ខេត្តព្រៃវែង ៖ ចៅក្រមស៊ើបសួរសាលាដំបូងខេត្ត បានចេញដីកាសម្រេចឃុំខ្លួនកូនថៅកែឈើយីហោ«វីបុល»ជាបណ្ដោះអាសន្ននៅពន្ធនាគារខេត្ត បន្ទាប់ពីជននេះបានយកឈ្មោះថា្នក់ដឹកនាំមកគំរាមអ្នកកាសែត និងអាជ្ញាធរមានសមត្ថកិច្ច ដើម្បីកាងអាជីវកម្មរបស់ខ្លួន ។
បើតាមលោក ញឹក រ៉ាន្នី អ្នកនាំពាក្យសាលាដំបូងខេត្ត បានឲ្យដឹងថា នៅល្ងាចថ្ងៃទី១៨ ខែធ្នូ លោក ឃ្លោក ពិសិដ្ឋ ចៅក្រមស៊ើបសួរសាលាដំបូងខេត្ត បានចេញដីកាសម្រេចឃុំខ្លួនជនឈ្មោះ វី ចាន់ណា ភេទប្រុស អាយុ២២ឆ្នាំជានិស្សិតឆ្នាំទី១នៅវិទ្យាស្ថានជាតិពហុបច្ចេកទេសកម្ពុជា(NPIC) មានទីលំនៅបច្ចុប្បន្នភូមិព្រៃព្នៅ ឃុំព្រៃព្នៅ ស្រុកពារាំង ពីបទ «ប្រើប្រាស់ដោយមិនប្រក្រតីនូវឋានៈណាមួយ»ប្រព្រឹត្តនៅភូមិ-ឃុំរបស់ខ្លួន កាលពីថ្ងៃទី១៣ខែធ្នូ ឆ្នាំ២០១៧ វេលាម៉ោង១រសៀល តាមបញ្ញត្តិមាត្រា៦២០នៃក្រមព្រហ្មទណ្ឌ នៃព្រះរាជជាណាចក្រកម្ពុជា ដោយយោងតាមដីកាសន្និដ្ឋានបញ្ជូនរឿងឲ្យស៊ើបសួរលេខ៣៩៤ ចុះថ្ងៃទី១៨ ខែធ្នូ ឆ្នាំ២០១៧ ។
គួរំឭកថា លោក ប៊ី វី ជាម្ចាស់ដេប៉ូឈើឈ្មោះ«វីបុល» ដែលមានទីតាំងនៅភូមិព្រៃព្នៅឃុំព្រៃព្នៅ ស្រុកពារាំង បានមានទំនាស់ជាមួយអ្នកកាសែតចំនួន៣នាក់ រហូតឈានដល់ការដាក់ពាក្យបណ្តឹងទៀតផង ។ ក្រោយមក ជនឈ្មោះ វី ចាន់ណា ដែលត្រូវជាកូនបានទូរស័ព្ទមកអ្នកសារព័ត៌មានដោយនិយាយគំរាមកំហែងថា បើអ្នកកាសែតទាំង៣នាក់នោះខ្លាំង មេខ្ញុំគឺលោក ស សុខា ឲ្យទៅជួបនៅទីស្ដីការគណៈរដ្ឋមន្ត្រីជាន់ទី៧បន្ទប់លេខ២ ដោយទៅជួបជាមួយសម្ដេចតេជោផ្ទាល់តែម្ដង មិនបាច់ប្ដឹងប្ដល់អីទេ ព្រោះថាកូនម្ចាស់ដេប៉ូឈើនេះគឺធ្វើការនៅជាមួយលោក ស សុខា បើថាពិបាកពេកថ្ងៃចន្ទក្រោយទៅជួបសម្ដេចតែម្ដងឲ្យដឹងរឿង ។
លុះដល់ព្រឹកថ្ងៃទី១៧ ខែធ្នូ ឆ្នាំ២០១៧ ជនឈ្មោះ វី ចាន់ណា ត្រូវបានសមត្ថកិច្ចឃាត់ខ្លួននៅស្នងការរដ្ឋាននគរបាលខេត្ត និងកសាងសំណុំរឿងបញ្ជូនមកអយ្យការអមសាលាដំបូងខេត្ត នៅព្រឹកថ្ងៃទី១៨ ខែធ្នូ ។
ទោះបីជាយ៉ាងណាក៏ដោយ គេសង្កេតឃើញថា ជនឈ្មោះ វី ចាន់ណា បានបង្ហោះសារជាវីដេអូសុំទោសសម្តេចតេជោ និងលោក ស សុខា កាលពីល្ងាចថ្ងៃទី១៧ ខែធ្នូ ខណៈរូបគេកំពុងត្រូវបានឃាត់ខ្លួនសាកសួរនៅស្នងការដ្ឋាននគបាលខេត្ត ដើម្បីឱ្យថ្នាក់ដឹកនាំអភ័យទោសដល់កំហុសរបស់ខ្លួន ។
នេះជាមេរៀនមួយសម្រាប់ជនខិលខូចដទៃទៀត ដែលតែងតែយកឈ្មោះអ្នកដឹកនាំទៅគំរាមគេឯងឱ្យខ្លាច តែភ្លេចខ្លួនថា សម្តីដែលនិយាយអួតអាងយកឈ្មោះអ្នកដឹកនាំទៅប្រើការពារប្រយោជន៍របស់ខ្លួន ពិតជាត្រូវបានថតទុក ។ ថ្ងៃក្រោយសុំកុំរាង !!
ចែករំលែកព័តមាននេះ