ជនត្រូវចោទនេះ ស្លា.ប់ក្នុងគុកកន្លះខែមុន ទើបបែកធ្លាយ
- កណ្តាល
ខេត្តកណ្តាល ៖ តាមប្រភពព័ត៌មានឱ្យដឹងថា ជនត្រូវចោទម្នាក់បានលោតសម្លាប់ខ្លួន នៅក្នុងពន្ធនាគារខេត្ត កាលពីថ្ងៃទី១៦ ធ្នូ ឆ្នាំ២០១៧ ហើយទើបតែបែកធ្លាយនៅពេលនេះ តែអ្នកខ្លះថា…
ខេត្តកណ្តាល ៖ តាមប្រភពព័ត៌មានឱ្យដឹងថា ជនត្រូវចោទម្នាក់បានលោតសម្លាប់ខ្លួន នៅក្នុងពន្ធនាគារខេត្ត កាលពីថ្ងៃទី១៦ ធ្នូ ឆ្នាំ២០១៧ ហើយទើបតែបែកធ្លាយនៅពេលនេះ តែអ្នកខ្លះថា…
ខេត្តកណ្តាល ៖ តាមប្រភពព័ត៌មានឱ្យដឹងថា ជនត្រូវចោទម្នាក់បានលោតសម្លាប់ខ្លួន នៅក្នុងពន្ធនាគារខេត្ត កាលពីថ្ងៃទី១៦ ធ្នូ ឆ្នាំ២០១៧ ហើយទើបតែបែកធ្លាយនៅពេលនេះ តែអ្នកខ្លះថា ជាករណីវាយតប់គ្នាទេ ។ ទោះជាបែបណា មជ្ឈដ្ឋានមួយចំនួនរិះគន់អំពីការធ្វេសប្រហែសចំពោះករណីនេះ ។ តាមរបាយការណ៍ពន្ធនាគារអះអាងថា ជនត្រូវចោទលោតសម្លាប់ខ្លួន តែតុលាការកំពុងស៊ើបអង្កេតលើករណីនេះឱ្យពិតប្រាកដថា តើជាករណីលោតសម្លាប់ខ្លួន ឬជាករណីអ្វីផ្សេង ។
ចំណែកប្រភពព័ត៌មានច្បាស់ការណ៍មួយបង្ហើបឱ្យដឹងថា ជនត្រូវចោទឈ្មោះ មុត លីណាន ភេទប្រុស អាយុ៣១ឆ្នាំ ជាប់ចោទពីបទ«ធ្វើឱ្យខូចខាតដោយចេតនា»ប្រព្រឹត្តនៅភូមិទេពអរជូន ឃុំកោះខែល ស្រុកស្អាង កាលពីថ្ងៃទី១២ ខែធ្នូ ឆ្នាំ២០១៧ តាមមាត្រា៤១០នៃក្រមព្រហ្មទណ្ឌ ។ ជននេះត្រូវបានលោក គឹម ម៉េង ចៅក្រមស៊ើបសួរសាលាដំបូងខេត្ត ចេញដីកាឃុំខ្លួនបណ្តោះអាសន្នក្នុងពន្ធនាគារនៅថ្ងៃទី១៣ ខែធ្នូ ឆ្នាំ២០១៧ ។
ប្រភពព័ត៌មានបន្តថា នៅថ្ងៃ១៦ ខែធ្នូ ឆ្នាំ២០១៧ ជនត្រូវចោទបានលោតសម្លាប់ខ្លួនពីលើស៊ីទែនទឹកដ៏ធំមួយក្នុងពន្ធនាគារ តែអ្នកដឹងរឿងខ្លះអះអាងថា ទំនងមិនមែនជាការលោតសម្លាប់ខ្លួនទេ តែជាករណីវាយតប់គ្នាក្នុងពន្ធនាគារ ។ លោក ចាត សីុនាង ប្រធានពន្ធនាគារខេត្តបានឱ្យដឹងថា ពិតជាមានជនជាប់ចោទឡើងលោតពីលើសីុទែនផ្ទុកទឹកក្នុងពន្ធនាគារមែន ហើយគ្រូពេទ្យ នគរបាលយុត្តិធម៌ និងលោកព្រះរាជអាជ្ញារង បានមកធ្វើកោសល្យវិច័យរួចអស់ហើយ ឯសពក៏បានប្រគល់ទៅឱ្យសាច់ញាតិយកទៅធ្វើបុណ្យតាមប្រពៃណីដែរ ។
