ខេត្តស្ទឹងត្រែង ៖ នៅលើទីផ្សារខេត្តស្ទឹងត្រែងនាពេលបច្ចុប្បន្ននេះពុំសូវឃើញមានត្រីធំៗត្រីប៉ាវ៉ា រឺប៉ាសេអ៊ី ឡើយ ដោយក្រុមអ្នកប្រកបរបរនេសាទត្រី និងអ្នកទិញត្រីលក់ក្នុងខេត្តស្ទឹត្រែងបានត្អូញត្អែពីការថយចុះនៃប្រាក់ចំណូលប្រចាំថ្ងៃ ដោយសារការនេសាទត្រីមិនបាន ឯអ្នកទិញត្រីលក់នោះវិញក៏គ្មានត្រីច្រើនសម្រាប់លក់នៅក្នុងទីផ្សារនោះដែរ ជាពិសេស ត្រីប៉ាសេអ៊ីដែលគេចាត់ទុកជាប្រភេទត្រីកម្រ ដោយពួកគាត់បានអះអាងថា ផលត្រីឆ្នាំនេះតិចជាងឆ្នាំមុនៗ ចំណែក មន្ត្រីជំនាញក៏ទទួលស្គាល់ថា ផលនេសាទពិតជាមានការថយចុះពិតមែន ។
ប្រជានេសាទ និងអ្នកទិញលក់ត្រីដែលមានលំនៅដ្ឋានប្របនឹងដងទន្លេមេគង្គ និងទន្លេសេកុងក្នុងខេត្តស្ទឹងត្រែង លោកបានអះអាងទៀតថា ផលនេសាទឆ្នាំនេះមានការថយចុះខុសពីឆ្នាំមុនៗដែលអាចមកពីកត្តាពីរយ៉ាង គឺដោយសារមានការប្រែប្រួលនៃអាកាសធាតុរាំង ហើយភ្លៀងមិនទៀតទាត់ និងការបិទទំនប់វារីអគ្គិសនីដនសាហុង នៅទន្លេមេគង្គក្នុងប្រទេសឡាវ និងការបិទទំនប់ទឹកសេសាន្តក្រោម២ នៅទន្លេសេកុង ក្នុងស្រុកសេសាន្ត ខេត្តស្ទឹងត្រែង ធ្វើឲ្យត្រីដែលធ្លាប់ផ្លាស់ទីពីទន្លេមេគង្គផ្នែកខាងក្រោមទៅពួនជ្រកនៅទន្លេមេគង្គលើ ដើម្បីបង្កកំណើតពង កូនទៅតាម រដូវកាលនោះ ខណៈនេះពពួកត្រីទាំងនេះមិនអាចធ្វើការបម្លាស់ទីចុះមកទន្លេមេគ្គ និងទន្លេសេកុងផ្នែកខាងក្រោម វិញបាននោះទេ ព្រោះត្បិតទំនប់ទឹកមានទំហំធំឯកម្ពស់ទំនប់ទឹកក៏ខ្ពស់ វាជាឧបសគ្គមួយយ៉ាងធំ ដែលមិនអាចធ្វើឲ្យត្រីចុះ និងឡើងបង្កកំណើតបាននោះទេ ។
អ្នកនេសាទនៅតែអះអាងទៀតថា នៅក្នុងរដូវរំហើយនេះកាលពីឆ្នាំមុនពួកគាត់ធ្វើការនេសាទបានច្រើនគួរសម អាចយកត្រីមកធ្វើជាផ្អក ប្រហុក និងនាំយកមកលក់នៅលើទីផ្សារ ដើម្បីដោះដូរជីវភាពបានគ្រាន់បើដែរ ហើយពូជត្រីសំខាន់ៗ និងមានតម្លៃខ្ពស់ដូចជា ត្រីប៉ាសេអ៊ី ត្រីប៉ាវ៉ា ត្រីក្លាំងហាយ ត្រីសណ្តាយ ត្រីកេស ត្រីខ្លា និងត្រីដំរីជាដើមនោះ នៅរដូវធ្លាក់ខ្យល់ឆ្នាំនេះ ពួកគាត់នេសាទមិនបានជួបប្រទះនោះទេ ។
