រាជធានីភ្នំពេញ ៖ អាជ្ញាធររាជធានីអះអាងថា នៅដើមឆ្នាំ២០១៨ឆាប់ៗនេះខាងមុខ ក្រុមការងារជំនាញផ្នែកប្រឡាយលូ នឹងបើកយុទ្ធនាការស្តារលូ៤៦០គីឡូម៉ែត្រ និងស្តារប្រឡាយមួយចំនួន ដើម្បីកាត់បន្ថយការជន់លិច ដោយជំនន់ទឹកភ្លៀង ហើយគ្រោងនឹងធ្វើឲ្យរួចរាល់នៅមុនរដូវវស្សា ។
ក្នុងកិច្ចប្រជុំជាមួយមន្ត្រីជំនាញពាក់ព័ន្ធ និងអភិបាលខណ្ឌទាំង១២ ក្រោមឱវាទរដ្ឋបាលរាជធានីភ្នំពេញ កាលពីល្ងាចថ្ងៃទី២៥ ខែធ្នូ ឆ្នាំ២០១៧ នេះ លោក ឃួង ស្រេង អភិបាលរាជធានីភ្នំពេញ បានលើកឡើងថា យុទ្ធនាការស្តារលូ និងប្រឡាយ នឹងចាប់ផ្តើអនុវត្តនៅដើមឆ្នាំ២០១៨ គឺក្រោយពីរៀបចំពិធីទិវាជ័យជម្នះ៧មករារួច លើគម្រោងអភិវឌ្ឍន៍ប្រព័ន្ធលូប្រឡាយនៅក្នុងរាជធានីភ្នំពេញ ធ្វើយ៉ាងណាដើម្បីដោះស្រាយបញ្ហាទឹក ដែលកន្លងមកបានជន់លិចដោយជំនន់ទឹកភ្លៀង ។
លោកបន្តថា យុទ្ធនាការនេះ គឺផ្ដោតសំខាន់លើខណ្ឌនៅកណ្តាល រាជធានីភ្នំពេញ ចំនួន៤ សំដៅលើខណ្ឌដូនពេញ ចំការមន ៧មករា និងខណ្ឌទួលគោក ដែលមានប្រវែង៤៦០គីឡូម៉ែត្រ ដោយធ្វើការបែងចែកការងារ រវាងមន្ទីរសាធារណៈការ និងដឹកជញ្ជូនរាជធានីភ្នំពេញ ទទួលលើការស្តារប្រព័ន្ធលូមេ ចំណែកខណ្ឌទាំង៤ខាងលើ ទទួលបណ្ដាញលូរង នៅក្នុងមូលដ្ឋានខណ្ឌ ប្រសិនបើលូ ដែលបានស្តារទាំងនោះ គឺត្រូវទទួលខុសត្រូវរៀងៗខ្លួន ។
លោក ឃួង ស្រេង មានប្រសាសន៍ទៀតថា ការស្តារប្រព័ន្ធប្រឡាយលូនេះ ត្រូវធ្វើជាប្រព័ន្ធ ដោយមិនធ្វើដាច់ដោយដុំបានទេ ដើម្បីឲ្យប្រព័ន្ធទឹកហូរទម្លាក់ទៅក្នុងស្ថានីយ៍ ឬហូរចេញទៅក្រៅរាជធានីបានស្រួល ។
លោកបញ្ជាក់ថា អាជ្ញាធររាជធានីភ្នំពេញ ត្រៀមបើកការដ្ឋានសាងសង់ស្ថានីយ៍បូមទឹកនៅតំបន់លូ៥ ដែលអាចរំដោះទឹកពីតំបន់ខាងកើត និងខាងត្បូងព្រលានយន្តហោះ ព្រមទាំងតំបន់ជាច្រើនទៀតដែរ ។
លោក ម៉េត មាសភក្តី អ្នកនាំពាក្យសាលារាជធានីភ្នំពេញ បានឲ្យដឹងថា យុទ្ធនាការនៃផែនការស្តារប្រឡាយលូនេះ ត្រូវអនុវត្តន៍ព្រមៗគ្នា ដោយប្រើរយៈពេល៥ខែ សម្រុកឲ្យរួចរាល់មុនរដូវវស្សាមកដល់ ហើយការងារទាំងនោះ រដ្ឋបាលរាជធានីភ្នំពេញ បានបង្កើតគណៈកម្មាធិការមួយច្បាស់លាស់ ដើម្បីជំរុញការងារបានល្អ និងទាន់ពេលវេលា និងកាត់បន្ថយការជន់លិចដោយជំនន់ទឹកភ្លៀងនៅឆ្នាំក្រោយ ៕
ចែករំលែកព័តមាននេះ