ខេត្តពោធិ៍សាត់ ៖ ឯកឧត្តមបណ្ឌិត ម៉ៅ ធនិន អភិបាលនៃគណអភិបាលខេត្តពោធិ៍សាត់ បានអញ្ជើញជួបសំណេះសំណាលជាមួយនាយទាហាន -រង និងពលទាហាន ក្នុងពិធីជូនដំណើរពលទាហានដែលទើបជ្រើសរើសថ្មីចំនួន៤៧នាក់…
ខេត្តពោធិ៍សាត់ ៖ ឯកឧត្តមបណ្ឌិត ម៉ៅ ធនិន អភិបាលនៃគណអភិបាលខេត្តពោធិ៍សាត់ បានអញ្ជើញជួបសំណេះសំណាលជាមួយនាយទាហាន -រង និងពលទាហាន ក្នុងពិធីជូនដំណើរពលទាហានដែលទើបជ្រើសរើសថ្មីចំនួន៤៧នាក់ ថ្ងៃទី២០ ខែធ្នូ ឆ្នាំ២០១៧ បញ្ចូលទៅក្នុងក្របខ័ណ្ឌនៃកងយោធពលខេមរភូមិន្ទ នៅតំបន់ប្រតិបត្តិការសឹករងពោធិ៍សាត់ ។
ក្នុងឱកាសនោះក៍បានការនិមន្ត និងចូលរួមពីសំណាក់ព្រះមេគណខេត្ត មេបញ្ជាការកងកម្លាំងប្រដាប់អាវុធ និងប្រធាន- អនុប្រធានមន្ទីរនានាក្នុងខេត្តផងដែរ ។ បន្ទាប់ពីមតិស្វាគមន៍លោកឧត្តមសេនីយ៍ ប៉ែន ណាវណ្ណ មេបញ្ជាការតំបន់ប្រតិបត្តិការសឹករងពោធិ៍សាត់រួចមក លោកវរសេនីយ៍ឯក ឯក សឹម ប្រធានផ្នែកជ្រើសរើសទ័ពបានរាយការណ៍ថា ក្រោយពីបានទទួលផែនការយោធភូមិភាគទី៥ ។
តំបន់ប្រតិបត្តិការសឹករងពោធិ៍សាត់បានអញ្ជើញអង្គភាព និងសាម៉ីខ្លួនដែលមានការពាក់ព័ន្ធដូចជាផ្នែកជ្រើសរើសទ័ពស្រុកក្រុង កងរាជអាវុធហត្ថ ស្នងការអធិការ និងប៉ុស្តិ៍រដ្ឋបាលគ្រប់ឃុំសង្កាត់ ប្រជុំពិភាក្សាអំពីបញ្ហានេះ ។ ថ្ងៃទី០១ ខែតុលា ឆ្នាំ២០១៧ ផ្នែកជ្រើសរើសទ័ពស្រុកក្រុង បានចុះទៅដល់គោលដៅបញ្ជារការដ្ឋានកងរាជអាវុធហត្ថស្រុកក្រុង ដើម្បីចែកពាក្យដល់យុវជនស្ម័គ្រចិត្តចូលបំរើក្នុងជួរកងយោធពលខេមរភូមិន្ទ ព្រមទាំងមានការផ្សព្វផ្សាយតាមវិទ្យុ ទូរទស្សន៍ អនុគណកម្មការឃោសនាផ្សព្វផ្សាយរយៈពេល៣៣ថ្ងៃផងដែរ ។
ពលទាហានជ្រើសរើសថ្មីបញ្ចូលក្របខណ្ឌនៃកងយោធពលខេមរៈភូមិន្ទនៅតំបន់ប្រតិបត្តិការសឹករងពោធិ៍សាត់ដែលត្រូវបញ្ជូនទៅរៀនសូត្រនៅយោធភូមិភាគទី៥ខេត្តបាត់ដំបងនាពេលនេះមានចំនួន៤៧នាក់ ។ ដោយឡែកខេត្តបាត់ដំបង ខេត្តបន្ទាយមានជ័យ និងខេត្តប៉ៃលិន ក៍ត្រូវបញ្ជូនទៅក្នុងថ្ងៃជាមួយគ្នានេះដែរ ។
ឯកឧត្តមបណ្ឌិតម៉ៅ ធនិន អភិបាលនៃគណអភិបាលខេត្តពោធិ៍សាត់បានលើកឡើងថា ការជ្រើសរើសទ័ពនាពេលនេះ គឺដើម្បីបំពេញក្របខ័ណ្ឌឲ្យយោធភូមិភាគទី១កងទ័ពជើងគោក ។ កងទ័ពជារបង និងជាជញ្ជាំងក្នុងការការពារបូរណភាពទឹកដី និងអាយុជីវិតប្រជាពលរដ្ឋ ។ មិនតែប៉ុណ្ណោះ កន្លងមកនេះ ជួយដកស្ទូង ច្រូតកាត់ បូមទឹក និងជួយសង្គ្រោះ អន្តរាគមន៍ដល់ប្រជាពលរដ្ឋដែលជួបគ្រោះមហន្តរាយ ឫបញ្ហាផ្សេងៗផងដែរ ។ ឯកឧត្តមមានប្រសាសន៍ថា កងទ័ពមានសិទ្ធិការពាររាជរដ្ឋាភិបាល ការពារថ្នាក់ដឹកនាំរាជរដ្ឋាភិបាល ដែលប្រសូត្រចេញពីការបោះឆ្នោតស្រប ច្បាប់ ។ ប្អូនៗជាទំពាំងស្នងឫស្សីត្រូវមានចំណេះដឹង ចំណេះធ្វើ គោរពវិន័យ ស្ដាប់បទបញ្ជារបស់ថ្នាក់ដឹកនាំ មានចិត្តក្លាហាន និងស្មោះត្រង់ចំពោះ ជាតិ សាសនា ព្រះមហាក្សត្យ។
ចំណែកពលទាហានថ្មីទាំង៤៧នាក់ម្នាក់ៗទទួលបានក្រមា០១ ថវិកា៥ម៉ឺនរៀល បាយមួយប្រអប់ និងទឹកបរិសុទ្ធមួយដប សម្រាប់ធ្វើដំណើរចេញទៅសាលាហ្វឹកហាត់យោធភូមិភាគទី៥ខេត្តបាត់ដំបង ៕
ចែករំលែកព័តមាននេះ