រាជធានីភ្នំពេញ ៖ បុរសម្នាក់ជាជនជាតិអាមេរិក ត្រូវជនជាតិអាល្លឺម៉ង់ និងបារាំង ដែលជួលបន្ទប់ផ្ទះសំណាក់នៅជិតគ្នា ព្រួតវាយបណ្តាលឱ្យរងរបួស កាលពីវេលាម៉ោង៩និង៣០នាទីយប់ថ្ងៃទី១៥ ធ្នូ តាមបណ្តោយផ្លូវ១១១នៅចំណុចផ្ទះសំណាក់រ៉ាវុធ ស្ថិតនៅក្នុងសង្កាត់បឹងព្រលិត ខណ្ឌចំការមន ។
ជនរងគ្រោះជាជនជាតិអាមេរិកឈ្មោះZIEBERT ERIC DELMER ភេទប្រុស អាយុ៣៣ឆ្នាំ បច្ចុប្បន្នស្នាក់នៅផ្ទះសំណាក់រ៉ាវុធ បានឱ្យដឹងថា គាត់បានជួលផ្ទះសំណាក់ខាងលើនេះស្នាក់នៅជាង២សប្តាហ៍មកហើយ ។ នៅថ្ងៃកើតហេតុមានជនជាតិបរទេស២នាក់ទៀតម្នាក់ជនជាតិអាល្លឺម៉ង់ និងម្នាក់ទៀតជាជនជាតិបារាំងមិនស្គាល់អត្តសញ្ញាណទាំង២នាក់ ដែលជួលបន្ទប់នៅជាប់គ្នា បានមករករឿងគាត់រួចព្រួតវាយគាត់បណ្តាលឱ្យរងរបួស រយះក្បាលខាងឆ្វេងទើបមកប៉ុស្តិ៍បឹងព្រលិតឱ្យរកយុធត្តិធម៌ឱ្យ។ ជនរងគ្រោះបានបញ្ជាក់ទៀតថា មូលហេតុដែលជនបង្កព្រួតវាយគាត់ដោយសារតែរូបគាត់ដឹងថា ជនបង្កទាំង២នាក់នោះ នាំគ្នាប្រើប្រាស់ថ្នាំញៀន ។
បើតាមសមត្ថកិច្ចសួរនាំទៅភាគីបង្កបានឱ្យដឹងថា មុនពេលកើតហេតុគឺមកពីជនជាតិអាមេរិកនោះ បើកទូរទស្សន៍ឮសម្លេងខ្លាំងៗ ហើយគាត់ទៅប្រាប់ម្ចាស់ផ្ទះសំណាក់ ចំនួន២ដងមកហើយ ឲ្យជួយគាត់ផង ប៉ុន្តែនៅតែបើកខ្លាំងៗដដែលរកដេកពួកមិនបានសោះ ទើបគាត់ទ្រាំមិនបានក៏ទៅគោះទ្វារសួរនាំ ស្រាប់តែជនជាតិអាមេរិកនោះរកវ៉ៃគាត់ ទើបក្លាយជាការប្រទូស្តរ៉ាយគ្នា ក៏ជ្រុលដៃធ្វើឱ្យរបួសទៅ ។
ក្រោយពេលកើតហេតុជនជាតិអាមេរិកបានទៅដាក់ពាក្យបណ្តឹងនៅប៉ុស្តិ៍នគរបាល រដ្ឋបាលបឹងព្រលិត ហើយសមត្ថកិច្ចប្រាប់ថា ចាំថ្ងៃស្អែកនឹងជូនទៅការិយាល័យអន្តោប្រវេសន៍ ដើម្បីចាត់ការទៅតាមនីតិវិធី ៕
ចែករំលែកព័តមាននេះ