ខេត្តកំពង់ធំ ៖ លោកតា លោកយាយចាស់ជរាមានអាយុចាប់ពី៧៥ឆ្នាំឡើងទៅ ចំនួន១៥៦នាក់រស់នៅឃុំបឹង ស្រុកបារាយណ៍ ខេត្តកំពងធំ បានទទួលការឧបត្ថម្ភជាប្រចាំខែពីលោក ឧកញ៉ា អូស្មាន ហាស្សាន់ ។
នេះជាគម្រោងថ្មីមួយទៀត ក្រោមការផ្តួចផ្តើមគំនិតរបស់លោកឧកញ៉ា អូស្មាន ហាស្សាន់ រដ្ឋមន្ត្រីប្រតិភូអមនាយករដ្ឋមន្ត្រី និងជាប្រធានអង្គការមូលនិធិអភិវឌ្ឍន៍មុស្លិមកម្ពុជា ព្រមទាំងលោកជំទាវ។ ក្នុងយុទ្ធនាការដំបូងនៃគំរោងនេះ ត្រូវបានចាប់ផ្តើមធ្វើឡើងពីឃុំបឹង ស្រុកបារាយណ៍ ខេត្តកំពង់ធំ ដែលបានជ្រើសរើសចាស់ជរា និងអ្នកពិការគ្មានទីពឹងចំនួន ១២០នាក់ មកពីភូមិត្រពាំងឈូក និងភូមិដូនប៉ែន រួមទាំងជនក្រីក្រផង សរុបទាំងអស់ចំនួន ១៥៦នាក់។
ពិធីប្រគល់ប្រាក់ឧបត្ថម្ភនេះ បានរៀបចំឡើងកាលពីព្រឹកថ្ងៃទី៣០ ខែធ្នូ ឆ្នាំ២០១៧ នៅបរិវេណវិហារអ៊ិស្លាម ភូមិត្រពាំងឈូក ដោយមានការអញ្ជើញប្រគល់ឱ្យផ្ទាល់ដៃពីលោកឧកញ៉ា អូស្មាន ហាស្សាន់ និងលោកជំទាវ ដែលជាម្ចាស់ផងដែរ។
ថវិកាដែលឧបត្ថម្ភជាប្រចាំខែនោះក្នុងម្នាក់ៗបានទទួលថវិកាចំនួន៥ម៉ឺនរៀល និងកញ្ចប់គ្រឿងឧបភោគ បរិភោគមួយចំនួនទៀត រួមមានទទួលបានអង្ករចំនួន២០គីឡូក្រាម ត្រីខ ៦កំប៉ុង, ស្ករសរ១គីឡូក្រាម, មី១០កញ្ចប់, ទឹកត្រី២ដប ,និងទឹកស៊ីអ៊ីវ២ដប។
សម្រាប់គំរោងឧបត្ថម្ភចាស់ជរានោះ គឺត្រូវបានកំណត់ជ្រើសរើសចាប់ពីអាយុ៧៥ឆ្នាំឡើងទៅ រួមទាំងជនពិការគ្មានទីពឹង។ នៅក្នុងនោះក៏មានចាស់ជរា ដែលមានអាយុវែងរហូតដល់១១២ឆ្នាំក៏មានដែរ។
លោកឧកញ៉ា អូស្មាន ហាស្សាន់ រដ្ឋមន្ត្រីប្រតិភូអមនាយករដ្ឋមន្ត្រីបានលើកឡើងថា ទោះបីជាការឧបត្ថម្ភនេះមិនច្រើនមែន ប៉ុន្តែនេះជាទង្វើរមនុស្សធម៌ដែលរូបលោក និងភរិយា ព្រមទាំងសហការីទាំងអស់ នឹងអនុវត្តជាបន្តបន្ទាប់ជាប្រចាំខែ ដើម្បីដោះស្រាយទុក្ខលំបាកខ្លះៗរបស់លោកតាលោកយាយចាស់ជរា ដើម្បីជួយសម្រួលដល់ការលំបាក និងម្យ៉ាងទៀតជាការប៉ាវ ដល់លោកយាយលោកតា សម្រាប់អាហារមួយពេលឱ្យឆ្ងាញ់ផងដែរ។
លោកឧកញ៉ាបន្តទៀតថា ក្នុងយុទ្ធនាការដំបូងនេះ លោកចាប់យកឃុំបឹងជាគំរោងដំបូង ហើយនឹងមានបន្តសម្រាប់ខេត្តកំពង់ធំទាំងមូល ក៏ដូចជាខេត្តនានាជាច្រើនទៀត។
លោកបញ្ជាក់ថា នេះជាគំរោងមនុស្សធម៌ដែលមានភាពងាយស្រួល និងបើកចំហដល់សប្បុរសជនទាំងក្នុង និងក្រៅស្រុក ចាប់ផ្តើមងាកមកយកចិត្តទុកដាក់ពីសុខទុក្ខរបស់ចាស់ជរា ។
ក្នុងនាមអ្នកផ្តួចផ្តើមគំរោងនេះឡើង លោករដ្ឋមន្ត្រីប្រតិភូអមនាយករដ្ឋមន្ត្រី ក៏បានជំរាបដល់សាធារណជនឱ្យងាកមកចូលរួមក្នុងវប្បធម៌ចែករំលែក ទោះតិច ឬច្រើនក្តី ព្រោះការបរិច្ចាគ ការចែករំលែកនេះ គឺជាវប្បធម៌ល្អមួយដែលញ៉ាំងឱ្យបុគ្គលនីមួយៗមានសេចក្តីសុខទាំងកាយ និងផ្លូវចិត្ត និងដឹកនាំសង្គមមួយឱ្យកាន់តែមានសន្តិភាព និងសុខដមរមនា៕
អត្ថបទសរសេរ ដោយ
អត្ថបទសរសេរ ដោយ
ចែករំលែកព័តមាននេះ