រាជធានីភ្នំពេញ ៖ ប្រឡាយទួលពង្រនឹងចាប់ផ្ដើមស្ដារនាពេលឆាប់ៗខាងមុខនេះដើម្បីកាត់បន្ថយការលិចលង់ដោយជំនន់ទឹកភ្លៀងនៅរដូវវស្សាឆ្នាំក្រោយ ពិសេសនៅតំបន់សាលាក្ដីខ្មែរក្រហម ក្នុងសង្កាត់ចោមចៅ២ ខណ្ឌពោធិសែនជ័យ ។ គម្រោងការនេះត្រូវបានបង្ហាញនៅក្នុងកិច្ចប្រជុំត្រួតពិនិត្យប្រឡាយទួលពង្រកាលពីរសៀល ថ្ងៃទី០៣ ខែមករា…
រាជធានីភ្នំពេញ ៖ ប្រឡាយទួលពង្រនឹងចាប់ផ្ដើមស្ដារនាពេលឆាប់ៗខាងមុខនេះដើម្បីកាត់បន្ថយការលិចលង់ដោយជំនន់ទឹកភ្លៀងនៅរដូវវស្សាឆ្នាំក្រោយ ពិសេសនៅតំបន់សាលាក្ដីខ្មែរក្រហម ក្នុងសង្កាត់ចោមចៅ២ ខណ្ឌពោធិសែនជ័យ ។ គម្រោងការនេះត្រូវបានបង្ហាញនៅក្នុងកិច្ចប្រជុំត្រួតពិនិត្យប្រឡាយទួលពង្រកាលពីរសៀល ថ្ងៃទី០៣ ខែមករា ឆ្នាំ២០១៨ នៅសាលារាជធានីភ្នំពេញក្រោមអធិបតីភាពលោក ឃួង ស្រេង អភិបាលរាជធានីភ្នំពេញ ។
មន្ត្រីរដ្ឋបាលរាជធានីភ្នំពេញបានឲ្យដឹងថា ការប្រជុំនោះបានសម្រេចឲ្យមានការរៀបចំស្ដារប្រឡាយទួលពង្រទី១ និងទួលពង្រទី២ ដើម្បីរំដោះទឹកពីតំបន់សាលាក្ដីខ្មែរក្រហមភូមិទួលពង្រ និងកាត់បន្ថយការលិចលង់ទឹកជំនន់ទឹកភ្លៀងនៅរដូវវស្សាឆ្នាំក្រោយ ។
មន្ត្រីដដែលបានបញ្ជាក់ថា តាមការសិក្សាបច្ចេកទេសបន្ថែមគឺត្រូវដាក់លូប្រអប់តភ្ជាប់ពីផ្លូវជាតិលេខ៣ដល់ប្រឡាយទួលពង្រទី២ ។ កិច្ចប្រជុំនោះដែររដ្ឋបាលរាជធានីភ្នំពេញបានធ្វើពិធីចុះហត្ថលេខាប្រគល់-ទទួលការទទួលខុសត្រូវគ្រប់គ្រងសួនច្បារវិមានឯករាជ្យ និងសួនច្បារខាងលិចវិមានឯករាជ្យជូនរដ្ឋបាលខណ្ឌដូនពេញដើម្បីគ្រប់គ្រងបន្តផងដែរ ។
គួរបញ្ជាក់ថា តាមបណ្តោយផ្លូវជាតិលេខ៤ពិសេសតំបន់សាលាក្ដីខ្មែរក្រហមភូមិទួលពង្រ សង្កាត់ចោមចៅ២ ខណ្ឌពោធិសែនជ័យ និងតំបន់ក្បែរៗនោះកាលពីរដូវវស្សាកន្លងមកនេះ បានទទួលរងការលិចដោយជំនន់ទឹកភ្លៀងយ៉ាងខ្លាំង បណ្តាលឲ្យមានការកកស្ទះចរាចរណ៍ជាប្រចាំផងដែរ ។ ក្រោយពេលភ្លៀងធ្លាក់ខ្លាំងកាលពីប៉ុន្មានសប្តាហ៏មុនលោក ឃួង ស្រេង អភិបាលរាជធានីភ្នំពេញបានដឹកនាំមន្ត្រីជំនាញ និងអាជ្ញាធរដែនដីចុះត្រួតពិនិត្យដើម្បីរកច្រកដោះស្រាយ ។ ដោយមើលឃើញពីបញ្ហាប្រឈមខាងលើនេះទើបរដ្ឋបាលរាជធានីភ្នំពេញដាក់ចេញនូវគម្រោងស្ថាបនាប្រឡាយទួលពង្រនេះតែម្តង ៕
ចែករំលែកព័តមាននេះ