រាជធានីភ្នំពេញ ៖ បុរសម្នាក់ដែលគេស្គាល់ថា ជាកូនប្រុសរបស់មន្ត្រីដ៏មានឥទ្ធិពលម្នាក់ផងនោះ បានបើករថយន្តស៊េរីទំនើបម៉ាក LAND CRUISER PRADO មួយគ្រឿង ក្នុងសភាពស្រវឹងស្រាយ៉ាងជោគជាំ ទៅបុករះបាក់អស់របងថ្មមួយផ្ទាំង ម៉ូតូចំនួន២គ្រឿង កង់មួយគ្រឿង និងស្ត្រីមានផ្ទៃពោះចំនួន៨ខែ បានបណ្តាលឲ្យរងរបួសយ៉ាងធ្ងន់ធ្ងរ។ ប្រជាពលរដ្ឋទប់កំហឹងមិនបានក៏នាំគ្នាយកដុំថ្មគប់ និងវាយសំពងរថយន្តមួយគ្រឿងនោះ បណ្តាលឱ្យរងការខូចខាតផងដែរ ហើយត្រូវបានឪពុកមកដល់ធ្វើអន្តរាគមន៍ និងដោះលែងឲ្យទៅវិញបាត់ស្រមោល។
ហេតុការណ៍នេះដែរ បានកើតឡើងកាលពីវេលាម៉ោង៥ល្ងាច ថ្ងៃទី២៤ ខែធ្នូ ឆ្នាំ២០១៧ នៅខាងមុខផ្ទះលេខ១១Z ផ្លូវលេខ៤៨៨ ក្នុងសង្កាត់ផ្សារដើមថ្កូវ ខណ្ឌចម្ការមន ។ ស្ត្រីរងគ្រោះមានឈ្មោះ ហេង ស្រីម៉ុំ អាយុ២៦ឆ្នាំ មានមុខរបរជាកម្មករប្រមូលសំរាមរបស់ក្រុមហ៊ុន ស៊ីនទ្រី ស្នាក់នៅផ្ទះជួលលេខ១១Z ផ្លូវលេខ៤៨៨ ក្នុងសង្កាត់ផ្សារដើមថ្កូវ ខណ្ឌចំការមន នាងមានផ្ទៃពោះ៨ខែ បានរងរបួសយ៉ាងធ្ងន់ធ្ងរ ។ ម៉ូតូដែលរងការខូចខាតនោះគឺទី១-ម៉ូតូម៉ាកស្គូពី ពណ៌ស ពាក់ស្លាកលេខ តាកែវ ១I-៩១៤២ មួយគ្រឿង និងទី២-ម៉ាក ZOOMER-X ពណ៌ទឹកសមុទ្រ ពាក់ស្លាកលេខ ភ្នំពេញ ១FW-៩៤០៤ មួយគ្រឿង និងកង់ចំនួន១គ្រឿង និងបាក់របងផ្ទះរបស់ប្រជាពលរដ្ឋអស់ចំនួន ១ផ្ទាំងផងដែរ។
តាប្រភពព័ត៌មានពីអ្នកឃើញហេតុការណ៍បានប្រាប់ឱ្យដឹងថា មុនពេលកើតហេតុ ពួកគាត់បានឃើញរថយន្តស៊េរីទំនើបម៉ាក LAND CRUISER PRADO ពណ៌ខ្មៅ ពាក់ស្លាកលេខ ភ្នំពេញ ២T-៩៦៧៨ មួយគ្រឿង ដែលបើកបរដោយបុរសវ័យជាង២០ឆ្នាំម្នាក់ តាមបណ្តោយផ្លូវលេខ ៤៨៨ ក្នុងទិសដៅពីលិច ទៅកើតក្នុងល្បឿនយ៉ាងលឿន ។ លុះមកដល់ចំណុចខាងលើ ដែលជាផ្លូវទាល់ទៅមុខទៀតមិនរួចនោះ រថយន្តម៉ាក LAND CRUISER PRADO ក៏ឈប់នៅស្ងៀមមួយកន្លែង ដោយខ្លាចបង្កគ្រោះថ្នាក់ដល់ក្មេងៗ ប្រជាពលរដ្ឋដែលរស់នៅក្បែរខាងជា ច្រើនរស់នៅក្បែរខាងនោះ ពួកគាត់ក៏បានដើរសំដៅទៅប្រាប់ ។
តាមប្រភពដដែលបានប្រាប់បន្តទៀតថា ពេលដែលពួកគាត់ដើរទៅគោះទ្វារប្រាប់នោះ តែបុរសអ្នកបើកបររថយន្តមិនបានបើកទ្វារ ឬ បើកកញ្ចក់និយាយជាមួយនឹងពួកគាត់ឡើយ ដោយសារតែរូបគេស្ថិតនៅក្នុងសភាពស្រវឹងស្រាយ៉ាងជោគជាំ និងបាត់បង់ស្មារតីលែងដឹងអ្វីទាំងអស់ទៅហើយ ។ ពេលនោះ ក៏ស្រាប់តែបុរសអ្នកបើកបររថយន្តរូបនោះបានដាក់លេខបើកថយក្រោយក្នុងល្បឿនយ៉ាងលឿន ទៅបុក ស្ត្រីដែលមានផ្ទៃពោះម្នាក់ខាងលើ ដែលកំពុងតែឈរមុខផ្ទះដួល រួចហើយបន្តទៅបុក និងកិនម៉ូតូទាំង ២គ្រឿង និងកង់ចំនួនមួយគ្រឿងទៀតតែម្តង។
ដោយឃើញសភាពបែបនោះ ប្រជាពលរដ្ឋជាច្រើននាក់ដែលនៅក្បែរកន្លែងកើតហេតុ ផ្ទុះកំហឹងនាំគ្នាយកដំថ្ម និង ដំបងទៅវាយកម្ទេចរថយន្តមួយគ្រឿងនោះបណ្តាលឲ្យរងការខូចខាតយ៉ាងដំណំផងដែរ ចំណែកឯបុរសអ្នកបើកបរនៅអង្គុយក្នុងរថយន្តចាក់សោខាងក្នុងជាប់មិនហ៊ានចេញក្រៅឡើយ ។ ក្រោយពេលកើតហេតុ ស្ត្រីមានផ្ទៃពោះ៨ខែរងគ្រោះ ត្រូវបានក្រុមគ្រួសារបញ្ជូនយកទៅធ្វើការសង្គ្រោះ នៅមន្ទីរពេទ្យ ហើយកម្លាំងមានសម្ថកិច្ចមូលដ្ឋាន រួមទាំងឪពុករបស់បុរសជាអ្នកបើករថយន្តដែលគេបាន ដឹងថា ជាមន្ត្រីដ៏មានឥទ្ធិពលម្នាក់ បានចុះមកដល់កន្លែងកើតហេតុ និងធ្វើការរំដោះរូបកូនយកចេញទៅបាត់ស្រមោល។ ដោយទុកតែរថយន្តបង្ក និងកូនចៅ រួមទាំងកម្លាំងមានសមត្ថកិច្ចមូលដ្ឋាន នាំគ្នាធ្វើការព្យាយាមដោះស្រាយ ដោយស្ងាត់ៗជាមួយនឹង ក្រុមគ្រួសាររបស់ស្ត្រីរងគ្រោះ ម្ចាស់ម៉ូតូទាំង២គ្រឿង និងកង់ចំនួន១គ្រឿង រួមទាំងម្ចាស់ផ្ទះដែលបាក់របងមួយផ្ទាំងប៉ុណ្ណោះ៕
ចែករំលែកព័តមាននេះ