រាជធានីភ្នំពេញ ៖ លោក មាស យ៉ានួរីស អ្នកស្រាវជ្រាវក្បាច់គុនបូរាណខ្មែរប្រចាំប្រទេសបារាំង បានមកបង្រៀនពីរបៀបចាប់សរសៃដើម្បីរក្សាសុខភាព និងបំបាត់ភាពស្ត្រេសក្នុងខ្លួនដល់ព្រះសង្ឃគង់ក្នុងវត្តវិចិត្ថារាម ស្ថិតក្នុងខណ្ឌច្បារអំពៅរយៈពេល៤ថ្ងៃចាប់តាំងពីថ្ងៃទី២ដល់ថ្ងៃទី៥ មករា…
រាជធានីភ្នំពេញ ៖ លោក មាស យ៉ានួរីស អ្នកស្រាវជ្រាវក្បាច់គុនបូរាណខ្មែរប្រចាំប្រទេសបារាំង បានមកបង្រៀនពីរបៀបចាប់សរសៃដើម្បីរក្សាសុខភាព និងបំបាត់ភាពស្ត្រេសក្នុងខ្លួនដល់ព្រះសង្ឃគង់ក្នុងវត្តវិចិត្ថារាម ស្ថិតក្នុងខណ្ឌច្បារអំពៅរយៈពេល៤ថ្ងៃចាប់តាំងពីថ្ងៃទី២ដល់ថ្ងៃទី៥ មករា ឆ្នាំ២០១៨។
លោក មាស យ៉ានួរីស គឺជាកូនខ្មែរមួយរូបដែលរស់នៅប្រទេសបារាំងអស់រយៈពេលជាយូរឆ្នាំមកហើយ ។ ដោយសារតែរូបលោកមានឈាមជ័រជាខ្មែរបើទោះជារស់នៅទីណាក៏ដោយក៏លោកនៅតែស្រឡាញ់ និងមានចិត្តចង់ថែរក្សាសម្បត្តិវប្បធម៌ខ្មែរដែលជាកេរដំណែលពីដូនតាឱ្យស្ថិតនៅគង់វង្សសម្រាប់កូនខ្មែរជំនាន់ក្រោយដែរ ។
ដោយហេតុនេះហើយទើបសព្វថ្ងៃនេះ លោកសុខចិត្តលះបង់ពេលវេលា កម្លាំងកាយចិត្តដោយគ្មានគិតពីការនឿយហត់ឡើយ ដើម្បីធ្វើការស្រាវជ្រាវក្បាច់គុនបុរាណខ្មែរដោយមានការជួយជ្រោមជ្រែងពីលោកគ្រូចាស់ៗមួយចំនួនដូចជាលោកគ្រូតាភុំ ណាគ្រី ដើម្បីរៀបចំចងក្រងជាឯកសារទុក ។ លោក មាស យ៉ានួរីសមិនត្រឹមតែចេះក្បាច់គុនយុទ្ធក្រមខមមួយមុខនោះទេ លោកក៏ជាគ្រូបង្ហាត់កីឡាចំបាប់ផងដែរ និយាយរួមឱ្យតែក្បាច់គុនបូរាណខ្មែរគឺលោកមានចិត្តស្រឡាញ់ចូលចិត្តទាំងអស់ព្រោះថា ការហាត់កីឡាអាចនាំឱ្យមនុស្សយើងមានសុខភាព ល្អ កម្លាំងមាំមួន ប្រាជ្ញាឈ្លាសវៃ និងអារម្មណ៍ភ្លឺថ្លា។
លោកបន្តថា សព្វថ្ងៃនេះមនុស្សយើងហូបអាហារប្រចាំថ្ងៃតែងរងនូវផលប៉ះពាល់ ព្រោះថា អាហារទាំងនោះមានមួយចំនួនជួយទ្រទ្រង់ដល់រាងកាយនិងអាហារមួយចំនួនទៀតវាមិនផ្ដល់នូវផលល្អសម្រាប់យើងឡើយ ។ ដូច្នេះហើយទើបលោកខិតខំស្រាវជ្រាវរិះរកគ្រប់វិធីសាស្ត្រ ដើម្បីធ្វើឱ្យយើងគ្រប់គ្នាមានសុខភាពល្អ រស់នៅប្រកបដោយសេចក្ដីសុខ និងសុភមង្គលក្នុងគ្រួសារ ។ យ៉ាងណាមិញ វិធីសាស្ត្រចាប់សរសៃដែលលោកបានសម្រេចចិត្តយកមកបង្ហាត់បង្រៀនដល់ព្រះសង្ឃនាពេលនេះ វាក៏ជាផ្នែកមួយរបស់កីឡាដែរ ព្រោះជាធម្មតាការលេងកីឡាអ្វីមួយមុននឹងចាប់ផ្ដើមគឺត្រូវតែសម្រួលសរសៃជាមុនសិន ទើបមិនបណ្ដាលឱ្យយើងថ្លោះឬគ្រេចផ្នែកណាមួយនៅក្នុងរាងកាយ ។ ហើយវិធីចាប់សរសៃនេះមាន១៤ចលនាធំៗ និងប្រើប្រាស់ពេលវេលា៣០ទៅ៤៥នាទីយ៉ាងច្រើន ។
