាក់ជាតិដ៏ធំ២ឆ្នាំម្ដងនេះ ក្រសួងអប់រំ យុវជន និងកីឡា បានត្រៀមថវិការដ្ឋចំនួន៦.០០០លានរៀលកើនឡើងទ្វេដងបើធៀបនឹងការរៀបចំលើកទី១កាលពីឆ្នាំ២០១៦ ដើម្បីចំណាយលើការរៀបចំផ្សេងៗ តែមិនបូកការចំណាយលើការរៀបចំពិធីបើក និងពិធីបិទ ដែលរ៉ាប់រងដោយគណៈកម្មាធិការជាតិអូឡាំពិកកម្ពុជាឡើយ។
ការចំណាយថវិកាកើនឡើងទ្វេដងបែបនេះត្រូវបានលោក អ៊ុក សិទ្ធិជាតិ ថ្លែងថា ដោយសារប្រភេទកីឡាត្រូវបានបង្កើនឡើងពី១៥ប្រភេទទៅ២៧ប្រភេទស្មើនឹង២៧២វិញ្ញាសា ខណៈប្រតិភូ គ្រូ និងអត្តពលិក គឺបានកើនឡើងពីជិត ២.០០០នាក់ ដល់ប្រមាណ ៥.០០០នាក់ឯណោះ ។ លោករំពឹងថា ការប្រកួតកីឡាជាតិឆ្នាំនេះ នឹងមានភាពល្អប្រសើរជាងលើកមុនមិនខាន ៕
ចែករំលែកព័តមាននេះ