ទីក្រុងសេអ៊ូល ៖ ភ្នាក់ងារស្ថិតិសេអ៊ូលបាននិយាយថា ពលរដ្ឋក្នុងប្រទេសកូរ៉េខាងជើងទទួលបានប្រាក់ចំណូលច្រើនជាងឆ្នាំ២០១៦ ប៉ុន្តែពលរដ្ឋកូរ៉េខាងត្បូងរកប្រាក់ចំណូលបានច្រើនជាងនេះដល់ទៅ២០ដង ។
Statistics Korea បាននិយាយក្នុងសេចក្តីថ្លែងការណ៍ថា ប្រាក់ចំណូលក្នុងម្នាក់នៅកូរ៉េខាងជើង ស្មើប្រមាណ១.៣៤០ដុល្លារកាលពីឆ្នាំមុន ឬកើនឡើង៥% ។ វាជាការកើនឡើងច្រើនជាងគេតាំងពីឆ្នាំ២០១១មក នៅពេលប្រាក់ចំណូលកើន៧% ។
កូរ៉េខាងជើងស្ថិតនៅក្នុងចំណោមប្រទេសលាក់បាំងច្រើនជាងគេលើពិភពលោក ហើយប្រទេសនេះមិនប្រកាសពីទិន្នន័យសេដ្ឋកិច្ចរបស់ខ្លួនឡើយ សូម្បីតែទិន្នន័យទាក់ទងនឹងការលូតលាស់ GDP ក្តី ដែលធ្វើឲ្យអ្នកតាមដានត្រូវប្រមូលទិន្នន័យដោយខ្លួនឯង ។ ចំណែកនៅកូរ៉េខាងត្បូងវិញ ប្រាក់ចំណូលក្នុងម្នាក់ស្មើប្រមាណ៣ម៉ឺនដុល្លារ ។
ភ្នាក់ងារខាងលើបន្តថា ផលិតកម្មអគ្គិសនីរបស់ពួកគេស្មើប្រមាណ៥៤០,៤ប៊ីលានគីឡូវ៉ាត់ម៉ោងនៅឆ្នាំ២០១៦ ។
ការធ្វើពាណិជ្ជកម្មសរុបរបស់កូរ៉េខាងត្បូងស្មើ៩០២ប៊ីលានដុល្លារ ច្រើនជាងកូរ៉េខាងជើងដល់ទៅ១៤០ដង (កូរ៉េខាងជើងស្មើតែ៦,៥ប៊ីលានដុល្លារប៉ុណ្ណោះ) ។
កាលពីខែកក្កដាកន្លងមក ធនាគារជាតិកូរ៉េខាងត្បូងព្យាករថា GDP របស់កូរ៉េខាងជើងបានកើនឡើង៣,៩%កាលពីឆ្នាំមុន ច្រើនជាងការលូតលាស់របស់កូរ៉េខាងត្បូងដែលស្មើតែ២,៨% ។
វាជាការលូតលាស់ច្រើនជាងគេក្នុងរយៈពេល១៧ឆ្នាំមកនេះ ខណៈកូរ៉េខាងជើងអនុញ្ញាតឲ្យទីផ្សារដើរតួនាទីកាន់តែច្រើនឡើងក្រោមការដឹកនាំរបស់លោក គីម ជុងអ៊ុន៕
ចែករំលែកព័តមាននេះ