រាជធានីភ្នំពេញ ៖ យោងតាមលោក ហង្ស ពុទ្ធា អ្នកនាំពាក្យគណៈកម្មាធិការជាតិរៀបចំការបោះឆ្នោតបានថ្លែងនៅថ្ងៃទី៣ ខែមករា ឆ្នាំ២០១៨ ថា ប្រទេសចិនបានផ្តល់ថវិកា១៣លានដុល្លារអាមេរិកសម្រាប់ការប្រព្រឹត្តទៅនៃដំណើរការបោះឆ្នោតនៅឆ្នាំ២០១៨នេះ។ ដែលជំនួយនេះ គឺមានសម្ភារៈចំណួន៣០មុខរបស់ចិននឹងត្រូវបានផ្តល់ក្នុងពេលនាយករដ្ឋមន្ត្រីចិនលោក លី ធឺឈាង មកបំពេញទស្សនកិច្ចនៅកម្ពុជាចូលរួមកិច្ចប្រជុំមេគង្គឡានឆាង នាថ្ងៃទី១១ ខែមករា ឆ្នាំ២០១៨ នេះ។
លោក ហង្ស ពុទ្ធា បានបញ្ជាក់ថា ប្រទេសចិន ជប៉ុន និងរុស្ស៊ី បានប្រកាសផ្តល់ជំនួយដល់ គ.ជ.ប នៅពេលអាមេរិក និងសហភាពអឺរ៉ុបបានប្រកាសព្យួរជំនួយសម្រាប់ការបោះឆ្នោតឆ្នាំ២០១៨។
លោកបានបញ្ជាក់ថា៖ «ទោះបីជាបរទេសមិនផ្តល់ជំនួយ ក៏ គ.ជ.ប បានត្រៀមលក្ខណៈសម្រាប់ដំណើរការបោះឆ្នោតនេះ។ កាលៈទេសៈនេះ គ.ជ.ប មានទាំងធនធានមនុស្សនិងថវិកា»។ លោកបន្តថា សម្រាប់ប្រទេសជប៉ុន មិនបានគិតពីបញ្ហានយោបាយ ឬលូកដៃចូលកិច្ចការផ្ទៃក្នុងរបស់ប្រទេសកម្ពុជានោះទេ គឺប្រទេសជប៉ុននៅតែបន្តផ្តល់ជំនួយ ដែលក្នុងនោះ គឺមានអ្នកជំនាញ៣នាក់របស់ជប៉ុន កំពុងបម្រើការងារនៅ គ.ជ.ប។
ចំពោះប្រទេសរុស្ស៊ីវិញ ក៏បានផ្តល់ភ្លើងខៀវក្នុងការផ្តល់ជំនួយហើយ តែ គ.ជ.ប និងភាគីរុស្ស៊ីកំពុងសិក្សាគ្នាថា តើ គ.ជ.ប ត្រូវការអ្វីខ្លះពីរុស្ស៊ី និងរុស្ស៊ីត្រូវផ្តល់អ្វីខ្លះដល់ គ.ជ.ប ។
គួរបញ្ជាក់ថា សម្រាប់ការបោះឆ្នោតជ្រើសតាំងព្រឹទ្ធសភា និងតំណាងរាស្ត្រឆ្នាំ២០១៨នេះ គ.ជ.ប ប្រកាសគ្រោងចំណាយប្រមាណ៥៣លានដុល្លារអាមេរិក។ សម្រាប់ការបោះឆ្នោតជ្រើសតាំងសមាជិកព្រឹទ្ធសភា អង្គបោះគឺមានសមាជិក-សមាជិការសភា១២៣រូប និងក្រុមប្រឹក្សាឃុំ/សង្កាត់ ក្នុងតួនាទីជាង១ម៉ឺននាក់ និងមានបក្ខជនឈរឈ្មោះមកពីគណបក្សប្រជាជនកម្ពុជា គណបក្សយុវជនកម្ពុជា គណបក្សខ្មែររួបរួមជាតិ និងហ៊្វុនស៊ិនប៉ិច សរុបចំនួន៣៧៥នាក់ ស្រី៤៩នាក់ នៅភូមិភាគចំនួន៨ទូទាំងប្រទេស៕
ចែករំលែកព័តមាននេះ