ប្រទេសរុស្ស៊ី-ប្រទេសស៊ីរី ៖ ដោយដកស្រង់ប្រភពព័ត៌មានយោធា និងការទូតកាសែតរុស្ស៊ី KOMMERSANT រាយការណ៍កាលពីថ្ងៃទី៣ មករា ថា យន្តហោះរុស្ស៊ីយ៉ាងតិច៧គ្រឿងរងការបំផ្លាញដោយការបាញ់ផ្លោងរបស់ពួកឧទ្ទាមកាលពីថ្ងៃទី៣១ ធ្នូ…
ប្រទេសរុស្ស៊ី-ប្រទេសស៊ីរី ៖ ដោយដកស្រង់ប្រភពព័ត៌មានយោធា និងការទូតកាសែតរុស្ស៊ី KOMMERSANT រាយការណ៍កាលពីថ្ងៃទី៣ មករា ថា យន្តហោះរុស្ស៊ីយ៉ាងតិច៧គ្រឿងរងការបំផ្លាញដោយការបាញ់ផ្លោងរបស់ពួកឧទ្ទាមកាលពីថ្ងៃទី៣១ ធ្នូ នៅឯមូលដ្ឋានអាកាសចរណ៍ HMEIMIM ប្រទេសស៊ីរី ។
យោងតាមកាសែតនោះថា នេះជាការបាត់បង់សម្ភារធ្ងន់ធ្ងរបំផុតរបស់កងយន្តហោះរុស្ស៊ីតាំងពីចាប់ផ្តើមធ្វើអន្តរាគមន៍របស់ខ្លួនជួយដល់កងទ័ពរដ្ឋាភិបាលស៊ីរីពីឆ្នាំ២០១៥មក ។ ការបាញ់ផ្លោងដែលគេថា ដោយពួកអ៊ិស្លាមនិយមរ៉ាឌីកាល់ក៏បណ្តាលឱ្យទាហានរុស្ស៊ីប្រមាណជា១០នាក់រងរបួសផងដែរ ។
កាសែតបញ្ជាក់ថា យន្តហោះទម្លាក់គ្រាប់បែកធុន SU-24 ចំនួន៤គ្រឿង យន្តហោះប្រដេញ SU-35S ចំនួន២គ្រឿង ព្រមទាំងយន្តហោះដឹកជញ្ជូន AN-72 មួយគ្រឿងរួមទាំងឃ្លាំងគ្រាប់មួយរងការបំផ្លាញ ។ ទោះបីយ៉ាងណា ក្រសួងការពារប្រទេសរុស្ស៊ីបដិសេធពុំធ្វើអត្ថាធិប្បាយឡើយ ។
ក្រសួងនោះមុននេះប្រកាសថា អ្នកបើក២នាក់នៃឧទ្ធម្ភាគចក្រធុន MI-24 មួយគ្រឿងបានត្រូវស្លាប់នាថ្ងៃទី៣១ ធ្នូ នៅស៊ីរីក្នុងគ្រោះថ្នាក់មួយមកពីបញ្ហាមេកានិក ។
ប្រធានាធិបតីរុស្ស៊ី លោកវ្ល៉ាឌីមៀរ ពូទីន កាលពីថ្ងៃទី១១ ធ្នូ បានបញ្ជាឱ្យដកជាបន្តបន្ទាប់កងទ័ពរុស្ស៊ីមួយផ្នែកដែលដាក់ពង្រាយនៅស៊ីរី ក៏ប៉ុន្តែក្រុងមូស្គូមានបំណងរក្សាទុកវត្តមានយោធាជាអចិន្ត្រៃយ៍នៅមូលដ្ឋាន TARTOUS និង HMEIMIM នៅស៊ីរី ៕
ចែករំលែកព័តមាននេះ