ប្រទេសកូរ៉េទាំង២ ៖ ជាលើកដំបូងចាប់តាំងពីឆ្នាំ២០១៥មក ការចរចានឹងធ្វើឡើងវិញរវាងកូរ៉េខាងជើង និងកូរ៉េខាងត្បូងនាថ្ងៃទី៩ មករា ។
ក្រុងព្យុងយ៉ាងកាលពីថ្ងៃទី៥ មករា បានយល់ព្រមតាមសំណើរបស់ក្រុងសេអ៊ូលដែលធ្វើកាលពី៣ថ្ងៃមុននេះ ។ ការចរចានេះនឹងផ្តោតលើការប្រកួតកីឡាអូឡាំពិករដូវរងាដែលនឹងបើកធ្វើនាថ្ងៃទី៩ កុម្ភៈ នៅ PYEONGCHANG និងពីយថាភាពនៃការចូលរួមរបស់កូរ៉េខាងជើង ក៏ប៉ុន្តែក៏ផ្តោតផងដែរលើបញ្ហានៃការកែលម្អទំនាក់ទំនងអន្តរកូរ៉េ ។
នេះបើតាមការអះអាងរបស់អ្នកនាំពាក្យក្រសួងបង្រួបបង្រួមកូរ៉េខាងត្បូង ។ ក្រសួងបង្រួបបង្រួមនិយាយថា កូរ៉េខាងជើងបានបញ្ជូនឱ្យយើងនាព្រឹកថ្ងៃទី៥ មករា នូវសារមួយដែលគូសបញ្ជាក់ថា ខ្លួនទទួលយកសំណើចរចាថ្ងៃទី៩ មករា របស់កូរ៉េខាងត្បូង ។
ការជួបគ្នានេះនឹងធ្វើនៅភូមិប៉ានមុនហ្សូម ជាភូមិមួយនៅតាមព្រំដែនកូរ៉េទាំង២ ជាកន្លែងចុះហត្ថលេខាលើបទឈប់បាញ់គ្នាដែលបញ្ចប់សង្គ្រាមកូរ៉េ (១៩៥០-១៩៥៣) ។
ការប្រកាសនេះធ្វើឡើងប៉ុន្មានម៉ោងក្រោយពីកូរ៉េខាងត្បូង និងសហរដ្ឋអាមេរិកបានព្រមព្រៀងគ្នាពន្យារពេលសមយុទ្ធយោធារួមដែលពីដំបូងគ្រោងធ្វើអំឡុងពេលប្រកួតកីឡាអូឡាំពិក ដែលសមយុទ្ធនេះធ្វើជារៀងរាល់ឆ្នាំ នាំឱ្យមានភាពតានតឹងនៅឧបទ្វីបកូរ៉េ ៕
ចែករំលែកព័តមាននេះ