រាជធានីភ្នំពេញ ៖ អភិបាលរងខណ្ឌមានជ័យលោក ឌី រ័ត្នខេមរុណ នាវេលាល្ងាចថ្ងៃទី២៣ ខែធ្នូ ឆ្នាំ២០១៧ បានដឹកនាំក្រុមមន្ត្រីក្រោមឱវាទចុះសំណេះសំណាលសួរសុខទុក្ខ និងនាំយកអំណោយមនុស្សធម៌ចែកជូនបងប្អូនកម្មករកម្មការនីរោងចក្រចំនួន២៩គ្រួសារដល់តាមលំនៅឋាន ស្ថិតក្នុងភូមិចំរើនផល៣ សង្កាត់បឹងទំពុន១ ខណ្ឌមានជ័យ រាជធានីភ្នំពេញ ។
លោកបានមានប្រសាសន៍ឱ្យដឹងថា កាលពីពេលកន្លងទៅបងប្អូនកម្មករ-កម្មការនីបម្រើការងារនៅតាមបណ្តារោងចក្រនីមួយៗ កំពុងជួបប្រទះការលំបាកមួយចំនួនទាក់ទងបញ្ហាថវិការ ព្រោះប្រាក់ខែរបស់បងប្អូនមិនដល់១៥០ដុល្លារផង ដូច្នេះបងប្អូនប្រាកដជាជួបការលំបាកច្រើនសម្រាប់ការយកថវិការដែលបានពីការខិតខំនេះយកទៅផ្គត់ផ្គង់សម្រាប់ការចាយវាយខ្លួនឯង ចិញ្ចឹមក្រុមគ្រួសារ និងការចំណាយលើបញ្ហាផ្សេងៗ ។
លោក ឌី រ័ត្នខេមរុណ ក៏បានផ្តាំផ្ញើក្តីនឹករលឹក និងការសាកសួរសុខទុក្ខពីសំណាក់សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជាដែលជានិច្ចកាលតែងតែបានគិតគូរ និងយកចិត្តទុកដាក់ចំពោះប្រជាពលរដ្ឋក្នុងមូលដ្ឋានទូទាំងប្រទេស ដោយមិនប្រកាន់និន្នាការនយោបាយ ពណ៍សប្បុរ ឬក៏សាសនាអ្វីឡើយ ពោលគឺទីណាមានការលំបាកទីនោះមានកាកបាទក្រហមកម្ពុជាតែងតែចុះជួយជានិច្ច ៕
ចែករំលែកព័តមាននេះ