ចុះពង្រឹងការអប់រំច្បាប់ចរាចរណ៍នៅក្រុងព្រះសីហនុ
- ព្រះសីហនុ
ខេត្តព្រះសីហនុ ៖ លោកវរសេនីយ៍ទោ សម្រឹត លន់ នាយរងការិយាល័យចរាចរណ៍ផ្លូវគោក នៃស្នងការរងនគរបាលខេត្តព្រះសីហនុ បានបានឲ្យដឹងថា នៅព្រឹកថ្ងៃទី២០ ខែធ្នូ…
ខេត្តព្រះសីហនុ ៖ លោកវរសេនីយ៍ទោ សម្រឹត លន់ នាយរងការិយាល័យចរាចរណ៍ផ្លូវគោក នៃស្នងការរងនគរបាលខេត្តព្រះសីហនុ បានបានឲ្យដឹងថា នៅព្រឹកថ្ងៃទី២០ ខែធ្នូ ឆ្នាំ២០១៧ កន្លងមកនេះ លោកបានដឹកនាំកម្លាំងនគរបាលចរាចរណ៍ផ្លូវគោកចំនួន១៥នាក់ ដើម្បីចូលរួមសហការក្នុងកម្មពិធីចែកមួកសុវត្ថិភាពចំនួនចំនួន១០០មួក និងផ្សព្វផ្សាយអប់រំច្បាប់ស្ដីពីចរាចរណ៍ផ្លូវគោកជូនប្រជាពលរដ្ឋអ្នកបើកបរ និងអ្នករួមដំណើរតាមទោចក្រយានយន្តប្រមាណជាង១០០នាក់ នៅតាមវិថីឯករាជ្យ ត្រង់ចំណុចទល់មុខមន្ទីរពេទ្យបង្អែកខេត្តព្រះសីហនុ ស្ថិតក្នុងភូមិ០៤ សង្កាត់លេខ០៤ ក្រុងព្រះសីហនុ ខេត្តព្រះសីហនុ ។
ប្រភពខាងលើបានបន្តថា ការចុះអប់រំច្បាប់ចរាចរណ៍ខាងលើនេះ ក៏ទទួលបានការអញ្ជើញចូលរួមដោយលោកស្រី មីន មាណវី រដ្ឋលេខាធិការក្រសួងសាធារណៈការ និងដឹកជញ្ជូន ជាអគ្គលេខាធិការគណៈកម្មាធិការជាតិសុវត្ថិភាពចរាចរណ៍ផ្លូវគោក លោក អ៊ី សុខឡេង អភិបាលក្រុងព្រះសីហនុ មន្ត្រីអគ្គនាយករងអគ្គនាយកដ្ឋានដឹកជញ្ជូនផ្លូវគោក នាយកដ្ឋានសុវត្ថិភាពចរាចរណ៍ផ្លូវគោក លោក ណុប ហេង ប្រធានមន្ទីរសាធារណៈការ និងដឹកជញ្ជូនខេត្តព្រះសីហនុ ព្រមទាំងមន្ត្រីស្ថាប័នជំនាញពាក់ព័ន្ធមួយចំនួនទៀត នៃរដ្ឋបាលខេត្តព្រះសីហនុ បានចូលរួមយ៉ាងកុះករ ។
ឆ្លៀតឱកាសខាងលើនោះ លោកស្រី មីន មាណវី លោក អ៊ី សុខឡេង អភិបាលក្រុងព្រះសីហនុ និងលោក ណុប ហេង ប្រធានមន្ទីរសាធារណៈការដឹកជញ្ជូនខេត្ត បានអំពាវនាវដល់ប្រជាពលរដ្ឋ ពិសេសអ្នកប្រើប្រាស់ទ្រូងផ្លូវទាំងអស់ ទាំងមធ្យោបាយរថយន្ត និងម៉ូតូ ត្រូវចូលរួមគោរពច្បាប់ចរាចរណ៍ផ្លូវគោក ឲ្យបានជាប្រចាំ ទោះចម្ងាយផ្លូវជិត ឬឆ្ងាយបែបណាក្តី ដើម្បីការពារអាយុជីវិតខ្លួនឯង និងក្រុមគ្រួសារ រួមចំណែកក្នុងការកាត់បន្ថយករណីគ្រោះថ្នាក់ចរាចរទៅថ្ងៃអនាគត ។
លោកស្រី មីន មាណវី មានប្រសាសន៍សង្កត់ធ្ងន់ថា ដើម្បីកាត់បន្ថយអត្រាគ្រោះថ្នាក់ចរាចរនៅខេត្តព្រះសីហនុ ក៏ដូចជានៅទូទាំងប្រទេសកម្ពុជា អ្នកបើកបរគ្រប់មធ្យោបាយ និងអ្នករួមដំណើរទាំងអស់ ដាច់ខាតត្រូវតែគោរពច្បាប់ចរាចរណ៍ផ្លូវគោកជាប្រចាំដូចជា បើកបរម៉ូតូត្រូវពាក់មួកការពារសុវត្ថិភាព អ្នកបើកបររថយន្តគ្រប់ប្រភេទត្រូវតែពាក់ខ្សែក្រវាត់ការពារសុវត្ថិភាពឲ្យបានគ្រប់គ្នា និងជាប្រចាំ មិនថាចម្ងាយផ្លូវធ្វើដំណើរជិត ឬឆ្ងាយនោះទេ បើកបរក្នុងល្បឿនច្បាប់បានកំណត់ បើពិសារគ្រឿងស្រវឹង សូមកុំបើកបរ ៕|
ចែករំលែកព័តមាននេះ