ពិធីតែងតាំងអភិបាលស្រុកបាកានថ្មី
- ពោធិ៍សាត់
ខេត្តពោធិ៍សាត់ ៖ ដើម្បីពង្រឹងក្បាលម៉ាស៊ីនដឹកនាំឲ្យកាន់តែរឹងមាំនៅថ្នាក់មូលដ្ឋាន លោក ម៉ៅ ធនិន អភិបាល នៃគណៈអភិបាលខេត្តពោធិ៍សាត់ បានអញ្ជើញជាអធិបតីភាព ក្នុងពិធីប្រកាសចូលកាន់មុខតំណែង…
ខេត្តពោធិ៍សាត់ ៖ ដើម្បីពង្រឹងក្បាលម៉ាស៊ីនដឹកនាំឲ្យកាន់តែរឹងមាំនៅថ្នាក់មូលដ្ឋាន លោក ម៉ៅ ធនិន អភិបាល នៃគណៈអភិបាលខេត្តពោធិ៍សាត់ បានអញ្ជើញជាអធិបតីភាព ក្នុងពិធីប្រកាសចូលកាន់មុខតំណែង អភិបាល នៃគណៈអភិបាលស្រុកបាកាន ដែលបានប្រារព្ធធ្វើកាលពីថ្ងៃទី២៥ ខែធ្នូ ឆ្នាំ២០១៧ នៅសាលាស្រុកបាកាន ។
តាមអនុក្រឹត្យរបស់រាជរដ្ឋាភិបាលកម្ពុជា លេខ១៣៨៩ អនក្រ.តត ចុះថ្ងៃទី១២ ខែធ្នូ ឆ្នាំ២០១៧ និងប្រកាសរបស់ក្រសួងមហាផ្ទៃ លេខ៧១៨២ ប្រក ចុះថ្ងៃទី១៤ ខែធ្នូ ឆ្នាំ២០១៧ ត្រូវបានសម្រេចផ្ទេរភារកិច្ច និងតែងតាំងមុខតំណែង លោក ផាយ ឡេង ឋានន្តរស័ក្តិវរមន្ត្រី ថ្នាក់លេខ៣ ពីអភិបាលស្រុកកណ្តៀង ឲ្យទៅកាន់មុខតំណែង ជាអភិបាលស្រុកបាកាន ជំនួសលោក សៅ ដារឿន ដែលបានដាក់ឲ្យចូលនិវត្តន៍ ។ លោក ជា សុជាតិ អភិបាលរងស្រុកភ្នំក្រវាញ ឲ្យទៅកាន់តំណែងជាអភិបាលរងស្រុកបាកាន លោក ទៀង វឌ្ឍនៈ អភិបាលរងស្រុកបាកាន ឲ្យទៅកាន់តំណែង ជាអភិបាលរងស្រុកភ្នំក្រវាញ លោក ហៃ ស៊ីម៉េង នាយករដ្ឋបាលសាលាស្រុកបាកាន ឱ្យកាន់តំណែងជាអភិបាលរងស្រុកបាកាន និងលោក គង់ វិបុល អភិបាលរងស្រុកបាកាន ឱ្យទៅបម្រើការងារនៅសាលាខេត្តពោធិ៍សាត់ ។
លោក ផាយ ឡេង អភិបាលស្រុកបាកាន ដែលទើបប្ដូរមកថ្មី បានថ្លែងអំណរគុណ ចំពោះលោកអភិបាលខេត្ត ពិសេសប្រមុខរាជរដ្ឋាភិបាល និងក្រសួងមហាផ្ទៃ ដែលមានជំនឿទុកចិត្តលើចាត់តាំងឲ្យរូបលោកមកកាន់មុខតំណែងជាអភិបាលស្រុកបាកាន នាពេលនេះ ។ លោកបានប្តេជ្ញាចិត្តខិតខំអនុវត្ត និងបំពេញការងារឲ្យអស់ពីសមត្ថភាព តាមបទបញ្ជារបស់ថ្នាក់លើប្រគល់ឲ្យទាំងការគោរពច្បាប់ លិខិតបទដ្ឋាននានា ការងារគ្រប់គ្រងរដ្ឋបាលស្រុក ការងារអភិវឌ្ឍន៍ ជំរុញកាងារអនុវត្តគោលនយោបាយ ភូមិ ឃុំ មានសុវត្ថិភាព បង្កា និងបង្ក្រាបបទល្មើសផ្សេងៗឲ្យមានប្រសិទ្ធិភាព ដើម្បីជាសេនាធិការដ៏រឹងមាំ ឲ្យគណៈបញ្ជាការឯកភាពខេត្ត និងផ្តល់សេចក្តីសុខជូនប្រជាពលរដ្ឋ ។
លោក ម៉ៅ ធនិន បានថ្លែងថា ការប្រកាសផ្ទេរភារកិច្ច និងតែងតាំងមុខតំណែង អភិបាល អភិបាលរងស្រុកនាពេលនេះ គឺជាការគិតគូររបស់រាជរដ្ឋាភិបាលក៏ដូចក្រសួងមហាផ្ទៃ ដើម្បីដកស្រង់បទពិសោធន៍គ្នាទៅវិញទៅមក និងពង្រឹងការដឹកនាំការងារឲ្យកាន់តែប្រសើរឡើងថែមទៀត ។ ត្រូវមានសាមគ្គីភាពផ្ទៃក្នុងល្អជាមួយមន្ត្រីក្រោមឱវាទ ចៀសវាងប្រកាន់បក្ខពួក នាំឲ្យប៉ះពាល់ដល់សតិអារម្មណ៍ធ្វើឲ្យការអនុវត្តន៍ការងារមិនរលូនទៅមុខ ។
ក្នុងឱកាសនោះ លោកអភិបាលខេត្ត បានជូនសារុងម្នាក់មួយដល់អ្នកចូលរួមប្រមាណ៨០០នាក់ផងដែរ ៕
ចែករំលែកព័តមាននេះ