ខេត្តស្វាយរៀង ៖ បុរសម្នាក់ស្លៀកសម្លៀកបំពាក់ជាឯកសណ្ឋានយ៉ាងហំហាន តែបែរជាដើរចាយប្រាក់ក្លែងក្លាយ ផ្អើលអ្នកផ្សារក្រមួន មកចោមរោមមើល ធ្វើឲ្យអ្នកចាយប្រាក់ក្លែងក្លាយដឹងខ្លួនឡើងជិះម៉ូតូគេចខ្លួនបាត់ភ្លាមៗ នៅវេលាម៉ោង៨និងនិង៤៥នាទីព្រឹកថ្ងៃទី៥ មករា នៅផ្សារក្រមួន…
ខេត្តស្វាយរៀង ៖ បុរសម្នាក់ស្លៀកសម្លៀកបំពាក់ជាឯកសណ្ឋានយ៉ាងហំហាន តែបែរជាដើរចាយប្រាក់ក្លែងក្លាយ ផ្អើលអ្នកផ្សារក្រមួន មកចោមរោមមើល ធ្វើឲ្យអ្នកចាយប្រាក់ក្លែងក្លាយដឹងខ្លួនឡើងជិះម៉ូតូគេចខ្លួនបាត់ភ្លាមៗ នៅវេលាម៉ោង៨និងនិង៤៥នាទីព្រឹកថ្ងៃទី៥ មករា នៅផ្សារក្រមួន ស្ថិតនៅភូមិរោងបន្លែ សង្កាត់ស្វាយរៀង ក្រុងស្វាយរៀង ។
បើតាមស្ត្រីឈ្មោះ មួង លាប អាយុ៣៨ឆ្នាំ ជាអ្នកលក់ត្រីនៅផ្សារក្រមួនបានឲ្យដឹងថា គាត់មានទីលំនៅភូមិគយត្របែក សង្កាត់គយត្របែក ក្រុងស្វាយរៀង មានប្តីជាអ្នកនេសាទ ។ គាត់រៀបរាប់បន្តថា ប្តីគាត់តែងរកត្រីនៅព្រែកទន្លេវ៉ៃគោ ។ ពេលរកត្រីបានគឺឲ្យគាត់ជាប្រពន្ធយកមកលក់នៅផ្សារក្រមួនជាប្រចាំរាល់ថ្ងៃ បានប្រាក់ផ្គត់ផ្គង់ជីវភាពគ្រួសារបានសមរម្យនឹងគេដែរ មិនអត់ពេកទេ គឺរកមួយថ្ងៃហូបបានមួយថ្ងៃដែរ ។ គាត់បន្តថា នៅយប់ថ្ងៃទី៤ មករា ប្តីគាត់រកត្រីប៉ះចំថ្ងៃស៊យ ឆ្លុះត្រីមួយយប់ទល់ភ្លឺ គឺរកត្រីបានតែមួយក្បាលគត់ គឺត្រីរ៉ស់ទម្ងន់៨ខាំ ។
ព្រឹកកើតហេតុ គាត់បានជិះកង់យកត្រីនោះមកលក់ ក៏ជួបបុរសម្នាក់ស្លៀកពាក់ជាឯកសណ្ឋាន ប៉ូលិសជិះម៉ូតូមកស្ទាក់ ហៅទិញត្រីនៅលើស្ពានគយត្របែក ជិតផ្សារក្រមួននេះ ហើយបានសួរថា មានត្រីតែមួយហ្នឹង…គាត់ក៏ឆ្លើយថា រកបានតែមួយហ្នឹងទេយប់មិញ ។ ពេលនោះអ្នកទិញបានសំឡុតថា ត្រីយួនឬត្រីស្រែ ? គាត់ឆ្លើយថា ត្រីទន្លេវ៉ៃគោ ប្តីខ្ញុំរកនៅព្រែកទន្លេវ៉ៃគោយប់មិញ បានតែមួយហ្នឹងផង ! ទើបបុរសនោះឲ្យថ្លឹងឃើញទម្ងន់៨ខាំ គិតជាប្រាក់១២.០០០រៀល ។ ខណៈនោះអ្នកទិញដែលមានសម្លៀកបំពាក់បែបហំហានផងបានលូកហោប៉ៅយកប្រាក់ ឃើញសុទ្ធតែក្រដាស់១ម៉ឺនមួយដុំធំនៅថ្មីចែសដូចទើបនិងបើកពីធនាគារព្រោះក្រដាស់ថ្មីៗ ចំនួនរាប់លានបានដកក្រដាសមួយម៉ឺនឲ្យមួយសន្លឹកនិងក្រដាស់៥០០រៀលបួនសន្លឹក ហើយបានយកត្រីជិះម៉ូតូចុះពីលើស្ពានរួចបត់ចូលមកផ្សារក្រមួនបាត់ទៅ ។
ពេលគាត់មកដល់ផ្សារយកប្រាក់នោះបម្រុងទិញត្រីគេលក់បន្ត ទើបអ្នកលក់ត្រីដូចគ្នា និយាយថា លុយឯងម៉េចក៏ស្លេកម្ល៉េះ ? ក៏យកលុយក្រដាស់មួយម៉ឺននេះមកពិនិត្យមើលទើបដឹងថា លុយក្លែងក្លាយមែនក៏ឆោឡោ ធ្វើឲ្យមានការភ្ញាក់ផ្អើលដល់អ្នកផ្សារមកនាំគ្នាចោមរោមមើល ។ គេថា នេះជាសំណាងដែរ មានត្រីតែ១ បើមានច្រើនគេទិញទាំងអស់ក៏លក់ឲ្យដែរ ដោយគ្មានចាប់អារម្មណ៍ថា គេចាយលុយក្លែងក្លាយទេ ពីព្រោះអ្នកទិញស្លៀកសម្លៀកបំពាក់ជាឯកសណ្ឋានប៉ូលិស គ្មានឆ្ងល់ គ្មានសង្ស័យអ្វីទេ ។ ម្យ៉ាងទៀតបើគ្មានការឆោឡោទេ បុរសនោះពិតជាដើរចាយប្រាក់ក្លែងក្លាយ ទិញអីវ៉ាន់ពេញផ្សារក្រមួន និងអាចបន្តទៅចាយនៅផ្សារវាលយន្តទៀត ។ អាជីវករបានសូមអំពាវនាវដល់សមត្ថកិច្ចស្រាវជ្រាវតាមចាប់ជនដើរចាយប្រាក់ក្លែងក្លាយ យកមកផ្តន្ទាទោសតាមច្បាប់ផងកុំឲ្យដើរចាយក្រដាស់ប្រាក់ក្លែងក្លាយបន្តទៀត ៕
ចែករំលែកព័តមាននេះ