ខេត្តប៉ៃលិន ៖ យុវជនម្នាក់រងរបួសបែកក្បាលហូរឈាមជោកខ្លួន ខណៈឪពុកចុងមកពីផឹកស្រាស្រវឹងជោកជាំ រួចឈ្លោះទាស់ទែងគ្នា ហើយទាញយកដំបងឈើជ្រុង វាយទៅលើជនរងគ្រោះបណ្តាលឱ្យរងរបួសធ្ងន់តែម្តង ។ ហេតុការណ៍នេះបានកើតឡើងកាលពីវេលាម៉ោង៦និង២០នាទីល្ងាចថ្ងៃទី១៧ ខែធ្នូ ឆ្នាំ២០១៧ ភូមិក្ងោក ឃុំស្ទឹងកាច់ ស្រុកសាលាក្រៅ ខេត្តប៉ៃលិន ។
ព័ត៌មានបានឱ្យដឹងថា ជនសង្ស័យឈ្មោះផុន ភ័ណ ភេទប្រុស អាយុ៤៥ឆ្នាំ រស់នៅភូមិ-ឃុំកើតហេតុខាងលើ បានយកដំបងឈើជ្រុងប្រវែងប្រហែល០១ម៉ែត្រ វាយទៅលើជនរងគ្រោះត្រូវជាកូនចុង បណ្តាលឱ្យបែកក្បាលខាងឆ្វេងរបួសធ្ងន់ និងចំដៃខាងស្តាំបណ្តាលឱ្យមានស្នាមជាំផងដែរ ។
ប្រភពបន្តទៀតថា មុនពេលកើតហេតុ ជនបង្កបានផឹកស្រាជួបជុំមិត្តភក្តិតាំងពីព្រឹករហូតដល់ល្ងាចស្រវឹងក៏ដើរទៅរករឿងជេប្រមាថជនរងគ្រោះដែលត្រូវជាកូនចុងរបស់ខ្លួន ហើយពេលនោះជនរងគ្រោះបានតមាត់ពីរបីម៉ាត់ ស្រាប់តែជនដៃដល់បានស្ទុះទៅទាញយកដំបងឈើជ្រុងវាយយ៉ាងពេញទំហឹងទៅលើជនរងគ្រោះ បណ្តាលឱ្យបែកក្បាលហូរឈាម និងរបួសដៃស្តាំតែម្តង ។
ក្រោយពេលប្រព្រឹត្តបទលើ្មសរួច ជនបង្កបានរត់គេចខ្លួនបាត់ស្រមោលភ្លាមៗ រហូតដល់ថ្ងៃទី១៨ ខែធ្នូ ឆ្នាំ២០១៧ ទើបសមត្ថកិច្ចនគរបាលប៉ុស្តិ៍ស្ទឹងកាច់ ធ្វើការស្រាវជ្រាវចាប់ជនសង្ស័យ ដើម្បីចាត់ការតាមនិតិវិធី ៕
ចែករំលែកព័តមាននេះ