រាជធានីភ្នំពេញ ៖ អ្នកនាងនី មុល្លីកា ជាតារាភាពយន្តល្បីឈ្មោះធ្លាប់សាងស្នាដៃច្រើនបញ្ចាំងនៅទូរទស្សន៍ស៊ីធីអិន ក្រោមការដឹកនាំរឿងរបស់អ្នកស្រីពាន់ ភួងបុប្ជា ។ បច្ចុប្បន្នអតីតតារាសម្តែងរូបនេះរស់នៅអាមេរិក ហើយទើបសម្រាលកូនស្រីទី២ ។
នី មុល្លីកា បានចូលរោងការជាមួយលោក គឹម ប៊ុណ្ណា ជាវិស្វករអាយុ៤១ ឆ្នាំរស់នៅរដ្ឋអូហៃយ៉ូ សហរដ្ឋអាមេរិក កាលពីអំឡុងខែវិច្ឆិកា ឆ្នាំ២០១១។ បន្ទាប់ពីរៀបការរួចមិនយូរប៉ុន្មាន នី មុល្លីកា ត្រូវស្វាមីធានាចេញទៅរស់នៅជាមួយ ហើយនាងទទួលបានកូនប្រុសម្នាក់កាលពីអំឡុងខែឧសភា ឆ្នាំ២០១៦ ។
អ្នកនាងនី មុល្លីកា ជាតួឯកស្រីក្នុងរឿង«កុមារីអាយុ២៥ឆ្នាំ» បានបង្ហាញរូបភាពជាច្រើន សន្លឹកនៅលើហ្វេសប៊ុករបស់នាង នាពេល ថ្មីៗកន្លងមក ជារូបភាពនៃការពពោះកូនស្រីដែលនាងចង់បានជាយូរមកហើយ បន្ទាប់ពីមានកូនច្បងជាកូនប្រុស ។ កូនប្រុសរបស់នាងមានឈ្មោះជាភាសាអង់គ្លេសថា «Zachary» ។
ក្រោយពពោះជាច្រើនខែ កាលពីដើមសប្តាហ៍មុននេះនី មុល្លីកា សម្រាលបានកូនស្រី ។ កូនស្រីរបស់នាងដាក់ឈ្មោះថា«ណាតាលី(Natalie)»។ នាងបានបង្ហោះរូបភាពចុងក្រោយ ដែលបង្ហាញពីការសម្រាលបានកូនស្រីម្នាក់ដែលមានសុខភាពរឹងមាំ ។ មកដល់ពេលនេះកូនរបស់នាងមានវ័យជិត១០ថ្ងៃហើយ ។
ក្រៅពីសារជូនពរជាច្រើនពីអ្នកគាំទ្រតាមហ្វេសប៊ុក មានអ្នកមួយចំនួនស្នើឲ្យនី មុល្លីកា វិលមកចាប់អាជីពសម្តែងជាថ្មី ប៉ុន្តែមិនទទួលបានការឆ្លើយតបពីនាងទេ ។
ក្រោយពេលមិនជាប់ជ័យលាភីក្នុងកម្មវិធី ប្រលងស្រីស្រស់ប្រុសស្អាតឆ្នាំ២០០៥ របស់ ស្ថានីយទូរទស្សន៍ CTN មក នី មុល្លីកា ទទួលបានឱកាសច្រើនក្នុងការសម្តែងភាពយន្តភាគរបស់ទូរទស្សន៍មួយនេះ ក្រោមការដឹកនាំរឿងរបស់អ្នកស្រីពាន់ ភួងបុប្ផា ។ អំឡុងពេលនោះនី មុល្លីកា ល្បីឈ្មោះក្នុងស្រទាប់មហាជន ៕
ចែករំលែកព័តមាននេះ