ខេត្តតាកែវ ៖ នៅរសៀលថ្ងៃទី១ មករា ឆ្នាំ២០១៨ កុមារីរងគ្រោះ២នាក់បងប្អូនបានអះអាងថា ត្រូវម្តាយចុងនិងឪពុកបង្កើតរួមដៃគ្នាធ្វើទារុណកម្មយ៉ាងព្រៃផ្សៃ បានបង្ហាញពីការក្រាញននៀលចង់រស់នៅជាមួយម្តាយបង្កើតដែលលែងលះគ្នាជាមួយឪពុក តែដោយសារខ្លាចឪពុកមកយកត្រឡប់ទៅវិញក៏ត្រូវបានកងរាជអាវុធហត្ថខេត្តយកមកថែទាំមួយរយៈសិន ដោយសារតែការអណិតកុមារី២នាក់បងប្អូនដែលរងទុក្ខដោយសារតែឪពុកម្ដាយបែកបាក់គ្នា ។ ហើយក៏ត្រូវបានសុំឲ្យបណ្តាញព័ត៌មានជួយផ្សព្វផ្សាយដើម្បីឲ្យសមត្ថកិច្ចជួយអន្តរាគមន៍ចំពោះអំពើហិង្សាមកលើពួកនាង២នាក់បងប្អូនពីសំណាក់ម្តាយចុង និងឪពុកបង្កើតដែលត្រូវបានអះអាងថា គ្មានព្រហ្មវិហារធម៌ ។
ហេតុការណ៍វាយធ្វើបាបនេះបានកើតឡើងនៅភូមិដំណាក់ទ្រព្យខាងត្បូង ឃុំក្រាំងស្នាយ ស្រុកឈូក ខេត្តកំពត ។ កុមារីទាំង២នាក់ឈ្មោះ ង៉ាន់ ស្រីម៉ី អាយុ១៤ឆ្នាំ រៀនថ្នាក់ទី៩ នៅវិទ្យាល័យ ហ៊ុន សែន ឈូក ត្រូវជាបង និងកុមារីឈ្មោះ ង៉ាន់ សាណា អាយុ៩ឆ្នាំ រៀននៅសាលាបឋមសិក្សាវត្តស្ទឹង ។ កុមារីទាំងពីរបានរៀបរាប់ទាំងទឹកភ្នែកឲ្យដឹងថា ពួកនាងទាំងពីរនាក់សព្វថ្ងៃរស់នៅជាមួយឪពុកបង្កើតនិងម្តាយចុងក្រោយពេលដែលគាត់បានលែងលះគ្នា ហើយស្ទើររាល់ថ្ងៃពួកនាងត្រូវម្តាយចុងប្រើឱ្យធ្វើការសព្វបែបយ៉ាងទាំងការងារធ្ងន់ និងស្រាល មិនថាធ្វើខុសឬត្រូវនោះទេក៏ត្រូវម្តាយចុងនោះវាយធ្វើបាបដែរ ។ ជារឿយៗម៉ោង៣ទៅ៤ទៀបភ្លឺតែងតែឱ្យក្រោកឡើងធ្វើការងារផ្ទះ ហើយបើក្រោកយឺត គឺម្តាយចុងវាយមិនរើសមុខគឺប្រទះអីវាយហ្នឹងតែម្តង។
ស្ត្រីជាម្តាយចុងដែលរងការចោទប្រកាន់នេះឈ្មោះ រ៉ង ស្រីលីន អាយុ២៦ឆ្នាំ ប្រកបរបរលក់ដូរ មានកូនបង្កើតខ្លួនឯងពីរនាក់តូចៗ ឪពុកឈ្មោះ ង៉ែត សាវី អាយុជាង៣០ឆ្នាំ អ្នករត់តាក់ស៊ី ។ ពួកនាងនិយាយថា នៅពេលដែលឪពុកមកពីរត់តាក់សីុម្តងៗ បើប្រពន្ធចុងគាត់ទូលពិតរឿងរ៉ាវបែបនេះបែបនោះ ឪពុករូបនេះក៏ស្ទុះទៅវាយធ្វើទារុណកម្មតែម្តងដោយមិនសួរនាំពីហេតុផលអ្វីទាំងអស់ ។ ចំពោះម្តាយបង្កើតរបស់កុមារីទាំងពីរនាក់វិញមានឈ្មោះ ង៉ែត ចិន្តា អាយុ២៧ឆ្នាំ ប្រកបរបរលក់ខោអាវ រស់នៅភូមិ ឡូរី សង្កាត់រកាក្នុង ក្រុងដូនកែវ ស្នាក់នៅជាមួយម្តាយចាស់ជរារបស់ខ្លួន ។
តាមប្រភពព័ត៌មានបានឱ្យដឹងថា ២នាក់ប្តីប្រពន្ធនេះបានលែងលះគ្នាកាលពីឆ្នាំ២០១១ ហើយកូនស្រីទាំង២នាក់ ត្រូវបានសាលក្រមតុលាការប្រគល់ទៅឱ្យឪពុក ព្រោះតែខាងម្តាយក្រីក្រមិនមានលទ្ធភាពចិញ្ចឹម ។
សូមបញ្ជាក់ថា កុមារីទាំងពីរនាក់បងប្អូនដែលបានមកលេងម្ដាយបង្កើត ព្រោះតែការនឹករលឹកនេះ បន្ទាប់ពីបានសុំឪពុកនិងម្តាយចុងមកលេងផ្ទះយាយដែលម្តាយ(ម្តាយបង្កើត)ដែលរស់នៅក្នុងក្រុងដូនកែវ ប៉ុន្តែនៅពេលឲ្យត្រឡប់ទៅផ្ទះឪពុកវិញពួកនាងបានក្រាញននៀលមិនព្រមទៅរស់នៅជាមួយឪពុកនិងម្តាយចុងនៅស្រុកឈូក ខេត្តកំពតវិញទេ ព្រោះខ្លាចម្តាយចុង និងឪពុកវាយធ្វើបាបទៀត ហើយថ្មីៗនេះតាមប្រភពថា បុរសជាឪពុកបានគំរាមកូនឱ្យត្រឡប់ទៅវិញ ។
មានការកត់សម្គាល់ថា កុមារីទាំងពីរនាក់នេះ ពិសេសកូនប្អូនឈ្មោះ ង៉ាន់ សាណា ដោយសារការវាយធ្វើបាបខ្លាំងពេក សភាពពេលនេះមើលទៅនាងហាក់ដូចជាភាំងៗស្មារតី (សតិមិនល្អ) ញាក់ញ័រព្រោះតែការភ័យខ្លាច ហើយឈឺក្បាលជាប់មិនដាច់ទៀតផង ។ ទោះបីជាបែបណា ការស្វែងរកការបំភ្លឺពីលោក ង៉ែត សារី ជាឪពុកនិងស្ត្រីម្តាយចុងមិនទាន់អាចទាក់ទងសាកសួរបានទេ ហើយក៏មិនដឹងថា កុមារីទាំង២ពិតជាទទួលរងការវាយដំបែបនេះឬក៏អត់ ?
ចែករំលែកព័តមាននេះ