ប្រចណ្ឌប្រពន្ធរត់មកលោតទឹកពីលើស្ពានគីហ្ស៊ុណា
- កំពង់ចាម
ខេត្តកំពង់ចាម ៖ មានហេតុការណ៏ភ្ញាក់ផ្អើល ដោយបុរសខ្មែរម្នាក់ឈ្មោះ ឃុន លីឡាយ អាយុ២២ឆ្នាំ រស់នៅភូមិអូរឈ្លើង ឃុំកោះរកា ស្រុកកំពង់សៀម…
ខេត្តកំពង់ចាម ៖ មានហេតុការណ៏ភ្ញាក់ផ្អើល ដោយបុរសខ្មែរម្នាក់ឈ្មោះ ឃុន លីឡាយ អាយុ២២ឆ្នាំ រស់នៅភូមិអូរឈ្លើង ឃុំកោះរកា ស្រុកកំពង់សៀម បានគិតខ្លីសំរេចចិត្តមកលោតទឹកទន្លេមេគង្គពីលើស្ពានគីហ្ស៊ុណាត្រង់ចន្លោះប៉េ៨ និងប៉េង៩ ស្ថិតនៅក្នុងសង្កាត់វាលវង់ ក្រុងកំពង់ចាម នៅវេលាម៉ោង១និង៥០នាទីរសៀល ថ្ងៃទី២០ ខែធ្នូ ឆ្នាំ២០១៧ ដើម្បីប៉ងធ្វើអត្តឃាត ។ តែសំណាងល្អត្រូវបានទូកនេសាទខ្មែរអ៊ិស្លាមចេញមកជួយអន្តរាគម៏ទាន់ពេលវេលា ។
មន្ត្រីនគរបាលប៉ុស្ត៏រដ្ឋបាលសង្កាត់វាលវង់ប្រាប់ឲ្យដឹងថា នៅពេលមុនកើតហេតុបុរសខាងលើនេះបានឈ្លោះជាមួយនឹងប្រពន្ធរបស់ខ្លួនហើយបានពឹងឲ្យមិត្តភក្តិម្នាក់យកម៉ូតូ១គ្រឿងហើយបានជិះចេញមកលើស្ពានគីហ្ស៊ូណា ដំបូងបាននាំគ្នាអង្គុយលេងមួយសន្ទុះធំបន្ទាប់មកក៏បានឡើងលើបង្កាន់ដៃស្ពានហើយបានលោតទន្លាក់ខ្លួនចូលទៅក្នុងទឹកទន្លេតែម្តង ។
មន្ត្រីនគរបាលប៉ុស្ត៏រដ្ឋបាលសង្កាត់វាលវង់ប្រាប់បន្តថា មុនពេលលោតទឹកនោះដំបូងមិត្តភក្តិដែលបានជិះម៉ូតូទៅជាមួយនោះបានបំភ្លឺឲ្យដឹង ចំពោះមូលហេតុដែលបុរសនេះដាច់ចិត្តមកលោតទឹកពីលើស្ពានដោយសារតែកើតរោគប្រចណ្ឌប្រពន្ធរបស់ខ្លួន តែមិនបានបញ្ជាក់ថា ជាមួយនឹងបុរសណាម្នាក់នោះទេរហូតដល់មានការឈ្លោះប្រកែកគ្នាទៅវិញទៅមក ។ ហើយបន្ទាប់មកត្រូវបានឪពុកម្តាយស្តីបន្ទោសឲ្យទៀតទើបខឹងក្តៅចិត្តមិនចង់រស់ក៏ហៅមិត្តភក្តិឲ្យយកម៉ូតូមកដោយបុរសនេះជាអ្នកឌុបចេញមកកាន់ស្ពានគីហ្ស៊ុណាក្រុងកំពង់ចាម ។
ស្របពេលដែលមកដល់លើស្ពានដំបូង គេបានឮការសន្ទនាតាមទូរស័ព្ទរវាងបុរសនេះជាមួយនឹងបង ដោយមិនដឹងជានិយាយអ្វីខ្លះទេ បន្ទាប់មកបងប្រុសក៏បានជិះម៉ូតូមកដល់លើស្ពានហើយបានស្តីបន្ទោសឲ្យប្អូននិយាយមិនទាន់នឹងផុតពីមាត់ផងក៏ស្រាប់តែបុរសគិតខ្លីនេះបានលោតចូលទៅក្នុងទឹកទន្លេបាត់ តែសំណាងល្អត្រូវបានទូកនេសាទខ្មែរអ៊ិស្លាមចេញទៅជួយសង្គ្រោះទាន់ពេលនឹងបានដឹកមកសង្គ្រោះនៅមន្ទីរពេទ្យផងដែរ ៕
ចែករំលែកព័តមាននេះ