រាជធានីភ្នំពេញ ៖ រដ្ឋបាលរាជធានីភ្នំពេញបានប្រគល់សួនច្បារវិមានឯករាជ្យ និងសួនច្បារខាងលិចវិមានឯករាជ្យ ជូនទៅឲ្យរដ្ឋបាលខណ្ឌដូនពេញ ដើម្បីគ្រប់គ្រងសន្តិសុខសណ្ដាប់ធ្នាប់របៀបរៀបរយសាធារណៈ ព្រមទាំងការត្រួតពិនិត្យ ការអនុវត្តច្បាប់ចរាចរណ៍ផ្លូវគោក និងថែទាំផងដែរ បន្ទាប់ពីអាជ្ញាធរខណ្ឌចំនួនពីរ…
រាជធានីភ្នំពេញ ៖ រដ្ឋបាលរាជធានីភ្នំពេញបានប្រគល់សួនច្បារវិមានឯករាជ្យ និងសួនច្បារខាងលិចវិមានឯករាជ្យ ជូនទៅឲ្យរដ្ឋបាលខណ្ឌដូនពេញ ដើម្បីគ្រប់គ្រងសន្តិសុខសណ្ដាប់ធ្នាប់របៀបរៀបរយសាធារណៈ ព្រមទាំងការត្រួតពិនិត្យ ការអនុវត្តច្បាប់ចរាចរណ៍ផ្លូវគោក និងថែទាំផងដែរ បន្ទាប់ពីអាជ្ញាធរខណ្ឌចំនួនពីរ គឺខណ្ឌដូនពេញ និងខណ្ឌចំការមនប្រចាំចែកគ្នាមិនដាច់ ។
ពិធីប្រគល់ និងទទួលសួនច្បារនេះបានធ្វើឡើងកាលពីរសៀលថ្ងៃទី០៣ ខែមករា ឆ្នាំ២០១៨ នៅសាលារាជធានីភ្នំពេញដែលចុះហត្ថលេខាដោយលោកហួត ហៃ នាយករដ្ឋបាលរាជធានីភ្នំពេញ និងលោកសុខ ពេញវុធ អភិបាលខណ្ឌដូនពេញ ក្រោមអធិបតីភាពលោកឃួង ស្រេង អភិបាលរាជធានីភ្នំពេញ ។ នៅក្នុងលិខិតប្រគល់-ទទួលសួនច្បារនោះបានបញ្ជាក់ថា ដើម្បីលើកកម្ពស់សោភ័ណភាពទីក្រុងឲ្យបានល្អប្រសើរបន្ថែមទៀត ។
រដ្ឋបាលរាជធានីភ្នំពេញសម្រេចប្រគល់ទីតាំងសួនច្បារវិមានឯករាជ្យ និងសួនច្បារខាងលិចវិមានឯករាជ្យ ជូនរដ្ឋបាលខណ្ឌដូនពេញ ដើម្បីគ្រប់គ្រងថែទាំធ្វើអនាម័យ និងរៀបចំសណ្តាប់ធ្នាប់របៀបរៀបរយសាធារណៈព្រមទាំងការត្រួតពិនិត្យការអនុវត្តច្បាប់ចរាចរណ៍ផ្លូវគោក ដោយមិនឲ្យមានការចតលើទ្រូងផ្លូវ និងការធ្វើចរាចរណ៍បញ្ច្រាសទិសឡើយ ។
ក្នុងករណី បាតុភាពអសកម្មខាងលើកើតមាន រដ្ឋបាលខណ្ឌដូនពេញ ត្រូវទទួលខុសត្រូវចំពោះមុខរដ្ឋបាលរាជធានីភ្នំពេញ គិតចាប់ពីថ្ងៃចុះហត្ថលេខានេះតទៅ ។
គួររំលឹកថា កាលពីវិច្ឆិកាឆ្នាំ២០១៧កន្លងទៅ រដ្ឋបាលរាជធានីភ្នំពេញក៏បានប្រគល់សួនច្បារសម្តេចតេជោហ៊ុនសែននៅមុខ Naga World ឲ្យទៅរដ្ឋបាលខណ្ឌចំការមនគ្រប់គ្រង ថែទាំ និងរៀបចំសន្តិសុខសណ្តាប់ធ្នាប់ផងដែរ ៕
ចែករំលែកព័តមាននេះ