ខេត្តពោធិ៍សាត់ ៖ មនុស្សពីរនាក់បានរងរបួសបែកក្បាលហូរឈាមដេកសន្លប់ស្ដូកស្ដឹង បញ្ជូនទៅសង្គ្រោះនៅមន្ទីរពេទ្យភ្នំពេញ បន្ទាប់ពីជួបគ្រោះថ្នាក់ចរាចរ រថយន្តមិនស្គាល់ម៉ាកមួយគ្រឿងបុករះកាលពីវេលាម៉ោង០៥និង២០នាទីល្ងាច ថ្ងៃទី២០ ខែធ្នូ ឆ្នាំ២០១៧ លើកំណាត់ផ្លូវជាតិលេខ៥ ចន្លោះគីឡូម៉ែត្រលេខ ១៨៤ ១៨៥ ស្ថិតក្នុងភូមិមាន់ចែ សង្កាត់រលាប ក្រុងពោធិ៍សាត់ ។
ប្រជាពលរដ្ឋដែលឃើញហេតុការណ៍បាននិយាយថា គ្រោះថ្នាក់ចរាចរនេះបង្កឡើងរវាងម៉ូតូពីរគ្រឿង និងរថយន្ដមួយគ្រឿង ដោយរថយន្តបុករះទាំងកំរោល ។ ម៉ូតូពីរគ្រឿង មួយគ្រឿងម៉ាកហុងដាសេ១២៥ ពណ៌ខ្មៅ ពាក់ស្លាកលេខ ពោធិ៍សាត់ ១C-៧៥២៧ មួយគ្រឿងទៀតម៉ាកគុប៩០ចង្កៀងមូល ពណ៌សំបកឪឡឹក ។
នៅល្ងាចនោះ ម៉ូតូទាំងពីរគ្រឿងធ្វើដំណើរបញ្ច្រាសទិសគ្នា ។ ទៅដល់ចំណុចកើតហេតុ មានមួយគ្រឿងឡើងជែងរថយន្ដមួយគ្រឿងទៀត បណ្ដាលឲ្យបុករះម៉ូតូដួលរប៉ាត់រប៉ាយលើថ្នល់ ស្របពេលជាមួយគ្នានោះ រថយន្ដក៏បន្ថែមល្បឿងបុកបន្ថែម រួចហើយបើករត់បាត់ទៅ ។ អ្នកបើកម៉ូតូទាំងពីរនាក់បែកក្បាលហូរឈាមសន្លប់ស្ដូកស្ដឹង រងរបួសយ៉ាងធ្ងន់ធ្ងរ ត្រូវបានក្រុមគ្រួសារបញ្ជូនទៅភ្នំពេញ ដើម្បីសង្គ្រោះបន្ទាន់ ។
ជនរងគ្រោះទាំងពីរនាក់ម្នាក់ឈ្មោះ ប្រាក់ សុផា ភេទប្រុស អាយុ១៩ឆ្នាំ រស់នៅភូមិសង្កាត់កើតហេតុខាងលើ និងម្នាក់ទៀតឈ្មោះ យឹម ផល្លា ភេទប្រុស អាយុជាង២០ឆ្នាំ រស់នៅភូមិកែវសុវណ្ណក្រោម សង្កាត់បន្ទាយដី ក្រុងពោធិ៍សាត់ ។
ម៉ូតូទាំងពីរគ្រឿងរក្សាទុកនៅអធិការដ្ឋាននគរបាលក្រុងពោធិ៍សាត់ ដើម្បីដោះស្រាយនៅពេលក្រោយ តាមច្បាប់ចរាចរណ៍ផ្លូវគោក ។ ចំណែករថយន្ដមិនស្គាល់ម៉ាកដែលបើករត់បាត់ស្រមោលនោះ សមត្ថកិច្ចកំពុងសហការគ្នាតាមស្វែងរក ៕
ចែករំលែកព័តមាននេះ