ខេត្តស្ទឹងត្រែង ៖ អាជីវកម្មសត្វព្រៃលើទីផ្សារស្ទឹងត្រែងរងការបង្ក្រាបដោយកម្លាំងកងរាជអាវុធហត្ថក្រុង និងខេត្តកាលពីវេលាម៉ោង៩និង១៥នាទីព្រឹកថ្ងៃទី១៩ ខែធ្នូ ឆ្នាំ២០១៧ស្ថិតនៅផ្សារសាមគ្គីស្ទឹងត្រែង ភូមិត្រព្រីងសង្កាត់ស្ទឹងត្រែង ក្រុងស្ទឹងត្រែង ។
ប្រភពឲ្យដឹងថា នៅវេលាកេីតហេតុកម្លាំងកងរាជអាវុធហត្ថដឹកនាំដោយលោកមេបញ្ជាការកងរាជអាវុធហត្ថបានចុះដល់គោលដៅទីតាំង និងបញ្ជាឲ្យចាប់បង្ក្រាប និងឃាត់ខ្លួនបុរសម្នាក់ជាម្ចាស់អាជីវកម្មនោះដែរ ។ ក្រោយការបង្ក្រាបរឹបអូសអាជីវកម្មល្មើសច្បាប់ខាងកម្លាំងកងរាជអាវុធហត្ថបាននាំមកបញ្ជាការដ្ឋានដោយមានការចូលរួមពិនិត្យពីសំណាក់លោកព្រះរាជអ្ញារងអមសាលាដំបូងខេត្ត រួមមន្ត្រីខណ្ឌរដ្ឋបាលព្រៃឈើផងដែរ ។
មន្ត្រីកងរាជអាវុធហត្ថនៃមន្ទីរយុត្តិធម៌ឲ្យដឹងថា ក្នុងសកម្មភាពចុះបង្ក្រាបទីតាំងអាជីវកម្មសត្វព្រៃខុសច្បាប់ កម្លាំងអាវុធហត្ថបានឃាត់ខ្លួន ជនសង្ស័យម្នាក់ជាម្ចាស់ទីតាំងអាជីវកម្មឈ្មោះហួត តារា ភេទប្រុស អាយុ៣០ឆ្នាំបច្ចុប្បន្នស្នាក់នៅភូមិរាជានុកូល សង្កាត់ស្ទឹងត្រែង ក្រុងស្ទឹងត្រែង ។
លោកសុខ សេដា មន្ត្រីផ្នែករដ្ឋបាលព្រៃឈើក្រុងស្ទឹងត្រែងឲ្យដឹងថា វត្ថុតាងចាប់យកកម្លាំងកងរាជអាវុធហត្ថរួមមានសាច់ជ្រូកព្រៃចំនួន៤៥គីឡូក្រាម អណ្តើកចំនួន៣ក្បាល ទម្ងន់១៥គីឡូក្រាម ក្រពះប្រម៉ាក្រៀមចំនួន៣ សត្វរញីរស់ចំនួន៥ក្បាល សត្វត្រកួតរស់ចំនួន៣ក្បាលទម្ងន់១៦គីឡូក្រាម ។ ក្រោយធ្វើកំណត់ហេតុរួមកម្លាំងកងរាជអាវុអធហត្ថបានប្រគល់វត្ថុតាងល្មើសច្បាប់ទៅឲ្យជំនាញរដ្ឋបាលព្រៃឈើបន្តចាត់ការនីតិវិធី ។ ជាក់ស្តែងសត្វព្រៃរស់ត្រូវបាននាំទៅសង្គ្រោះនៅតំបន់មានសុវត្តិភាព ចំណែកសាច់ព្រៃត្រូវដុតកម្ទេចចោលនៅបរិវេណខណ្ឌរដ្ឋបាលព្រៃឈើ ៕
ចែករំលែកព័តមាននេះ