ទោះបីជាយ៉ាងណា នៅថ្ងៃទី២ ខែមករា លោក ទិន សុចិត្រា អ្នកនាំពាក្យអយ្យការអមសាលាដំបូងខេត្ត បានថ្លែងថា អយ្យការកំពុងស៊ើបអង្កេតករណីនេះ ដោយពុំទាន់សម្រេចថាយ៉ាងណានៅឡើយទេ ។ អ្នកច្បាប់មួយរូបអះអាងថា ជនត្រូវចោទបានស្លាប់ ដូច្នេះសំណុំរឿងនេះត្រូវបានរលត់បណ្តឹងអាជ្ញា ។ នេះបើយោងតាមមាត្រា៧នៃក្រមនីតិវិធីព្រហ្មទណ្ឌ ។
សូមរំឭកថា ជនត្រូវចោទរូបនេះខណៈស្រវឹងបានយកដុំថ្មគប់ផ្ទះរបស់គេ ក៏ត្រូវម្ចាស់ផ្ទះប្តឹងសមត្ថកិច្ចឱ្យឃាត់ខ្លួន ។ ជននេះ កាលពីមុនធ្លាប់ជាប់ពន្ធនាគារម្តងរួចមកហើយ ។ហេតុការណ៍នេះបានកើតឡើងកាលពីថ្ងៃទី១២ ខែធ្នូ ឆ្នាំ២០១៧ វេលាម៉ោង១២និង១០នាទីថ្ងៃត្រង់ នៅផ្ទះរបស់ស្ត្រីឈ្មោះព្រុំ សុវណ្ណ អាយុ៣៩ឆ្នាំ ស្ថិតក្នុងភូមិទេពអរជូន ឃុំកោះខែល ស្រុកស្អាង ។
ប្រភពព័ត៌មានឱ្យដឹងថា នៅថ្ងៃកើតហេតុនោះ ក្រោយពេលផឹកស្រាស្រវឹង ឈ្មោះ មុត លីណាន ក៏នឹកឃើញរឿងគំនុំរវាងរូបគេនិងឈ្មោះ ព្រុំ ភារម្យ ត្រូវជាប្អូនប្រុសរបស់ស្ត្រីឈ្មោះ ព្រុំ សុវណ្ណ ដែលបានប្រព្រឹត្តអំពើហិង្សាកាលពី១០ឆ្នាំមុន ។ ពេលនោះឈ្មោះ មុត លីណាន ក៏យកដុំថ្មនិងដុំឥដ្ឋគប់សំដៅផ្ទះរបស់ស្ត្រីឈ្មោះ ព្រុំ សុវណ្ណ បណ្តាលឱ្យធ្លុះធ្លាយជញ្ជាំងផ្ទះដែលធ្វើពីស័ង្កសី និងទ្វារបង្គន់ធ្វើអំពីជ័រ ។ ក្រោយពីមានករណីនេះកើតឡើង ម្ចាស់ផ្ទះក៏បានប្តឹងទៅនគរបាលប៉ុស្តិ៍កោះខែល ទើបមានការឃាត់ខ្លួនឈ្មោះ មុត លីណាន នាំមកប៉ុស្តិ៍ដើម្បីសាកសួរ ។ កន្លងមក ជនឈ្មោះ មុត លីណាន នេះក៏ធ្លាប់ជាប់ពន្ធនាគារខេត្តរយៈពេល៨ខែដែរ កាលពីឆ្នាំ២០១០ពីបទហិង្សាដោយចេតនា ៕
ចែករំលែកព័តមាននេះ