ព្រះចៅអធិការវត្តវិចិត្ថារាម ព្រះនាមប៉ូ សុខវុន មានសង្ឃដីកាថា ការហាត់ប្រាណដើម្បីសុខភាពគឺជាផ្នែកមួយដែលជួយធ្វើឱ្យរាងកាយរឹងមាំ មានអារម្មណ៍ល្អ ប្រាជ្ញាឈ្លាសវៃ។ដោយឡែក ការងាកមកហាត់ប្រាណនិងការចាប់សរសៃរបៀបខ្មែរបុរាណបែបនេះកាន់តែពិសេសថែមទៀត ។ ជាពិសេសព្រះសង្ឃទូទៅលោកមិនអាចដើរ រត់ដូចឧបាសក ឧបាសិកា តាមដងវិថីនានាបានឡើយ ។ ព្រះអង្គមានសង្ឃដីកាទៀតថា ព្រះអង្គបានសាកល្បងរួចហើយថាពិតជាធ្វើឱ្យរាងកាយរបស់យើងបានធូរស្រាលអារម្មណ៍ល្អមែន តាំងពីចង្កេះ និងជង្គង់ឡើងទៅគឺពិតជាមានផលប្រយោជន៍ច្រើន ។ អ្នកខ្លះមើលស្រាលទៅលើចំណេះចាប់សរសៃថាទាបឬមិនសូវល្អប៉ុន្តែមិនមែនទាបនោះទេគឺពិសេសខ្លាំងណាស់ ។
ព្រះអង្គបញ្ជាក់ថា វិធីសាស្ត្រនៃការចាប់សរសៃនេះ បើសិនជាយើងព្យាយាមអនុវត្តរាល់ថ្ងៃដើម្បីឱ្យកាន់តែមានភាពប្រសប់ និងយល់ដឹងកាន់តែច្បាស់ពិតជាផ្ដល់ប្រយោជន៍ច្រើនណាស់ ។
លោកស្រី អ៊ឹម ឌូ អតីតអនុប្រធាននាយកដ្ឋានប្រឆាំងការជួញដូរមនុស្ស និងជាសមា
ជិកគណៈកម្មការថ្នាក់ជាតិប្រឆាំងការជួញដូរមនុស្សនិងការពារអនីតិជន បានមានប្រសាសន៍ថា ការធ្វើចលនាព្យាបាលសរសៃបែបបុរាណខ្មែររបស់លោកគ្រូមាស យ៉ានួរិនេះទើបតែមានការចាប់ផ្ដើមជាដំបូងនៅភូមិព្រែកតាកូវ ឃុំព្រែកតាកូវ ស្រុកខ្សាច់កណ្ដាល មានរយៈពេល៥ថ្ងៃ ដែលមានព្រះគ្រូលន់ សុគន្ធា ព្រះចៅអធិការវត្តស្វាយជ្រំ ព្រះរាជាគណៈថ្នាក់ទោនៃព្រះរាជាណាចក្រកម្ពុជា និងជាអនុប្រធានលេខាធិការនៃគណៈសង្ឃនាយកនៃព្រះរាជាណាចក្រកម្ពុជាចូលរួមផងដែរ ។
ការធ្វើចលនាព្យាបាលចាប់សរសៃបែបបុរាណខ្មែរយើងនេះ ក៏ជាចំណេះដឹងមួយផ្នែកសម្រាប់ព្រះសង្ឃ ដោយទៅថ្ងៃក្រោយពេលដែលលោកសឹកអាចយកចំណេះដឹងទាំងនេះទៅប្រកបរបរអាជីវកម្មចិញ្ចឹមជីវិតបាន ។ យើងដឹងហើយថា បើកាលណាគ្រួសារយើងមានសុខភាពល្អ យើងមានឱកាសប្រកបការងារបានល្អប្រសើរធ្វើឱ្យសេដ្ឋកិច្ចជាតិមានការរីកចម្រើន ។ យុវវ័យគ្រប់រូបបើសិនជាមានចំណេះដឹងនៅក្នុងខ្លួនពិតប្រាកដ អាចចៀសឆ្ងាយពីអំពើមិនល្អដូចជាធ្វើចោរលួច ឆក់ ប្លន់ និងការសេពគ្រឿងញៀនជាដើម។
គួរបញ្ជាក់ថា លោក មាស យ៉ានួរីស មានសញ្ញាបត្របច្ចេកទេសផ្នែកព្យាបាលជំងឺស្ត្រេស និងចាប់សរសៃនៅប្រទេសបារាំង ៕
ចែករំលែកព័តមាននេះ