ខេត្តប៉ៃលិន ៖ រថយន្តច្នៃមួយគ្រឿងដឹកពោតពេញទ្រុងលើសទម្ងន់ លុះរអិលការុងពោតធ្លាក់ចំអ្នកបើកបរ បណ្តាលឱ្យរេចង្កូតទៅបុកសំយាបផ្ទះអ្នកលក់គ្រឿងអគ្គិសនីមួយកន្លែង បណ្តាលឲ្យបាក់សសរសំយាបតូបយ៉ាងធ្ងន់ធ្ងរ ។
ហេតុការណ៍នេះបានកើតឡើងកាលពេលវេលាម៉ោង០៦និង៣០នាទីល្ងាច ថ្ងៃទី២២ ខែធ្នូ ឆ្នាំ២០១៧ នៅបណ្តោយផ្លូវជាតិលេខ៥៧ ស្ថិតនៅក្នុងភូមិអូរតាពុកលើ សង្កាត់ប៉ៃលិន ក្រុងប៉ៃលិន ខេត្តប៉ៃលិន ។
ប្រភពព័ត៌មានពីសមត្ថកិច្ចបានឲ្យដឹងថា អ្នកបើកបរមានឈ្មោះ សំអឿន ភេទប្រុស អាយុ២២ឆ្នាំ រស់នៅភូមិបហ៊ុយជើង សង្តាត់បយ៉ាខា ក្រុងប៉ៃលិន ខេត្តប៉ៃលិន ។
ប្រភពដដែលបានបន្តទៀតថា មុនពេលកើតហេតុ គេឃើញរថយន្តច្នៃខាងលើនេះ ដឹកពោតហៀរពីលើទ្រុង ដោយបើកបរចេញពីភូមិក្រចាប់ សង្កាត់អូរតាវ៉ៅ ក្រុងប៉ៃលិន សំដៅទៅទុកនៅផ្ទះរបស់ខ្លួន ។ តែដោយសារការផ្ទុកលើសទម្ងន់ បណ្តាលឲ្យរអិលការុងពោតធ្លាក់ទៅសង្កត់លើអ្នកបើកបរ បណ្ដាលឲ្យរេចង្កូតទៅបុកសំយាបផ្ទះអាជីវករលក់គ្រឿងអគ្គិសនីតែម្តង ។ សំណាងល្អដែលមិនមានមនុស្សនៅជិត តែម្ចាស់ផ្ទះគ្រាន់តែឮសម្លេងរថយន្តបុកសំយាបផ្ទះ ក៏ព្រលឹងចុងសក់ ។
ពាក់ព័ន្ធនឹងបញ្ហានេះ ក្រោយពេលកើតហេតុ ម្ចាស់រថយន្តច្នៃនេះ ព្រមសងសំណងដល់ម្ចាស់ផ្ទះនោះ ដើម្បីបញ្ចប់រឿងភ្លាមៗ ៕
ចែករំលែកព័តមាននេះ