នាយខណ្ឌរដ្ឋបាលជលផលខេត្តស្ទឹងត្រែងលោកទុំ នីរ៉ូ លោកបានទទួលស្គាល់ថា ផលត្រី ឆ្នាំនេះពិតជាមានការថយចុះនោះមែន ជាពិសេសត្រីប៉ាសេអ៊ីជា ប្រភេទត្រីកម្រ និងមានតម្លៃខ្ពស់មានការថយចុះ នៃបរិមាណ ការថយចុះនេះ គឺអាចបណ្តាលមកពីកត្តាច្រើនយ៉ាង ក្នុងនោះមានពីរសំខាន់ៗ គឺកត្តាមនុស្ស និងធម្មជាតិ ។
លោកនីរ៉ូ បានបញ្ជាក់ថា ការថយចុះនៃបរិមាណត្រីនេះក៏មានការពាក់ព័ន្ធទៅនឹងការសាងសង់ នូវទំនប់វារីអគ្គិសនីធំៗពីរ គឺទំនប់ដនសាហុង សង់កាត់ទន្លេមេគង្គ ក្នុងប្រទេសឡាវ និងទំនប់សេសាន្ត២ សង់កាត់ទន្លេសេកុង ក្នុងស្រុកសេសាន្ត ខេត្តស្ទឹងត្រែងក៏ជាចំណែកមួយធ្វើឲ្យមានការថមថយនៃពពួកត្រីទាំងនេះដែរ រួមផ្សំជាមួយនឹងការធ្វើនេសាទ ដោយប្រើឧបរណ៍ ល្មើសច្បាប់ នោះផងទៀត ។
លោកបញ្ជាក់ទៀតថា ដើម្បីការពារពូជត្រីកម្រនេះ លោកបានចាត់មន្ត្រីឲ្យចុះទប់ស្កាត់ និងបង្ក្រាបបទល្មើសនេសាទនេះ ដោយធ្វើឡើងមានពីរផ្នែក គឺផ្នែកទន់ និងផ្នែករឹងដោយលោកបានចុះធ្វើការផ្សព្វផ្សាយពីច្បាប់ជលផល ដល់ប្រជាពលរដ្ឋ និងអ្នកនេសាទឲ្យយល់ដឹង និងបញ្ឈប់ការប្រើប្រាស់ឧបករណ៍នេសាទខុសច្បាប់ និងនៅក្នុងឆ្នាំ២០១៧នេះ រដ្ឋបាលជលផល បានចុះឃាត់ខ្លួនជនសង្ស័យ២នាក់ រឹបអូសមងប្រវែង២ម៉ឺន៧ពាន់ ៨៧៨ម៉ែត្រ សន្ទូចរនង៥ពាន់ ១១ផ្លែ និងបំផ្លាញចោលសាច់ដាយ១០មាត់ ២៥៨ម៉ែត្រ រឹបអូសទូក១គ្រឿង ថ្មស្អុយ២តោន បង្គោល២០០ដើម ព្រួល១០០ម៉ែត្រ ទូក និងម៉ាស៊ីន៥គ្រឿង ក្បាលឆក់៦គ្រឿង អាគុយ១ គោមភ្លើង១ ថ្នងដងត្រី៣ រំសេវ១កំប៉ុង ស្រកីដូងសំរាប់កែច្នៃគ្រាប់បំផ្ទុះ១ដុំ និងបានអប់រំណែនាំដល់ប្រជានេសាទ២១៦នាក់ និងធ្វើកិច្ចសន្យាបញ្ឈប់ការប្រើប្រាស់ឧបករណ៍នេសាទខុសច្បាប់៩៩នាក់នោះថែមទៀត ៕
ចែករំលែកព័តមាននេះ