រាជធានីភ្នំពេញ ៖ មុខសញ្ញាចោរប្លន់ម៉ូតូ២នាក់ ប្រដាប់ដោយអាវុធខ្លី១ដើម បានចូលទៅធ្វើកាច់សោ.កម៉ូតូ១គ្រឿង ដែលម្ចាស់ចតទុកនៅមុខផ្ទះ ពេលនោះត្រូវបានម្ចាស់ឃើញទាន់ ខណៈពេលដែលចោរនោះកំពុងឡើងជិះម៉ូតូរបស់ខ្លួន ហើយម្ចាស់បានស្រែកឆោរឡោ និងបានចូលទៅចាប់ទាញ…
រាជធានីភ្នំពេញ ៖ មុខសញ្ញាចោរប្លន់ម៉ូតូ២នាក់ ប្រដាប់ដោយអាវុធខ្លី១ដើម បានចូលទៅធ្វើកាច់សោ.កម៉ូតូ១គ្រឿង ដែលម្ចាស់ចតទុកនៅមុខផ្ទះ ពេលនោះត្រូវបានម្ចាស់ឃើញទាន់ ខណៈពេលដែលចោរនោះកំពុងឡើងជិះម៉ូតូរបស់ខ្លួន ហើយម្ចាស់បានស្រែកឆោរឡោ និងបានចូលទៅចាប់ទាញ បណ្ដាលឲ្យដួលម៉ូតដែរ ប៉ុន្តែពេលត្រូវបានចោរម្នាក់ដែលជាបក្ខពួកបានដកកាំភ្លើងខ្លីពីចង្កេះភ្ជង់គំរាមបាញ់សម្លាប់ចោល ដែលជាហេតុធ្វើឲ្យចោរបានលើកយកជិះម៉ូតូជិះចេញក៏បានជ្រុលទៅបុកជាមួយម៉ូតូអ្នកដំណើរ១គ្រឿងទៀត បណ្ដាលឲ្យដួល ប៉ុន្តែចោរមិនបានបោះបង់ចោលម៉ូតូដែលលួចបាននោះទេ បានលើកយកម៉ូតូនោះជិះគេចខ្លួនបាត់ស្រមោល ។
ហេតុការណ៍នោះបានកើតឡើងកាលពីវេលាម៉ោង០៩និង៥០នាទីព្រឹក ថ្ងៃទី០៣ ខែមករា ឆ្នាំ២០១៨ នៅក្នុងបរិវេណផ្ទះមួយកន្លែង ដែលមានទីតាំងស្ថិតនៅតាមបណ្ដោយផ្លូវបេតុង ក្នុងភូមិតាងួន សង្កាត់កាកាប១ ខណ្ឌពោធិ៍សែនជ័យ រាជធានីភ្នំពេញ ។
ចោរដែលជាមុខសញ្ញាចោរលួច ប្លន់នោះមានគ្នា២នាក់ ស្លៀកពាក់ស៊ីវិល ជិះម៉ូតូ១គ្រឿងម៉ាកហុងដាឌ្រីមសេ១២៥ ពណ៌ខ្មៅ និងប្រដាប់កាំភ្លើងខ្លី១ដើមទៀតផង ។ ដោយឡែកបុរសដែលជាជនរងគ្រោះឈ្មោះ គង ជី អាយុ៥១ឆ្នាំ មុខរបររត់ម៉ូតូឌុប មានទីលំនៅកន្លែងកើតហេតុខាងលើ ។ គាត់បានបាត់បង់ម៉ូតូ១គ្រឿងម៉ាកហុងដាឌ្រីមសេ១២៥ ស៊េរីឆ្នាំ២០១៧ ពណ៌ខ្មៅ ពាក់ស្លាកលេខ ភ្នំពេញ ១GP-៥១៣៩ ។
