រាជធានីភ្នំពេញ ៖ បច្ចេកវិទ្យាបានផ្លាស់ប្តូរបែបផែនជីវិតជាច្រើន ក្នុងនោះការសិក្សាពីចម្ងាយតាមបែប E Learning បានក្លាយជាផ្នែកមួយយ៉ាងសំខាន់ដល់អ្នកមិនសូវមានពេលវេលាគ្រប់គ្រាន់សម្រាប់ចាកចេញទៅសិក្សានៅបរទេសផ្ទាល់ ។
លោក សេរ័ត្ន ដែលធ្លាប់សិក្សាកម្រិតអនុបណ្ឌិតផ្នែកសារព័ត៌មានពីប្រទេសហ្វ៊ីលីពីន តាមរយៈប្រព័ន្ធ E Learning បានមានប្រសាសន៍កាលពីពេលថ្មីៗនេះថា ការសិក្សាតាមប្រព័ន្ធ E Learning គឺជាមធ្យោបាយមួយទៀតសម្រាប់អ្នកមិនសូវមានពេលវេលាគ្រប់គ្រាន់ក្នុងការចេញទៅសិក្សានៅបរទេស និងអាចសិក្សាតាមរយៈប្រព័ន្ធថ្មីនេះបាន ។
លោកបន្តថា អ្នកសិក្សាតាមប្រព័ន្ធ E Learning ជាអ្នកមានការទទួលខុសត្រូវលើខ្លួនឯងខ្ពស់ និងអាចជួយឲ្យមានភាពជាអ្នកដឹកនាំលើខ្លួនឯងបានច្រើន ព្រោះការសិក្សាតាមប្រព័ន្ធថ្មីនេះ គឺជាការសិក្សាពីចម្ងាយ ដោយមិនសិក្សាផ្ទាល់ជាមួយគ្រូឡើយ ។
លោកបន្ថែមថា ការសិក្សាតាមប្រព័ន្ធនេះ អ្នកសិក្សាមានឱកាសជួបប្រាស្រ័យទាក់ទងគ្នាជាមួយអ្នកសិក្សាជាមួយគ្នា តាមរយៈវីដេអូ ខនហ្វឺរិន ដោយគ្រូណាត់ម៉ោងគ្នា ដើម្បីរកពេលវេលាសមស្របណាមួយ ដែលអ្នកសិក្សាអាចជួបឆ្លងឆ្លើយ និងផ្លាស់ប្តូរទស្សនៈគ្នាទៅវិញទៅមក ។
លោក សេរ័ត្ន មានប្រសាសន៍បន្តថា ៖«ការសិក្សាតាមប្រព័ន្ធ E Learning អ្នកសិក្សាត្រូវធ្វើការជាមួយគ្រូ ឬសាស្ត្រាចារ្យដើម្បីអាន ឬស្រាវជ្រាវលើប្រធានបទណាមួយដែលសាលាបានដាក់ឲ្យ ។ ហេតុនេះ ការទទួលខុសត្រូវរបស់អ្នកសិក្សាមានសារសំខាន់ណាស់ ដើម្បីកំណត់ភាពជោគជ័យលើការសិក្សារបស់ពួកគេ » ។
ទោះជាយ៉ាងណា លោក សេរ័ត្ន មិនបានបញ្ជាក់អំពីតម្លៃសិក្សារបស់សាលាទេ ប៉ុន្តែលោកបញ្ជាក់ថា តម្លៃនៃការសិក្សា វាអាស្រ័យលើសាលានីមួយៗ ។
លោក តែ ឡូរិន សាកលវិទ្យាធិការនៃសាកលវិទ្យាល័យវេស្ទើន បានថ្លែងថា គ្រឹះស្ថានឧត្តមសិក្សារបស់លោក មិនមានកម្មវិធីបណ្តុះបណ្តាលបែបនេះទេ ព្រោះមិនដឹងក្រសួងអប់រំបានអនុញ្ញាតឬអត់ ។ លោកមានប្រសាសន៍ថា ប្រព័ន្ធសិក្សាបែបនេះ មានការសិក្សាច្រើននៅតាមប្រទេសជឿនលឿន ប៉ុន្តែនៅកម្ពុជាមិនសូវមានច្រើនទេ ។
សាកលវិទ្យាធិការនៃសាកលវិទ្យាល័យភូមិន្ទភ្នំពេញ លោក ជេត ជាលី បានមានប្រសាសន៍ដែរថា សាកលវិទ្យាល័យនេះមានកម្មវិធីបណ្តុះបណ្តាលបែបនេះ ប៉ុន្តែបានបដិសេធមិននិយាយលម្អិត ដោយសារលោកជាប់រវល់ប្រជុំ ។
លោក សេរ័ត្ន បានមានប្រសាសន៍បន្តថា ការសិក្សាតាមបែប E Learning ធ្វើឲ្យយើងចំណេញទាំងពេលវេលា និងប្រាក់កាស ដោយសារអ្នកសិក្សាមិនចាំបាច់ទៅសិក្សានៅក្រៅប្រទេស ដែលត្រូវចំណាយច្រើនលើថ្លៃម្ហូបអាហារ ការស្នាក់នៅ និងសេវាកម្មធ្វើដំណើរជាដើម ៕
ចែករំលែកព័តមាននេះ