ខេត្តតាកែវ ៖ ការិយាល័យបុគ្គលិក នៃស្នងការដ្ឋាននគរបាលខេត្ត បានទទួលរងការចោទប្រកាន់ពីមន្ត្រីនគរបាលដែលទទួលការដំឡើងស័ក្តិថា បានកំណត់ឲ្យមន្ត្រីនគរបាលណាដែលត្រូវដំឡើងស័ក្តិ ត្រូវបង់លុយជាកំណត់ទៅតាមការបំពាក់ស័ក្តិនីមួយៗ ហើយមានមន្ត្រីនគរបាលខ្លះបង់ហើយ និងខ្លះទៀតបង់ឲ្យទាំងបង្ខំចិត្ត ករណីបែកធ្លាយការិយាល័យបុគ្គលិកនេះគឺយោងតាមឯកសារដែលប្រព្រឹត្តទៅនៅថ្ងៃទី១២…
ខេត្តតាកែវ ៖ ការិយាល័យបុគ្គលិក នៃស្នងការដ្ឋាននគរបាលខេត្ត បានទទួលរងការចោទប្រកាន់ពីមន្ត្រីនគរបាលដែលទទួលការដំឡើងស័ក្តិថា បានកំណត់ឲ្យមន្ត្រីនគរបាលណាដែលត្រូវដំឡើងស័ក្តិ ត្រូវបង់លុយជាកំណត់ទៅតាមការបំពាក់ស័ក្តិនីមួយៗ ហើយមានមន្ត្រីនគរបាលខ្លះបង់ហើយ និងខ្លះទៀតបង់ឲ្យទាំងបង្ខំចិត្ត ករណីបែកធ្លាយការិយាល័យបុគ្គលិកនេះគឺយោងតាមឯកសារដែលប្រព្រឹត្តទៅនៅថ្ងៃទី១២ ខែធ្នូ ឆ្នាំ២០១៧ ថ្មីៗនេះ ហើយបន្ទាប់មកស្នងការដ្ឋានក៏បានបើកកិច្ចប្រជុំបូកសរុបសភាពការណ៍ប្រចាំខែធ្នូ និងលើកទិសដៅបន្ត និងផ្ទេរភារៈកិច្ចមុខតំណែង បំពាក់ឋានន្តរស័ក្តិឲ្យមន្ត្រីនគរបាលជាតិនៅថ្ងៃទី២៧ ខែធ្នូ ឆ្នាំ២០១៧ ។
មន្ត្រីនគរបាលដែលត្រូវបានដំឡើងស័ក្តិបានបញ្ជាក់ប្រាប់កោះសន្តិភាពយើងថា ក្នុងការបង់លុយនោះ មានមន្ត្រីនគរបាលដែលពាក់ស័ក្តិ១ខ្លះបង់១០ម៉ឺនរៀល ស័ក្តិ២ខ្លះ២០ម៉ឺនរៀល រហូតដល់ខ្លះទៀតជាង១០០ដុល្លារក៏មាន ។ ទាក់ទិននឹងករណីនេះ បានកើតឡើងនៅអធិការដ្ឋានស្រុកអង្គរបុរី ស្រុកបូរីជលសារ នៅមានស្រុកផ្សេងទៀតក៏មានដែរ ។
នៅវេលាម៉ោង០៩និង៥៣នាទីព្រឹក ថ្ងៃទី២៨ ខែធ្នូ ឆ្នាំ២០១៧ នេះ លោក ភី ឆុន អធិការស្រុកអង្គរបុរីបានថា បញ្ហារឿងប្រមូលលុយកាក់នេះ លោកមិនបានដឹងទេ ខាងការិយាល័យបុគ្គលិក នៃស្នងការដ្ឋានខេត្តបានដឹង ព្រោះខាងនោះគេជាអ្នកធ្វើ ។ ចំណែកលោកស័ក្តិ៥ ឃី វណ្ណា ប្រធានការិយាល័យបុគ្គលិក នៃស្នងការដ្ឋានខេត្ត បានឲ្យដឹងមុនថ្ងៃបំពាក់ស័ក្តិថា លោកមិនបានយកដល់១០ឬ២០ម៉ឺនរៀល ឬមួយរាប់រយដុល្លារនោះទេ លោកយកត្រឹមតែ២ ឬ ៣ម៉ឺនប៉ុណ្ណោះទេ សម្រាប់ទិញកាវបិទស័ក្តិ នឹងធ្វើឯកសាផ្សេងៗ ដោយមិនបានកំណត់ឲ្យបង់ទេ ៕
ចែករំលែកព័តមាននេះ