បុរសរងគ្រោះបាននិយាយថា នៅមុនពេលកើតហេតុ គាត់បានទុកម៉ូតនៅក្នុងបរិវេណផ្ទះ ដោយបានចាក់សោត្រឹមត្រូវមិនហ៊ានធ្វេសប្រហែសនោះទេ ព្រោះគាត់បានមើលព័ត៌មានតាមរយៈសារព័ត៌មាននានាជាច្រើន បានដឹងថាការទុកដាក់ម៉ូតូមិនមានការប្រុងប្រយ័តបានធ្វើឲ្យមានការបាត់បង់ច្រើនណាស់មកហើយ ។ បន្ទាប់ពីទុកដាក់ម៉ូតូរួច គាត់បានចូលទៅដាំបាយនៅក្នុងផ្ទះ លុះមួយសន្ទុះក្រោយមកស្រាប់តែឃើញជនសង្ស័យ២នាក់ជិះម៉ូតូម៉ាកហុងដាឌ្រីម១គ្រឿងទៅឈប់នៅមុខផ្ទះរបស់គាត់ ហើយជនសង្ស័យម្នាក់ដែលជិះក្រោយ បានចុះដើរចូលទៅធ្វើសកម្មភាពកាច់សោ.កម៉ូតូរបស់គាត់ បានសម្រេចរួចចោរបានឡើងជិះគេចខ្លួន ។
ពេលនោះគាត់បានរត់ចូលទៅចាប់ទាញធ្វើឲ្យដួលម៉ូតូ ហើយគាត់ប្រុងដណ្ដើមយកម៉ូតូមកវិញដែរ ប៉ុន្តែចោរម្នាក់ទៀតដែលចាំផ្លូវបានដក កាំភ្លើងខ្លីពីចង្កេះភ្ជង់គំរាមបាញ់សម្លាប់ ទើបគាត់ដកថយទាំងព្រលឹងចុងសក់ ហើយចោរមានឱកាសយកម៉ូតូជិះគេខ្លួនបន្តទៀត ។
ប្រភពដដែលបានបន្តទៀតថា ពេលនោះគាត់ភ័យខ្លាំងណាស់ ចំណែកពួកចោរបន្ទាប់ពីជិះម៉ូតូចេញផុតពីផ្ទះគាត់បន្តិចក៏បានជ្រុលទៅបុកជាមួយម៉ូតូអ្នកដំណើរតាមផ្លូវបណ្ដាលឲ្យដួលជាលើកទី២ម្ដងទៀត ប៉ុន្តែពេលនោះមិនបានបណ្ដាលឲ្យរងរបួសនោះឡើយ រួចចោរក៏បានលើកម៉ូតូជិះគេចខ្លួនបន្តទៀត និងបាត់សោយសុវត្ថិភាព ។
ក្រោយពេលកើតហេតុ កម្លាំងនគរបាលប៉ុស្តិ៍កាកាប១ បានចុះទៅកាន់កន្លែងកើតហេតុ សាកសួរជនរងគ្រោះប្រមូលព័ត៌មានដើម្បីកសាងសំណុំរឿងតាមជំនាញ ព្រមទាំងបានឆែកមើលកាមេរ៉ាសុវត្ថិភាពផ្ទះអ្នកជិតខាង និងបានឃើញពីសកម្មភាព និងភិនភាគរបស់ចោរផងដែរ ហើយនគរបាលកំពុងធ្វើការស្រាវជ្រាវ ដើម្បីឈានទៅដល់ការចាប់ខ្លួនចោរលួច ប្លន់ប្រដាប់អាវុធខាងលើនេះ ។
មិនតែប៉ុណ្ណោះនគរបាលបានចាត់ទុកថា ក្រុមចោរខាងលើនេះ មិនមែនត្រឹមតែលួចមួយមុខប៉ុណ្ណោះទេ គឺជាមុខសញ្ញាប្លន់តែម្ដង ពួកនេះចេញធ្វើសកម្មភាពលួច ហើយបើមានឱកាសលួចបានគឺលួច ប៉ុន្តែបើគ្មានឱកាសលួចទេគឺប្លន់តែម្ដង ហើយប្រសិនបើម្ចាស់តដៃអាចបាញ់សម្លាប់ចោលថែមទៀតផង ៕
ចែករំលែកព័តមាននេះ