ខេត្តកំពង់ចាម ៖ អតីតមន្ត្រីយោធាមួយរូបឈ្មោះ ថូយ យង់ អាយុ៦២ឆ្នាំ នៅភូមិរូង ឃុំទំនប់ ស្រុកបាធាយ ដែលកើតជំងឺតេតាណូសធ្វើទុក្ខបុកម្នេញលើរូបកាយគាត់មិនឈប់ឈរបានធ្វើអត្តឃាតដោយឱបគ្រាប់បែកហើយបំផ្ទុះបណ្តាលឲ្យធ្លាយពោះវៀនស្លាប់នៅនឹងជណ្តើរផ្ទះឈើមុខផ្ទះរបស់ខ្លួនគួរឱ្យរន្ធត់ ។
ហេតុការណ៍នោះ កើតឡើងនៅវេលាម៉ោង៥ និង៣០នាទីល្ងាចថ្ងៃទី១៦ ធ្នូ ហើយបានបង្កឲ្យមានការភ្ញាក់ផ្អើលដល់សមត្ថកិច្ច ចុះមកពិនិត្យសាកសពដែលត្រូវច្រៀកហែកខ្ទេចខ្ទីដោយកម្លាំងគ្រាប់បែក ។
លោកវរសេនីយ៍ត្រី ដួង ញ៉ា អធិការរងនគរបាលស្រុកបាធាយ ទទួលផែនព្រហ្មទណ្ឌប្រាប់ឲ្យដឹងថា នៅរសៀលមុនពេលកើតហេតុស្ត្រីជាប្រពន្ធនិងកូនរបស់បុរសរូបនេះ បាននាំគ្នាចេញពីផ្ទះទៅឃ្វាលគោនៅឯស្រែបាត់ នៅផ្ទះតែគាត់ម្នាក់ឯង ហើយផ្ទះគាត់ក៏បានសង់នៅឆ្ងាយដាច់ពីគេឯងដែរ ។
លោកអធិការរងរូបនេះប្រាប់បន្តថា លុះរហូតដល់វេលាម៉ោងខាងលើ ស្រាប់តែអតីតមន្ត្រីយោធាមិនដឹងជាបានគ្រាប់បែកមកពីណានោះទេ បានយកមកកាន់ក្នុងដៃដោយបានទាញស្លាបព្រាចេញនិងបានឱបនៅកាំជណ្តើរផ្ទះបណ្តាលឲ្យផ្ទុះលាន់កក្រើក ធ្លាយពោះវៀនស្លាប់យ៉ាងអាណោចអាធ័ម ដោយប្រពន្ធកូនមិន ដឹងនោះឡើយ ។ ក្រោយពីការផ្ទុះយ៉ាងកក្រើកប្រថពី បង្កឲ្យមានការភ្ញាក់ផ្អើលដល់ពលរដ្ឋជិតខាងនាំគ្នារត់មកមើលនិងបានរាយការណ៍មកលោកនាយប៉ុស្តិ៍រដ្ឋបាលទំនប់ ហើយរាយការណ៍បន្តមកលោកអធិការនគរបាលស្រុក ដោយបានចាត់ឲ្យជំនាញបច្ចេកទេសចុះទៅពិនិត្យសពឃើញថា បុរសរូបនេះពិតជាបានស្លាប់ដោយការធ្វើអត្តឃាតបំផ្ទុះគ្រាប់បែកបណ្តាលឲ្យស្លាប់ពិតមែន ។ បន្ទាប់មកបានប្រគល់សពឲ្យទៅប្រពន្ធកូន ដើម្បីរៀបចំធ្វើបុណ្យតាមប្រពៃណី ។
លោកវរសេនីយ៍ត្រី ដួង ញ៉ា អធិការរងនគរបាលស្រុកបាធាយបញ្ជាក់ថា បុរសខាងលើធ្លាប់បានធ្វើជាទាហាននៅក្នុងអំឡុងចុងឆ្នាំ១៩៨០ ក្នុងពេលដែលប្រទេសកម្ពុជាផ្ទុះសង្គ្រាមស៊ីវិលនៅតាមព្រំដែនថៃក្រោយឆ្នាំ១៩៧៩។ គ្រានោះបុរសឈ្មោះ ថូយ យង់ បានត្រូវរបួសដោយអំបែងគ្រាប់ក៏បណ្តាលឲ្យកើតមានជំងឺតេតាណូស ជាប់ជាប្រចាំកាយរហូតមកដល់សព្វថ្ងៃនេះ ។ ចំពោះមូលហេតុដែលបុរសនេះធ្វើអត្តឃាតនោះ អាចមកពីគាត់តូចចិត្តនឹងជំងឺប្រចាំកាយនេះ ទើបយកគ្រាប់បែកមកបំផ្ទុះធ្វើអត្តឃាតដើម្បីបញ្ចប់ជីវិតតែម្តងទៅ ៕
ចែករំលែកព័តមាននេះ