រាជធានីភ្នំពេញ ៖ ដើម្បីឱ្យការគ្រប់គ្រងស្លាកលេខទោចក្រយានយន្ត ជាពិសេស រថយន្តដែលពលរដ្ឋធម្មតាប្រើប្រាស់ កុំឱ្យមានការជាន់គ្នាឬត្រួតស៊ីគ្នា ដូចដែលធ្លាប់បានកើតឡើងនោះ មន្ត្រីក្រសួងសាធារណការ និងដឹកជញ្ជូន អះអាងថា នៅថ្ងៃខាងមុខ ការគ្រប់គ្រងស្លាកលេខរថយន្តនឹងល្អប្រសើរ ដោយសារគ្រប់ស្លាកលេខរថយន្តប្រភេទថ្មី ដែលក្រសួងចេញឱ្យពលរដ្ឋប្រើប្រាស់ គិតចាប់ពីខែកក្កដា ឆ្នាំ២០១៧ គឺមានភ្ជាប់នូវ QR Code ។ លើសពីនេះ អ្នកជំនាញកំពុងតែសរសេរកម្មវិធី API ថ្មីមួយទៀតសម្រាប់ឱ្យមន្ត្រីសមត្ថកិច្ចចុះត្រួតពិនិត្យនៅតាមដងផ្លូវ ។
លោក ពៅ ម៉ាលី អគ្គនាយកនៃអគ្គនាយកដ្ឋានដឹកជញ្ជូនផ្លូវគោក នៃក្រសួងសាធារណការ និងដឹកជញ្ជូន បានមានប្រសាសន៍ថា ៖« កាលពីខែកក្កដា ឆ្នាំ២០១៧ យើងបានដាក់ QR Code នៅតាមស្លាកលេខទោចក្រយានយន្ត ។ ដូចនេះ នៅថ្ងៃអនាគត វាលែងមានករណីលួចបន្លំរថយន្តបានទៀតហើយ » ។
ករណីការប្រើប្រាស់ស្លាកលេខជាន់គ្នា បើតាមអគ្គនាយករូបនេះថា កន្លងទៅ ពលរដ្ឋធ្លាប់ឮថា មានបាត់ស្លាកលេខ កាតគ្រីរថយន្ត ឬអត្តសញ្ញាណប័ណ្ណ ដោយសារចោឆក់កាបូប ហើយប្រហែលជាមានក្រុមចាំទិញឯកសារ និងក្រុមចាំលួចស្លាកលេខរថយន្តទាំងមុខ និងក្រោយ ដែលធ្វើឲ្យគេដឹងកាន់តែច្បាស់ពីប្រភេទរថយន្ត រួចហើយផ្លាស់ប្តូរព័ត៌មានរថយន្ត ដូចជា ដាប់លេខម៉ាស៊ីនរថយន្តចាស់ចោល ដោយដាក់លេខថ្មីជំនួសវិញ ដើម្បីបន្លំសមត្ថកិច្ចឱ្យចេញស្លាកលេខ ។
កាសែតកោះសន្តិភាពក៏ធ្លាប់បានចុះផ្សាយកាលពីថ្ងៃទី១១ វិច្ឆិកា ២០១៧ ផងដែរថា មានរថយន្តឡិចស៊ីស RX 350 ពណ៌សដូចគ្នា ខុសស៊េរី ប៉ុន្តែពាក់ស្លាកលេខភ្នំពេញ 2AD- 6345 ដូចគ្នា ត្រូវបានម្ចាស់រថយន្តប្រទះឃើញកាលពីថ្ងៃទី១០ វិច្ឆិកា នៅខាងមុខធនាគារ ABA ស្ថិតនៅសង្កាត់កំពង់ចាម ក្រុងកំពង់ចាម ខេត្តកំពង់ចាម ។
ដើម្បីកុំឱ្យមានករណីខាងលើកើតឡើង បន្តទៀត លោក ពៅ ម៉ាលី បានលើកឡើងថា ៖«ឥឡូវនេះ មន្ត្រីប៉ូលិសដែលជាសមត្ថកិច្ច យើងបានឱ្យ Apps អាចស្កេន QR Code ទៅលើស្លាកលេខរថយន្តបានតាមទូរស័ព្ទ មានន័យថា ពេលគាត់ឃើញឡានមួយ គាត់ចុច ហើយកាលណាអត់មានឃើញចេញទិន្នន័យ គឺស្លាកលេខឡាន ជាស្លាកលេខក្លែងក្លាយ » ។
លោកបញ្ជាក់ថា ៖« យើងបាននិងកំពុងត្រៀមធ្វើឱ្យបានល្អ បន្តិចទៀត យើងនឹងមានកាមេរ៉ាដាក់នៅតាមផ្លូវ (សមត្ថកិច្ចចុះត្រួតពិនិត្យ) គឺដូចនឹងអង្គភាពពន្ធដារអីចឹង បើមានឡានណាបើកកាត់ វានឹងបង្ហាញនូវព័ត៌មានអំពីរថយន្តតាមប្រព័ន្ធ API ។ បច្ចុប្បន្ន អ្នកជំនាញកំពុងសរសេរកម្មវិធី ដោយរំពឹងថា នឹងទទួលបានលទ្ធផលនាពេលខាងមុខ»។
លោកបន្តថា ការប្រើប្រាស់ទោចក្រយានយន្តនៅក្នុងប្រទេសកម្ពុជា បានកើនឡើងជាបន្តបន្ទាប់ ។ ជាក់ស្តែង គិតត្រឹមចុងឆ្នាំ២០១៧នេះ ទោចក្រយានយន្តសរុបទាំងអស់មានប្រមាណ៤លានគ្រឿង ក្នុងនោះរថយន្តមានជាង៦០ម៉ឺនគ្រឿង ។
យោងតាមរបាយការណ៍របស់ក្រសួងបង្ហាញថា គិតចាប់ពីឆ្នាំ១៩៩០ ដល់ខែកញ្ញា ឆ្នាំ២០១៧នេះ មានយានយន្ត និងទោចក្រយានយន្តចុះបញ្ជីនៅក្រសួង ស្មើជាង៤លានគ្រឿង ក្នុងនោះរថយន្តធុនស្រាលជាង៣៧ម៉ឺនគ្រឿង ស្មើ៩,៣%, រថយន្តធុនធ្ងន់ជាង២១ម៉ឺនគ្រឿង ស្មើ៥,៤% និងទោចក្រយានយន្តជាង៣,៤លានគ្រឿង ស្មើ៨៥,៣% ៕
ចែករំលែកព័តមាននេះ