ខេត្តកំពត ៖ បុរសម្នាក់បានស្លាប់ក្នុងសភាពខ្ទេចជើងដៃនិងក្បាលគួរឲ្យរន្ធត់នៅនឹងកន្លែងកើតហេតុ និងម្នាក់ទៀតរងរបួសធ្ងន់នៅត្រង់ក្បាល ហើយពេលបញ្ជូនទៅមន្ទីរពេទ្យ ក៏ស្លាប់ដែរនៅតាមផ្លូវ ក្រោយពីជួបគ្រោះថ្នាក់រថយន្តធំ២គ្រឿងបុកគ្នា នៅលើកំណាត់ផ្លូវជាតិលេខ៣(កំពត-ព្រះសីហនុ) ។
ប្រភពព័ត៌មានឱ្យដឹងថា ហេតុការណ៍គ្រោះថ្នាក់នេះ កើតឡើងកាលពីវេលាម៉ោង៤និង៤៥នាទីល្ងាចថ្ងៃទី២៥ ខែធ្នូ រវាងរថយន្តដឹកស្រូវ បុកគ្នាជាមួយរថយន្តសណ្តោង នៅគល់ស្ពានព្រែកត្នោត ស្ថិតក្នុងភូមិព្រែកគ្រែង ឃុំព្រែកត្នោត ស្រុកទឹកឈូ ។ប្រភពព័ត៌មានដដែលឲ្យដឹងទៀតថា រថយន្តសណ្តោងក្បាលពណ៌លឿង ធ្វើដំណើរមកពីកើតទៅលិច ឯរថយន្តដឹកស្រូវពណ៌ខៀវ ធ្វើដំណើរក្នុងទិសដៅបញ្ច្រាសគ្នា លុះទៅដល់ចំណុចខាងលើស្រាប់តែរេចង្កូតបុកគ្នាពេញទំហឹងតែម្តង ។
ក្នុងគ្រោះថ្នាក់នេះ បណ្តាលឲ្យខាងរថយន្តដឹកស្រូវស្លាប់ម្នាក់ភ្លាមៗ និងរបួសធ្ងន់ម្នាក់តែពេលបញ្ជូនទៅមន្ទីរពេទ្យក៏ស្លាប់នៅតាមផ្លូវទៀត ហើយរថយន្តដឹកស្រូវបានក្រឡាប់ផ្អៀងចាក់បាវស្រូវចេញពីរថយន្ត ។
តាមអ្នកឃើញហេតុការណ៍និយាយថា ការបុកគ្នានេះអាចមកពីសភាពផ្លូវនៅចំណុចគល់ស្ពានមានរាងកោងដូចដងនង្គ័ល ស្របពេលមានភ្លៀងធ្លាក់ស្រិចៗផង ទើបរថយន្តទាំង២គ្រឿងជាន់ហ្វ្រាំងមិនសុី ហើយរេចង្កូតទៅបុកគ្នាចំពីមុខទាំងកំរោលតែម្តង ។ សមត្ថកិច្ចជំនាញនិយាយថា គ្រោះថ្នាក់បែបនេះផ្តើមមកពីកត្តាមនុស្សសុទ្ធសាធ ពោលគឺការបើកបរខ្វះការប្រុងប្រយ័ត្ន បើកបរដោយគ្មានការយោគយល់គ្នា និងក្នុងល្បឿនលឿនដូចគ្នា ។ ម្យ៉ាងទៀត ចំណុចស្ពានព្រែកត្នោតជាកំណាត់ផ្លូវមានសភាពកោងខ្លាំងហើយឧស្សាហ៍មានគ្រោះថ្នាក់ចរាចរណ៍ជាញឹកញាប់ ។
មន្ត្រីនគរបាលឲ្យដឹងទៀតថា អ្នកស្លាប់ក្នុងករណីនេះ ម្នាក់ឈ្មោះ ណី ចំរើន ភេទប្រុស អាយុ៣២ឆ្នាំ (អ្នកបើកបររថយន្តដឹកស្រូវ) មានទីលំនៅក្នុងភូមិ៣ សង្កាត់លេខ៤ ខេត្តព្រះសីហនុ និងម្នាក់ទៀតជាព្រូរថយន្តដឹកស្រូវ ឈ្មោះ នូ កា ភេទប្រុស អាយុ១៨ឆ្នាំ ស្នាក់នៅភូមិបឹងវែង ឃុំវាលរេញ ស្រុកព្រៃនប់ ខេត្តព្រះស៊ីហនុ ។ បើតាមការអ្នកស្រី រ័ត្ន សារិន អាយុ៥០ឆ្នាំ ជាម្ចាស់រថយន្តដឹកស្រូវ បានឲ្យដឹងថា រថយន្តដែលដឹកស្រូវជួបគ្រោះថ្នាក់នេះ គឺជារថយន្តធ្លាប់តែដឹកមេរុបូជាសព ហើយទាំងរថយន្តទាំងអ្នកបើកបរ គឺជាអ្នកស៊ីឈ្នួលបើករថយន្តឲ្យគាត់ទេ ។ ប៉ុន្មានថ្ងៃនេះ ដោយអត់មានអ្នកស្លាប់និងជួលមេរុ ទើបអ្នកបើកបរសុំជួលរថយន្តរបស់គាត់ទៅស៊ីឈ្នួលដឹកស្រូវឲ្យអ្នកផ្សេងទៅលក់នៅព្រៃទន្លេ ក្នុងស្រុកបន្ទាយមាស ព្រំដែនវៀតណាម ប៉ុន្តែមិនទាន់ដល់គោលដៅផងក៏ជួបគ្រោះថ្នាក់បែបនេះទៅ ។
មន្ត្រីនគរបាលចរាចរណ៍ខេត្តឲ្យដឹងថា រីឯអ្នកបើកបររថយន្តសណ្តោងឈ្មោះ ស្រី ចន្ថា ភេទប្រុស អាយុ៤៣ឆ្នាំ មានទីលំភូមិត្រសេកកោង ឃុំថ្មី ស្រុកទឹកឈូ រងរបួសធ្ងន់បាក់ជើងម្ខាង ត្រូវបានបញ្ជូនទៅសង្គ្រោះនៅប្រទេសវៀតណាម ។ក្រោយកើតហេតុ រថយន្តទាំង២គ្រឿងត្រុវបាននាំយកទៅរក្សាទុកនៅអធិការដ្ឋាននគរបាលស្រុកទឹកឈូ ដើម្បីដោះស្រាយគ្នានៅពេលក្រោយ ៕
ចែករំលែកព័តមាននេះ