ខេត្តកណ្ដាល ៖ នៅស្នងការដ្ឋាននគរបាលខេត្តកណ្តាល បានកម្ទេចមាន់ជល់ចំនួន៩២ក្បាល ដែលបង្ក្រាបបាននៅឃុំអរិយក្សត្រ ស្រុកល្វាឯម នៅព្រឹកថ្ងៃទី២៧ ខែធ្នូ ឆ្នាំ២០១៧នេះដែលមានម្ចាស់ទីតាំងឈ្មោះថៃ ផានី ហៅម៉ាប់ កូនប្រសារលោកហ៊ុន សាន ។
ដីកាសម្រេចលោកហុក វ៉ាន់ធីណា ប្រធានសាលាដំបូងខេត្តកណ្តាល និងជាចៅក្រមស៊ើបសួរព្រមទាំងលោកឯក ស៊ុនរស្មី ព្រះរាជអាជ្ញារងនៃអយ្យការអមសាលាដំបូងខេត្តកណ្តាល យល់ឃើញថា «ការថែរក្សានូវមាន់ជល់ចំនួន៩២ក្បាល មានការលំបាក និងចំណាយសោហ៊ុយផ្សេងៗ ដើម្បីបង្ការកុំឱ្យមានបទល្មើសកើតឡើងជាថ្មី និងពន្លឿននីតិវិធីនៃការស៊ើបសួរឱ្យបានឆាប់រហ័ស គប្បីចៅក្រមស៊ើបសួរកម្ទេចចោលនូវមាន់ជល់ចំនួន៩២ក្បាលនេះ »។
គួររំលឹកថា ម្ចាស់សង្វៀនជល់មាន់ដ៏ធំនៅឃុំអរិយក្សត្រ ខេត្តកណ្ដាល និង នៅស្រុកបាទី ខេត្តតាកែវ លោក ថៃ ផានី ហៅម៉ាប់អូស្ត្រាលី ត្រូវបានបញ្ជូនទៅពន្ធនាគារហើយ កាលពីល្ងាចថ្ងៃទី០៥ ខែធ្នូ ឆ្នាំ២០១៧ ដើម្បីរង់ចាំការស៊ើបសួរបន្តទៀត ។ រីឯអ្នកលេងល្បែងជល់មាន់៦៤នាក់ ត្រូវបានតុលាការតុលាការជំនុំជម្រះភ្លាម រួចផ្តន្ទាទោសមួយខែតែទោសនេះត្រូវព្យួរ ហើយដោះលែងឱ្យមានសេរីភាពឡើងវិញ ។
មន្ត្រីតុលាការបញ្ជាក់ថា លោក ថៃ ផានី ហៅម៉ាប់អូស្ត្រាលី ត្រូវបានលោក ឯក ស៊ុនរស្មី ព្រះរាជអាជ្ញារងនៃអយ្យការអមសាលាដំបូងខេត្តកណ្ដាល ចោទប្រកាន់ពីបទ”ភ្នាក់ងារល្បែងស៊ីសងខុសច្បាប់ តាមមាត្រា៥ច្បាប់ស្តីពីការបង្ក្រាបល្បែងស៊ីសង ។
សូមបញ្ជាក់ថា ម្ចាស់សង្វៀនជល់មាន់ដ៏ធំចំនួនពីរកន្លែង ត្រូវបានបញ្ជូនទៅសួរនាំបន្ត នៅស្នងការដ្ឋាននគរបាលខេត្តកណ្តាល នាព្រឹកថ្ងៃទី០៥ ខែធ្នូ ឆ្នាំ២០១៧ បន្ទាប់ពីរូបគេបានចូលខ្លួនប្រគល់ឲ្យនគរបាលព្រហ្មទណ្ឌក្រសួងមហាផ្ទៃ ។ លោកឧត្តមសេនីយ៍ទោអ៊ាវ ចំរើន ស្នងការនគរបាលខេត្តកណ្ដាលបញ្ជាក់ថា តាមតួលេខចុងក្រោយ ដែលត្រូវបានសមត្ថកិច្ចឃាត់ខ្លួនពាក់ព័ន្ធក្នុងរង្វង់ប្រតិបត្តិការចុះបង្ក្រាប មានចំនួន៦៤នាក់ ខណៈដំបូងមនុស្សជាង១៥០នាក់ ត្រូវបានឃាត់ខ្លួនជាបណ្តោះអាសន្ន ប៉ុន្តែខ្លះជាជាងសំណង់ ក៏អនុញ្ញាតឱ្យត្រឡប់ទៅវិញ។ សម្រាប់វត្ថុតាងដែលត្រូវបានរឹបអូសវិញ ។ លោកស្នងការបានបញ្ជាក់ថា រថយន្តមានចំនួនជិត៦០គ្រឿង ម៉ូតូជាង១០០គ្រឿង ព្រមទាំងមាន់ជល់ជាង១០០ក្បាល ។
ចំណាត់ការដ៏ក្តៅរបស់សមត្ថកិច្ចនេះបន្ទាប់ពីមានបទបញ្ជាដាច់ណាត់របស់សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជាបញ្ជាឱ្យម្ចាស់សង្វៀនជល់មាន់ល្មើសច្បាប់ដ៏ធំនៅអរិយក្សត្រ ខេត្តកណ្តាល និងនៅស្រុកបាទីខេត្តតាកែវ ឱ្យប្រគល់ខ្លួនឱ្យកម្លាំងសមត្ថកិច្ច ព្រហ្មទណ្ឌក្រសួងមហាផ្ទៃ ។
សម្តេចតេជោផ្តល់បទសម្ភាសន៍ជាមួយសារព័ត៌មានក្នុងស្រុកមួយថា «ខ្ញុំបញ្ជាឱ្យអ្នកនៅពីក្រោយខ្នងករណីបើកសង្វៀនជល់មាន់ដ៏ធំនៅអរិយក្សត្រ ខេត្តកណ្តាល ប្រគល់ខ្លួនឱ្យសមត្ថកិច្ចជាបន្ទាន់ ។ បើពួកគេមិនប្រគល់ខ្លួនទេ ខ្ញុំនឹងបញ្ជាឱ្យសមត្ថកិច្ចតាមចាប់ខ្លួនឱ្យខាងតែបាន ដើម្បីចាត់វិធានការតាមផ្លូវច្បាប់ដោយគ្មានការលើកលែង ឬបន្ធូបន្ថយ បើទោះអ្នកទាំងនោះជាក្មួយ ឬក៏ក្មួយប្រសារបស់ខ្ញុំក៏ដោយ» ។ ប្រតិបត្តបង្ក្រាបសង្វៀនជល់មាន់ទ្រង់ទ្រាយធំនេះ កម្លាំងនគរបាលរបស់លោកប្រមាណ១៥០នាក់ សហការជាមួយកម្លាំងអាវុធហត្ថជាង២០នាក់ ៕
ចែករំលែកព័តមាននេះ