ខេត្តប៉ៃលិន ៖ បុរសម្នាក់បានរងរបួសធ្ងន់បែកមុខ និងរយះដៃជើងសន្លប់នៅនឹងកន្លែង ខណៈជិះម៉ូតូទៅលេងផ្ទះបងប្អូននៅក្រុងប៉ៃលិន លុះពេលត្រឡប់ទៅផ្ទះវិញ ត្រូវបានរថយន្តមិនស្គាល់ម៉ាកមួយគ្រឿង បើកទៅកៀរចំពីក្រោយពេញទំហឹង បណ្ដាលឱ្យដួលម៉ូតូរងរបួសធ្ងន់សន្លប់តែម្តង ។ ក្រោយកើតហេតុ ត្រូវបានរថយន្តសង្គ្រោះរបស់មន្ទីរពេទ្យបង្អែកខេត្ត ដឹកយកទៅព្យាបាល និងលាងឲ្យរបួស ។
ហេតុការណ៍គ្រោះថ្នាក់ចរាចរនេះ បានកើតឡើងកាលពីវេលាម៉ោងឥ០៥និង៣០នាទីល្ងាច ថ្ងៃទី២៦ ខែធ្នូ ឆ្នាំ២០១៧ ស្ថិតនៅចំណុចខាងត្បូងចំណតរថយន្តឈ្នួលក្រុងប៉ៃលិន ក្នុងភូមិដីក្រហម សង្កាត់អូរតាវ៉ៅ ក្រុងប៉ៃលិន ខេត្ដប៉ៃលិន ។
បើតាមប្រភពព័ត៌មានពីមន្ត្រីនគរបាលចរាចរណ៍ជើងគោក នៃស្នងការដ្ឋានខេត្តប៉ៃលិន បានឱ្យដឹងថា ករណីគ្រោះថ្នាក់ចរាចរខាងលើនេះ បង្កឡើងដោយរថយន្តមិនស្គាល់អត្តសញ្ញាណមួយគ្រឿង បានបើកបរទៅបុកម៉ូតូមួយគ្រឿងដែលកំពុងតែជិះម្នាក់ឯង តាមបណ្តោយផ្លូវជាតិលេខ៥៧ បណ្ដាលឱ្យជនរងគ្រោះម្នាក់ឈ្មោះ ណាន ភេទប្រុស អាយុ៣៧ឆ្នាំ ជាកសិករ រស់នៅភូមិកើតហេតុ (រងរបួសធ្ងន់) ។ ប្រភពបន្តទៀតថា ជនរងគ្រោះជិះម៉ូតូម៉ាកវ៉េវ ពណ៌ក្រហម ពាក់ស្លាកលេខ ប៉ៃលិន ១B-០០៩៤ រងការខូចខាតទាំងស្រុង ។
ចំណែកប្រភពព័ត៌មានពីប្រជាពលរដ្ឋរស់នៅជិតកន្លែងកើតហេតុបានឱ្យដឹងថា នៅពេលមុនកើតហេតុ ពួកគាត់បានឃើញម៉ូតូមួយគ្រឿងកំពុងតែបើកបរម្នាក់ឯង ក្នុងទិសដៅពីជើងទៅត្បូង រួចក៏ជិះបត់ឆ្វេងឆ្លងផ្លូវថ្នល់ផុតគំនូសកណ្ដាល ស្រាប់តែមានរថយន្តមួយគ្រឿងបានរបើកបរមកពីក្រោយ ក្នុងល្បឿនលឿនស្របទិសគ្នា បណ្ដាលឱ្យរេចង្កូតទៅកៀរអ្នកជិះម៉ូតូដួល រងរបួសធ្ងន់សន្លប់ម្នាក់ឯងតែម្តង ។ ក្រោយមកជនរងគ្រោះត្រូវបានរថយន្តសង្គ្រោះរបស់មន្ទីរពេទ្យបង្អែកខេត្តប៉ៃលិន ដឹកយកទៅព្យាបាល និងលាងរបួសភ្លាមៗ ។ ចំណែករថយន្តដែលបានបើកកៀរជនរងគ្រោះ បានបន្ថែមល្បឿនរត់គេចខ្លួនបាត់ស្រមោល ហើយត្រូវបានសមត្ថកិច្ចកំពុងតាមស្រាវជ្រាវ ដើម្បីចាប់ម្ចាស់យកមកដោះស្រាយតាមផ្លូវច្បាប់ ៕
ចែករំលែកព័តមាននេះ