ខេត្តកណ្តាល ៖ មន្ត្រីតុលាការបានបង្ហើបឲ្យដឹងថា នៅថ្ងៃទី០៤ ខែមករា ឆ្នាំ២០១៨ សំណុំរឿងមាន់ជល់ដ៏ល្បីនៅស្រុកល្វាឯម ដែលសមត្ថកិច្ចខេត្តកណ្តាលបង្ក្រាបនេះ មកដល់ពេលនេះ លោក ហុក វ៉ាន់ធីណា ចៅក្រមស៊ើបសួរ និងជាប្រធានសាលាដំបូងខេត្តកណ្តាល បានបិទការស៊ើបសួរហើយ បញ្ជូនទៅឲ្យលោក សាយ សម្ផស្សសេរី ចៅក្រមជំនុំជម្រះ សាលាដំបូងខេត្តកណ្តាល ប៉ុន្តែមិនទាន់កំណត់ថ្ងៃបើកសវនាការនៅឡើយទេ ។
ជនត្រូវចោទ ថៃ ផានី ហៅម៉ាប់អូស្ត្រាលី ត្រូវបានលោក ហុក វ៉ាន់ធីណា ចៅក្រមស៊ើបសួរ និងជាប្រធានសាលាដំបូងខេត្តកណ្តាល សម្រេចឃុំខ្លួនក្នុងពន្ធនាគារ កាលពីថ្ងៃទី០៥ ខែធ្នូ ឆ្នាំ២០១៧ ក្រោមការចោទប្រកាន់ពីបទ «ភ្នាក់ងារល្បែងស៊ីសងខុសច្បាប់» តាមមាត្រា៥ ច្បាប់ស្តីពីការបង្ក្រាបល្បែងស៊ីសង ។ បទល្មើសនេះ កំណត់ការផ្តន្ទាទោសដាក់ពន្ធនាគារពី១ឆ្នាំទៅ៥ឆ្នាំ និងពិន័យជាប្រាក់ពី៥លានរៀលទៅ២០លានរៀល ។
សូមជម្រាបថា ៖ ម្ចាស់សង្វៀនជល់មាន់ដ៏ធំចំនួនពីរកន្លែង ត្រូវបានបញ្ជូនទៅសួរនាំបន្តនៅស្នងការដ្ឋាននគរបាលខេត្តកណ្តាល នាព្រឹកថ្ងៃទី០៥ ខែធ្នូ ឆ្នាំ២០១៧ បន្ទាប់ពីមេសង្វៀនបញ្ជល់មាន់រូបនោះ បានចូលខ្លួនប្រគល់ឱ្យនគរបាលព្រហ្មទណ្ឌក្រសួងមហាផ្ទៃ ។
ចំណាត់ការដ៏ក្តៅរបស់សមត្ថកិច្ចនេះ បន្ទាប់ពីមានបទបញ្ជាដាច់ណាត់របស់ សម្តេចតេជោនាយករដ្ឋមន្ត្រី បញ្ជាឱ្យម្ចាស់សង្វៀនជល់មាន់ល្មើសច្បាប់ដ៏ធំនៅអរិយ៍ក្សត្រ ខេត្តកណ្តាល និងនៅស្រុកបាទី ខេត្តតាកែវ ឱ្យប្រគល់ខ្លួនឱ្យកម្លាំងសមត្ថកិច្ចព្រហ្មទណ្ឌក្រសួងមហាផ្ទៃ ៕
ចែករំលែកព័តមាននេះ