ខេត្តកំពង់ឆ្នាំង ៖ សិស្សថ្នាក់ទី២ និងទី៣ ចំនួនពីរថ្នាក់ នៃសាលាបឋមសិក្សាប្រសាទជាងទង ស្ថិតក្នុងភូមិក្នុង ឃុំស្វាយជ្រុំ ស្រុករលាប្អៀរ បានបង្ខំចិត្តរៀនទាំងលំបាកក្នុងរោងដោល រយៈពេលជាង២ឆ្នាំមកហើយ ទោះមានមានការស្នើសុំរបស់លោកនាយកសាលាទៅថ្នាក់លើយ៉ាងណាក្តី ក៏នៅមិនទាន់ទទួលលទ្ធផលជាផ្លែផ្កាដែរ ធ្វើឲ្យមានការព្រួយបារម្ភដល់ការសិក្សារបស់សិស្ស ពីសំណាក់ លោកគ្រួ អ្នកគ្រូ ដែលយល់ថា សិស្សរៀន របៀបក្នុងរោងដោលនេះគ្មានអារម្មណ៍មូលក្នុងការរៀនសូត្រនោះឡើយ។ លោកគ្រូ កែ សុម៉េត ជាគ្រូប្រចាំថ្នាក់ទី៣ ដែលកំពុងបង្រៀនសិស្សក្នុងរោងដោល នៃសាលាបឋមសិក្សាប្រសាទជាងទង លើកឡោះងថា សិស្សកំពុងរៀនក្នុងរោងដោល ទាំងពីរថ្នាក់នេះ ពិតជាគ្មានអារម្មណ៍បានមូលក្នុងការរៀនសូត្រឡើយ ដោយសារតែខែប្រាំងក្តៅពីដំបូលគ្របតង់កៅស៊ូ រួមដោយខ្យល់ដីហុយ ធ្វើឲ្យរំខានដល់ការៀនសូត្ររបស់សិស្ស និងធ្វើឲ្យប៉ះពាល់ដល់សុខភាព ទាំងសិស្សទាំងគ្រូទៀតផង។ ចំណែកខែវស្សាវិញមានភ្លៀង ខ្យល់ ពេលខ្លះគ្រូ និងសិស្សឈរជ្រកភ្លៀងមើលមុខគ្នា ហើយបើភ្លៀង និងខ្យល់ខ្លាំង សិស្ស និងគ្រូនាំគ្នារត់ជ្រកនៅថ្នាក់រៀនផ្សេង។
អ្នកគ្រូ ឈីវ សុផល បានបញ្ជាក់ថា សិស្សចាប់រៀនក្នុងរោងដោលនេះ មានរយៈពេលជាង២ឆ្នាំហើយ មូលហេតុ សិស្សមានចំនួនកើនឡើងច្រើន ទើបលោកនាយកសាលាសម្រេចបំបែកសិស្សពីរថ្នាក់គឺថ្នាក់ទី ២មានសិស្សចំនួន១៦នាក់ (ស្រី៦នាក់) និងថ្នាក់ទី៣ មានចំនួន២៤នាក់ (ស្រី១២នាក់)។ ជាមួយនឹងការបំបែកថ្នាក់នេះដែរ ព្រោះចង់ឲ្យលោកគ្រូ អ្នកគ្រូ មកបង្រៀននៅពេលព្រឹកស្មើភាពគ្នា ព្រោះបើមិនបំបែកសាលាត្រូវដាក់វេនគ្នាបង្រៀនព្រឹកល្ងាច ម្យ៉ាងពេល បំបែកសិស្សឲ្យរៀនព្រឹកល្ងាចប៉ះសិស្សតូចៗ ម្លោះហើយសាលាដាក់វេនរៀនតែមួយព្រឹក ទាំងសិស្សទាំងគ្រូទាំងអស់គ្នាតែម្តង។ ការលំបាកមួយទៀតគឺ ការរៀបចំបិទតារាងចំណាត់ថ្នាក់ ពិន្ទុសិស្ស បិទកាលវិភាគ និងរូបភាពអប់រំផ្សេងៗទៀតក៏លំបាកដែរ គឺមិនហ៊ានបិទតែម្តង ព្រោះកន្លងមក មានក្មេងៗមកលេងក្នុងសាលាបានហែកចោល។
លោកគ្រួអ្នកគ្រូទាំងពីរបានបញ្ជាក់ដែរថា កន្លងមកមានខាងអង្គការ មួយចំនួនបានមកមើលដែរពីការខ្វះខាតសាលារៀននេះ ប៉ុន្តែក៏ស្ងាត់ទៅវិញ ។ ចំណែកលោកនាយកសាលាក៏បានធ្វើសំណើរទៅស្រុក ខេត្តដែរ តែនៅស្ងាត់ឈឹង មិនទាន់ទទួលដំណឹងជាវិជ្ជមានឡើយ។ ជាចុងក្រោយលោក គ្រូអ្នកគ្រួទាំងអស់ សូមសំណូមពរដល់ ប្រមុខរាជរដ្ឋាភិបាល ដែលមានសម្តេចតេជោ ហ៊ុន សែន សូមមេត្តាជូយកសាងអាគារសិក្សា១ខ្នង មាន៥បន្ទប់ផង ព្រោះសាលានៅខ្វះថ្នាក់មត្តេយ្យ ខ្វះបន្ទប់ទីចាត់ការ និងបន្ទប់ថ្នាក់សម្រាប់សិស្សរៀន។ បើតាមការបញ្ជាក់ពីលោក យី ភួន មេឃុំស្វាយជ្រុំបានឲ្យដឹងថា សាលាពិតជាខ្វះបន្ទប់រៀន ជួបការលំបាករយៈពេល២ឆ្នាំហើយ ក្នុងនាមលោកជាអាជ្ញាធរឃុំស្វាយជ្រុំ សូមអំពាវនាវ ដល់សប្បុសជននានា និងសម្តេចតេជោ ហ៊ុន សែន សូមមេត្តាជួយសាងសង់សាលាមួយខ្នងនេះផង៕
ចែករំលែកព័តមាននេះ