ខេត្តកណ្តាល ៖ អ្នកលក់សាច់ជ្រូកម្នាក់ បានត្រូវចៅក្រមស៊ើបសួរសាលាដំបូងខេត្តកណ្តាលសម្រេចឃុំខ្លួនក្រោមបទចោទប្រកាន់ «ប៉ុនប៉ងរំលោភសេពសន្ថវៈ» ប្រព្រិត្តឡើងកាលពីថ្ងៃទី២៩ ខែធ្នូ ឆ្នាំ២០១៧។
មន្ត្រីនគរបាលប្រឆាំងបទល្មើសជួញដូរមនុស្ស និងការពារអនីតិជន បានឱ្យដឹងថា នៅថ្ងៃទី៣១ ធ្នូ ២០១៧ លោក ហេង ផេង ព្រះរាជអាជ្ញារងបានសម្រេចចោទប្រកាន់ឈ្មោះ វ៉ាន ម៉ាប់មុខរបរលក់សាច់ជ្រួក ពីបទ «ប៉ុនប៉ងរំលោភ» និងបញ្ជូនទៅកាន់ចៅក្រមស៊ើបសួរលោក ងួន វុទ្ធី ចេញដីកាឃុំខ្លួនបណ្តោះអាសន្នក្នុងពន្ធនាគារ ដើម្បីបើកការស៊ើបអង្កេតឈានៅសម្រេចទោស។
សូមរំលឹកថា កាលពីថ្ងៃសុក្រ ១២កើតខែបុស្ស ឆ្នាំរកា នព្វស័ក ព.ស ២៥៦១ ត្រូវនឹងថ្ងៃទី២៩ ខែធ្នូ ឆ្នាំ២០១៧ វេលាម៉ោង២២យប់ ស្ថិតក្នុងភូមិព្រែកខ្មែរ ឃុំស្អាងភ្នំ ស្រុកស្អាង មានករណីប៉ុនប៉ងចាប់រំលោភមួយនៅក្នុងបន្ទប់ទឹក ។ នារីរងគ្រោះអាយុ២៥ឆ្នាំ ជាកម្មការិនីរោងចក្រ ចំណែកជនសង្ស័យឈ្មោះ វ៉ាន ម៉ាប់ ហៅគឿន អាយុ២៥ឆ្នាំ មុខរបរលក់សាច់ជ្រូក មានទីលំនៅភូមិដំរីឆ្លង ឃុំស្អាងភ្នំ ស្រុកស្អាង។
បើតាមនគរបាលបន្តថា នារីរងគ្រោះបានចូលបន្ទប់ទឹកដោយមិនទាន់បានបិទគន្លឹះទ្វារទេស្រាប់តែជនសង្ស័យមកខ្ទប់មាត់ ដោយដៃម្ខាង និងដៃម្ខាងទៀតច្របាច់ក ហើយបានយកអាវយឺតរបស់ជនសង្ស័យដាក់លើស្មារបស់នារីរងគ្រោះ រួចនិយាយថា «បើហ៊ានស្រែកសម្លាប់ ហើយដុតផ្ទះចោល» ពេលនោះនារីរងគ្រោះមិនហ៊ានស្រែកទេ ទើបជនសង្ស័យបានសើយរ៉ូបបម្រុងរំលោភ និងយកទូរស័ព្ទរបស់ជនសង្ស័យថតរូបស៊ែលហ្វីទៀត។
នគរបាលបន្តទៀតថា នារីរងគ្រោះក៏បានរើបំរះរត់ចេញពីជនសង្ស័យមកក្រៅបន្ទប់ រួចស្រែកឱ្យម្តាយជួយ ភ្លាមនោះជនសង្ស័យក៏គេចខ្លួនបាត់បន្សល់ទុកនៅអាវយឺត១។ លុះនៅថ្ងៃទី៣០ធ្នូ វេលាម៉ោង៩ព្រឹកទើបនារីរងគ្រោះប្តឹងមកសមត្ថកិច្ចប៉ុស្ដិ៍ស្អាងភ្នំ ។ ក្រោយពេលទទួលបានព័ត៌មានខាងលើ សមត្ថកិច្ចបានអញ្ជើញជនសង្ស័យមកសាកសួរ ហើយជនសង្ស័យបានសារភាពថា «ខ្លួនមានសភាពស្រវឹងស្រាបានចាប់ឱបនារីរងគ្រោះនៅក្នុងបន្ទប់ទឹក រួចថតរូប ស៊ែលហ្វី និងបានបន្សល់ទុកអាវយឺត១ពិតប្រាដកមែន»៕
ចែករំលែកព័តមាននេះ