ឮតែប្រេះឆាស្នេហ៍ ស្រាប់តែ សឿ សុធារ៉ា មានកូនទី២
- ភ្នំពេញ
រាជធានីភ្នំពេញ ៖ តារាចម្រៀងលោក សាពូន មីដាដា បានប្រកាសពីការទទួលបានកូនប្រុសម្នាក់ទៀត ជាមួយភរិយាអ្នកនាង សឿ សុធារ៉ា នៅដើមឆ្នាំ២០១៨នេះ…
រាជធានីភ្នំពេញ ៖ តារាចម្រៀងលោក សាពូន មីដាដា បានប្រកាសពីការទទួលបានកូនប្រុសម្នាក់ទៀត ជាមួយភរិយាអ្នកនាង សឿ សុធារ៉ា នៅដើមឆ្នាំ២០១៨នេះ បន្ទាប់ពីមានកូនដ៏ស្រស់ស្អាតម្នាក់ជាច្រើនឆ្នាំកន្លងមក ។
ម្ចាស់បទចម្រៀង «ចប់បាក់ឌុប ចប់ស្នេហ៍» រូបនេះបានសម្តែងក្តីសប្បាយរីករាយយ៉ាងខ្លាំងជាមួយនឹងកូនប្រុសរបស់ខ្លួនដែលទើបតែចាប់កំណើតឃើញពន្លឺព្រះអាទិត្យនាពេលនេះ ។
ភរិយាយរបស់លោកសាពូន មីដាដា គឺតារាសម្តែងអ្នកនាងសឿ សុធារ៉ា បានឆ្លងទន្លេកូនទីពីររបស់ខ្លួនកាលពីថ្ងៃទី១ ខែមករា ឆ្នាំ២០១៨ នៅក្នុងមន្ទីរពេទ្យរ៉ូយ៉ាល់ភ្នំពេញ ។
បន្ទាប់ពីកូនប្រុសរបស់ខ្លួនចាប់កំណើតជាមួយនឹងសុខភាពដ៏ល្អនោះ លោកសាពូនមីដាដា បានបង្ហោះរូបភាពបង្ហាញពីទិដ្ឋភាព និងភាពសប្បាយរីករាយ ជាលក្ខណៈគ្រួសារដ៏កក់ក្តៅ ។
ជាមួយនឹងរូបភាពទាំងនោះលោកសាពូន មីដាដា បានសរសេរថា «ថ្ងៃសីល ១៥ កើត ខែបុស្ស ពេញបរមី ឆ្នាំរកា នព្វស័ក ព.ស ២៥៦១ ត្រូវនឹងថ្ងៃ១ មករា ឆ្នាំ ២០១៨ វេលាម៉ោង៣និង៥៨នាទីព្រឹក កូនប្រុសពុក សាពូន ដារ៉ាបុរស បានកើតមកហើយ លើទឹកដីសុវណ្ណភូមិ ដ៏ស្រស់ស្អាតនេះ ឪពុកឲ្យពរកូនក្លាយជាមនុស្សសែនរឹងមាំ ដែលប្រកាន់ខ្ជាប់នូវសុចរិតភាពជានិច្ច និងមានជ័យជោគ ក្នុងឆាកជីវិត »។
បន្ទាប់ពីលោកសាពូន មីដាដា បង្ហាញរូបថតពីការចាប់កំណើតកូនទី២របស់ខ្លួននោះភ្លាម មានប្រិយមិត្តគាំទ្រ និងមិត្តភក្តិរបស់លោកជាច្រើនបានចូលរួមសម្តែងការអបអរសាទរ ក្នុងពេលដែលលោកបានសម្រេចនូវក្តីបំណងក្នុងការចង់បានកូនប្រុសម្នាក់ ។
ពួកគេក៏បានសម្តែងការត្រេកអរផងដែរជាមួយនឹងវត្តមានកូនប្រុសរបស់លោកសាពូន មីដាដា និងអ្នកនាងសឿ សុធារ៉ា ដែលបានចាប់កំណើតក្នុងថ្ងៃល្អ គឺថ្ងៃចន្ទដែលជាថ្ងៃដើមទ្រព្យ ហើយជាថ្ងៃចាប់ផ្តើមនៃឆ្នាំ២០១៨ផងដែរ ។
លោកសាពូន មីដាដា និងអ្នកនាង សឿ សុធារ៉ា បានរៀបការជាប្តីប្រពន្ធកាលពីអំឡុងឆ្នាំ ២០០៩ ។ ប្តីប្រពន្ធនេះមានកូនស្រីច្បងវ័យ៦ឆ្នាំ និងកូនប្រុសទើបកើតនាពេលនេះ ។
កូនទីពីររបស់អ្នកទាំងពីរត្រូវបានគេចាត់ទុកថា ជាចំណែកមួយយ៉ាងសំខាន់ក្នុងការរឹតចំណងស្នេហ៍ប្តីប្រពន្ធរបស់អ្នកសិល្បៈមួយគូនេះ ក្នុងពេលដែលកន្លងមកពួកគេធ្លាប់ពើបប្រទះនូវព័ត៌មានប្រះឆាជាបន្តបន្ទាប់ផងដែរ ៕
ចែករំលែកព័តមាននេះ