រាជធានីភ្នំពេញ ៖ យុវជនម្នាក់បានធ្វើសកម្មភាពគាស់ដំបូងផ្ទះវីងមួយកន្លែង រួចចូលទៅលួចលុយនៅក្នុងនោះបានជាង១លានរៀល ហេតុការណ៍នោះបានកើតឡើង កាលពីវេលាម៉ោង១យប់រំលងអធ្រាត្រឈានចូលថ្ងៃទី១៩ ខែធ្នូ ឆ្នាំ២០១៧នៅចំណុចផ្ទះលេខ៦៥ C ក្នុងភូមិត្រាំដោក សង្កាត់ពងទឹក ខណ្ឌដង្កោ រាជធានីភ្នំពេញ ។
ជនសង្ស័យខាងលើឈ្មោះ រឿង ចាន់ថេន អាយុ២២ឆ្នាំ មុខរបរមិនពិតប្រាកដ ស្នាក់នៅផ្ទះជួល ក្នុងភូមិឃុំកន្លែងកើតហេតុខាងលើ ហើយក្រោយពីពិនិត្យទឹកនោម ឃើញជននោះមានសារធាតុញៀននៅក្នុងខ្លួនផងដែរ ។ ចំណែកជនរងគ្រោះម្ចាស់ផ្ទះវីងឈ្មោះឈិត វ៉ាន់ធា ភេទប្រុស អាយុ៤១ឆ្នាំ មុខរបរលក់ដូរ មានទីលំនៅផ្ទះលេខ៦៥ C ភូមិត្រាំដោក សង្កាត់ពងទឹក ខណ្ឌដង្កោ បាត់បង់លុយចំនួន១,២០០,០០០រៀល (មួយលានពីរសែនរៀល) ។
ព័ត៌មានបានឲ្យដឹងថា នៅវេលាយប់ថ្ងៃកើតហេតុខណៈពេលដែលម្ចាស់ផ្ទះវីងខាងលើបិទទ្វារចូលដេកអស់ ជនសង្ស័យម្នាក់នោះបានធ្វើសកម្មភាពគាស់ពិដាន ចូលទៅលួចប្រមូលយកលុយបានចំនួន ១,២០០,០០០រៀល (មួយលានពីរសែនរៀល) បន្ទាប់មកបានគេចខ្លួនបាត់ស្រមោល ។
លុះដល់វេលាព្រឹកថ្ងៃទី២០ ខែធ្នូនេះ ខណៈពេលភ្ញាក់ពីដេកទើបដឹងថា ពិដានបន្ទប់វីងវេរលុយត្រូវបានចោរគាស់ហើយមើលលុយបាត់អស់ ក៏មានការភ្ញាក់ផ្អើល ។ ប្រភពបន្តឲ្យទៀតថា ពេលនោះជនរងគ្រោះបានឆែកមើលកាមេរ៉ាសុវត្ថិភាព ស្រាប់តែបានឃើញជនសង្ស័យជាអ្នកធ្វើសកម្មភាពលួច ។ លុះដល់វេលាម៉ោង២រសៀល ថ្ងៃដដែលទើបទៅប្ដឹងនគរបាលប៉ុស្ដិ៍ពងទឹក ហើយកម្លាំងបានចុះទៅកាន់កន្លែងកើតហេតុ និងពិនិត្យមើលកាមេរ៉ាសុវត្ថិភាពពិតជា ឃើញជនសង្ស័យឈ្មោះ រឿង ចាន់ថេន បានធ្វើសកម្មភាពលួចមែន ។
ដោយឡែកជនសង្ស័យបានសារភាពថា ខ្លួនពិតជាបានធ្វើសកម្មភាព គាស់បន្ទប់វីងនោះចូលទៅលួចលុយពិតប្រាកដមែន និងបានយកទៅស៊ីចាយអស់ហើយ ៕
ភ្លាមៗនោះកម្លាំងនគរបាលបានធ្វើការឃាត់ខ្លួនក្នុងខណៈពេលដែលជននោះកំពុងស្នាក់នៅក្នុង ផ្ទះជួល ក្នុងភូមិត្រាំដោក សង្កាត់ពងទឹក បន្ទាប់មកសាកសួរនៅប៉ុស្ដិ៍នគរបាលរដ្ឋបាលពងទឹក ទើបញ្ជូន បន្តទៅកាន់អធិការដ្ឋាននគរបាលខណ្ឌដង្កោ ដើម្បីចាត់ការតាមច្បាប់ ។
ចែករំលែកព័តមាននេះ